ប្រជាពលរដ្ឋរស់នៅតាមបណ្ដោយប្រឡាយលេខ០៣ សង្កាត់ជើងឯក ខណ្ឌដង្កោ សម្ដែងការខកចិត្តការដែលរដ្ឋបាលរាជធានីភ្នំពេញ និងមន្ទីររៀបចំដែនដីរាជធានីភ្នំពេញ រុញដាក់គ្នាជុំវិញសំណើសុំឱ្យដោះស្រាយរឿងដីធ្លីរបស់គាត់ ក្រោយពួកគាត់បានដាក់ញត្តិសុំឱ្យជួយអន្តរាគមន៍នាពេលកន្លងមក។
តំណាងប្រជាពលរដ្ឋសហគមន៍តាតុក អ្នកស្រី អ៊ឹម សារឿន បានឱ្យដឹងថា នៅព្រឹកមិញនេះ ប្រជាពលរដ្ឋប្រមាណ២០នាក់ តំណាងឱ្យ៣៥គ្រួសារ រស់នៅសហគមន៍តាតុក ក្នុងភូមិព្រែកថ្លឹង សង្កាត់ជើងឯក បាននាំគ្នាប្រមូលផ្ដុំនៅមុខរដ្ឋបាលរាជធានីភ្នំពេញ ដើម្បីតាមដានញត្តិ និងស្នើសុំជាថ្មីឱ្យអាជ្ញាធរអភិវឌ្ឍនៅនឹងកន្លែង ព្រមទាំងចេញបណ្ណកម្មសិទ្ធដីធ្លីដល់ពួកគាត់។
ប៉ុន្តែអ្នកស្រីថា ក្រោយពីរង់ចាំជួបមន្ត្រី ដើម្បីសួរនាំរឿងញត្តិតាំងពីម៉ោង៩ព្រឹកដល់ម៉ោងជាង២រសៀល នោះ មន្ត្រីរដ្ឋបាលរាជធានីភ្នំពេញបានប្រាប់ថា ពុំបានទទួលញត្តិរបស់ពួកគាត់ដែលបានដាក់នាពេលកន្លងមកនោះឡើយ។ អ្នកស្រីបន្តថា ដោយមិនអស់ចិត្ត ពួកគាត់ក៏បានទៅសួរនាំរឿងញត្តិនោះនៅមន្ទីររៀបចំដែនដីរាជធានីភ្នំពេញបន្តទៀតនៅរសៀលនេះ ដោយមន្ត្រីមន្ទីររៀបចំដែនដីប្រាប់ថា បានបញ្ជូនញត្តិនោះទៅរដ្ឋបាលរាជធានីភ្នំពេញរួចហើយ កាលពីថ្ងៃទី០៤ ខែកុម្ភៈ។
តំណាងពលរដ្ឋរូបនេះយល់ថា អាជ្ញាធរហាក់មានចេតនាគេចវេះដោះស្រាយរឿងដីធ្លីនេះ ខណៈមន្ត្រីរុញដាក់គ្នានូវសំណើរបស់ពលរដ្ឋ។
អ្នកស្រីថា៖ «ដឹងយ៉ាងម៉េច? ប្រហែលជាគាត់ចង់បោះបាល់ [ឱ្យគ្នាទៅវិញទៅមក មិនដោះស្រាយឱ្យ]ពួកខ្ញុំទៀតក៏មិនដឹងទេ នេះគ្រាន់តាមការប៉ាន់ស្មានរបស់ខ្ញុំទេ។ លើកមុនថាបញ្ជូនទៅក្រុងហើយ ដល់តែពេលឥលូវហ្នឹង គេឆែកនៅក្រុងអត់ឃើញ»។
បើតាមអ្នកស្រី អ៊ឹម សារឿន កន្លងមក រដ្ឋាភិបាលមានគម្រោងអភិវឌ្ឍន៍ប្រឡាយ០៣ នៅសង្កាត់ជើងឯកនេះ ហើយការអភិវឌ្ឍនេះមានផលប៉ះពាល់ដល់ពលរដ្ឋចំនួន៣៥គ្រួសារដែលបានរស់នៅតាមបណ្ដោយប្រឡាយនេះតាំងពីឆ្នាំ២០០០មក។
តំណាងពលរដ្ឋរូបនេះបន្តថា ពលរដ្ឋធ្លាប់បានដាក់ញត្តិសុំទៅរដ្ឋបាលរាជធានីភ្នំពេញ និងអាជ្ញាធរពាក់ព័ន្ធ ចាប់តាំងពីឆ្នាំ២០១៨មក ប៉ុន្តែមកដល់ពេលនេះ នៅមិនទាន់មានការឆ្លើយតបជាវិជ្ជមាននៅឡើយទេ ទើបពួកគាត់នាំគ្នាមកតាមដានញត្តិជាថ្មីទៀតនៅថ្ងៃនេះ។
អ្នកស្រី អ៊ឹម សារឿន បន្ថែមថា៖«អាជ្ញាធរឆាប់ចេញបណ្ណកម្មសិទ្ធិឱ្យពួកខ្ញុំទៅ ដើម្បីងាយស្រួលពួកខ្ញុំនឹងធ្វើសំណង់ [ផ្ទះ] ឱ្យបានសមរម្យ ចាក់ដីចាក់អីឱ្យបានល្អ។ ដោយសារពួកខ្ញុំខ្លះ គ្នាអត់ហ៊ានចាក់ ខ្លះចាក់នោះចាក់ទាំងប្រថុយប្រថាន ដោយមានការភ័យខ្លាច ក្រែងលោថ្ងៃក្រោយអាជ្ញាធរគេឱ្យយើងរើចេញទៅ អត់មានដំណោះស្រាយអីឱ្យយើងសមរម្យ វាពិបាកអ៊ីចឹង! ដល់ពេលឱ្យយើងចេញទៅ គេឱ្យយើង ១០០០ [ទៅ] ២០០០ [ដុល្លារអាមេរិកក្នុងមួយគ្រួសារ] ម្នាក់ ហើយក្នុងមួយផ្ទះមាន ៣ [ទៅ] ៤ គ្រួសារ [ថ្មី] ហើយទៅរស់នៅម៉េចទៅ?»
វីអូឌី មិនអាចទាក់ទងសុំការបកស្រាយពីអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានទេ នៅថ្ងៃទី០៩ ខែកុម្ភៈនេះ។
ចំណែកអភិបាលខណ្ឌដង្កោ លោកស្រី គឹម ញឹប បដិសេធបកស្រាយ ដោយអះអាងថាធ្លាប់បានប្រជុំសម្របសម្រួលជាមួយពលរដ្ឋរួចហើយ។
លោកស្រីថា៖ «ខ្ញុំបានធ្លាប់ប្រជុំសម្របសម្រួលជាមួយប្រជាជនហើយនិងម្ចាស់បុរី ពីការព្រមព្រៀងឯកភាពគ្នាហើយ អ៊ីចឹងគាត់អនុវត្តតាមហ្នឹងទៅ»។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត ថ្លែងថា ការដែលប្រជាពលរដ្ឋបារម្ភពីបណ្ណកម្មសិទ្ធិដីធ្លី គឺជារឿងត្រឹមត្រូវ។ លោកថា បើសិនជាមិនមានប្លង់កម្មសិទ្ធិ ពួកគាត់នឹងប្រឈមនឹងការបណ្ដេញចេញដោយបង្ខំនៅថ្ងៃណាមួយ ហើយដីរបស់ពួកគាត់អាចនឹងធ្លាក់ទៅក្នុងដៃរបស់ក្រុមហ៊ុន ឬជនមានអំណាចណាមួយ។
យ៉ាងណា លោកចាត់ទុកការដែលអាជ្ញាធររាជធានីភ្នំពេញមិនអនុញ្ញាតឱ្យពលរដ្ឋចូលជួប និងមានការរុញដាក់គ្នាទៅវិញទៅមក ថាជាការគេចវេះនិងខ្វះទំនួលខុសត្រូវរបស់អាជ្ញាធរក្នុងការដោះស្រាយបណ្ដឹងឬសំណូមពរប្រជាពលរដ្ឋ ដែលផ្ទុយនឹងរដ្ឋធម្មនុញ្ញរបស់កម្ពុជា។
លោក វណ្ណ សូផាត មានប្រសាសន៍ថា៖ «វាផ្ទុយទៅនឹងរដ្ឋធម្មនុញ្ញរបស់យើង ដែលថាអង្គការរដ្ឋត្រូវយកចិត្តទុកដាក់និងទទួលពាក្យបណ្ដឹងរបស់ប្រជាពលរដ្ឋ និងពិចារណាក្នុងការដោះស្រាយឱ្យបានសមរម្យ និងយុត្តិធម៌ដល់ប្រជាពលរដ្ឋ។ អាហ្នឹងមានន័យគាត់ [អាជ្ញាធររាជធានីភ្នំពេញ] មិនបានបំពេញតួនាទីក្នុងនាមជាអ្នកគាំទ្រ ការពារប្រជាពលរដ្ឋទេ ប៉ុន្តែភាគច្រើនៗតែមានការគេចវេះ ហើយនិងរុញពីមួយទៅមួយហ្នឹង ដែលធ្វើឱ្យប្រជាពលរដ្ឋនៅតែមានការភ័យខ្លាច ហើយនិងរងទុក្ខវេទនា ដោយសារតែការបណ្ដេញចេញ ដកហូតយកដីរបស់ពួកគាត់ហ្នឹង»។
លោក វណ្ណ សូផាត យល់ថា មានកត្តាសំខាន់ៗចំនួន៣ ដែលធ្វើឱ្យមានការអូសបន្លាយលើការផ្ដល់បណ្ណកម្មសិទ្ធិដីធ្លីដល់ពលរដ្ឋ ក្នុងនោះ ទី១ អាជ្ញាធរថ្នាក់ក្រោមមិនមានសិទ្ធិសម្រេចចុងក្រោយលើការផ្ដល់បណ្ណកម្មសិទ្ធិជូនពលរដ្ឋ គឺមានតែថ្នាក់កំពូលដែលហ៊ានសម្រេច ទី២ ដីនោះអាចមានប្លង់រួចហើយដែលរដ្ឋមានគម្រោងនឹងផ្ដល់ដល់ក្រុមហ៊ុន ឬអ្នកមានអំណាច និងទី៣ ដីនោះអាចជាចំណីថ្នល់ ដីចំណីប្រឡាយរបស់រដ្ឋ ដែលមិនអាចកាត់ឱ្យពលរដ្ឋបាន៕