ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនកូដករក្រុមហ៊ុនណាហ្គាវើលដ៍ ៣នាក់ នៅពន្ធនាគារព្រៃសនៅថ្ងៃពុធនេះ ក្រោមបទចោទ«រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាឌី ប្រាប់វីអូឌីនៅល្ងាចថ្ងៃពុធនេះថា កូដករទាំង ៣នាក់ ត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារព្រៃស នៅថ្ងៃទី៩ ខែកុម្ភៈនេះ ពីបទ«រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
កាលពីថ្ងៃទី៥ ខែកុម្ភៈ សមត្ថកិច្ចរាជធានីភ្នំពេញ បានចាប់ខ្លួនកូដករក្រុមហ៊ុនណាហ្គាវើលដ៍ចំនួន ៦នាក់ ប៉ុន្តែ៣នាក់ត្រូវបានដោះលែងទៅវិញ ខណៈកូដករ ៣នាក់ទៀតត្រូវបានបញ្ជូនទៅសាកសួរបន្ត ក្រោមហេតុផលថា ពួកគាត់ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
កូដករ ៣នាក់ដែលត្រូវបានតុលាការសម្រេចឃុំខ្លួនពេលនេះ រួមមានលោក សេង វណ្ណារិទ្ធ លោក ជួន ចាន់ណាត និងលោក សៅរ៍ សម្បត្តិ។
យ៉ាងណាក្រុមកូដករមួយចំនួនធ្លាប់ប្រាប់វីអូឌីថា ពួកគេមិនបានរារាំងការអនុវត្តវិធានការប្រយុទ្ធនឹងជំងឺកូវីដ-១៩ ឡើយ ដោយពួកគេគ្រាន់តែស្នើទៅមន្ត្រីជំនាញឱ្យពន្យារពេលធ្វើតេស្តសំណាកតែប៉ុណ្ណោះ។
រហូតមកទល់ពេលនេះ មានថ្នាក់ដឹកនាំសហជីព និងកូដករក្រុមហ៊ុនណាហ្គាវើលដ៍ចំនួន១១ នាក់ហើយ ត្រូវបានតុលាការសម្រេចឃុំខ្លួន ដោយចោទប្រកាន់ពីបទញុះញង់ឱ្យមានកូដកម្ម និងល្មើសវិធានការច្បាប់ប្រឆាំងកូវីដ-១៩ ខណៈកូដករ ៤នាក់ទៀត ត្រូវប្រឈមការចាប់ខ្លួនក្រោមបទចោទថា រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»ផងដែរ។
ស្របពេលវិវាទការងារក្រុមហ៊ុនល្បែងមួយនេះនៅមិនទាន់ត្រូវបានដោះស្រាយ ហើយការឃុំខ្លួនថ្នាក់ដឹកនាំសហជីព និងកូដករបន្តកើតឡើង ក្រុមអង្គការសង្គមស៊ីវិល សមាគម និងសហជីពតំណាងឱ្យ ១៣៤ស្ថាប័ន ក៏បានចេញមុខស្វែងរកកិច្ចអន្តរាគមន៍ពីស្ថានប័នធំៗរបស់ជាតិជាបន្តបន្ទាប់។
សេចក្តីប្រកាសព័ត៌មានរបស់ក្រុមអង្គការសង្គមស៊ីវិលឱ្យដឹងថា នៅរសៀលថ្ងៃទី១០ ខែកុម្ភៈ ពួកគេនឹងបន្តដើរដាក់លិខិតចំហរនៅតាមស្ថាប័នជាតិសំខាន់ៗរបស់ជាតិ ដើម្បីឱ្យជួយអន្តរាគមន៍ដោះស្រាយវិវាទការងារនៅក្រុមហ៊ុនណាហ្គាវើលដ៍ ព្រមទាំងដោះលែងតំណាងសហជីព និងទម្លាក់ចោលការចោទប្រកាន់ទៅលើពួកគេ។ តាមគម្រោង ពួកគេនឹងដាក់លិខិតចំហរទៅកាន់ក្រសួងសំខាន់ៗចំនួន៣ រួមមាន ក្រសួងយុត្តិធម៌ ក្រសួងការងារ និងក្រសួងកិច្ចការនារី។
កាលពីថ្ងៃទី៧ ខែកុម្ភៈ ក្រុមអង្គការសង្គមស៊ីវិលតំណាងឱ្យ ១៣៤ស្ថាប័ននេះ ក៏បានរួមគ្នាដាក់លិខិតចំហរនេះជូនក្រសួងមហាផ្ទៃ និងរដ្ឋសភាជាតិផងដែរ៕