មន្ត្រីជាន់ខ្ពស់គណបក្សសង្គ្រោះជាតិដែលត្រូវបានតុលាការរំលាយ លោកស្រី អ៊ុង សុវណ្ណា បានដាក់លិខិតស្នើសុំសិទ្ធិធ្វើនយោបាយឡើងវិញកាលពីថ្ងៃទី២៧ ខែមករា ឆ្នាំ២០២២ ប៉ុន្តែក្រសួងមហាផ្ទៃនៅមិនទាន់សម្រេចនៅឡើយ។
លោកស្រី អ៊ុង សុវណ្ណា ដែលគេស្គាល់ថាជាភរិយារបស់លោក ម៉ែន សុថាវរិន្ទ្រ ជាមនុស្សស្និទ្ធនឹងលោក សម រង្ស៊ី នោះ បានសរសេរលិខិតមួយនៅថ្ងៃទី២៧ ខែមករា និងបានផ្ញើទៅកាន់រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៨ ខែមករា ដោយស្នើសុំផ្ដល់នីតិសម្បទានូវសិទ្ធិធ្វើនយោបាយពេញលេញឡើងវិញនៅមុនកាលកំណត់។
លោកស្រី អ៊ុង សុវណ្ណា គឺជាសមាជិកគណៈកម្មការនាយក និងជាអនុប្រធានចលនាស្ត្រីគណបក្សសង្គ្រោះជាតិដែលត្រូវបានតុលាការរំលាយ។
លោកស្រីបានសរសេរថា៖ «ក្នុងរយ:ពេលជាង៤ឆ្នាំកន្លងទៅនេះ នាងខ្ញុំបានអនុវត្តយ៉ាងពេញលេញតាមអំណាចសាលដីការបស់តុលាការកំពូល។ ដូច្នេះហើយនាងខ្ញុំចង់ទទួលបាននីតិសម្បទានូវសិទ្ធិនយោបាយពេញលេញឡើងវិញមុនកាលកំណត់ ដើម្បីបានចូលរួមបម្រើសង្គម និងប្រទេសជាតិ ដូចប្រជាពលរដ្ឋទូទៅដែរ ស្របតាមច្បាប់រដ្ឋធម្មនុញ្ញ និងច្បាប់ជាធរមាន»។
ប៉ុន្តែគិតត្រឹមថ្ងៃទី៩ ខែកុម្ភៈនេះ ក្រសួងមហាផ្ទៃនៅមិនទាន់សម្រេចយ៉ាងណានៅឡើយទេចំពោះការស្នើសុំនេះ ខណៈវីអូឌីមិនអាចសុំការបញ្ជាក់បន្ថែមពីអ្នកនាំពាក្យក្រសួងមហាផ្ទៃ លោក ខៀវ សុភ័គ បានឡើយនៅថ្ងៃពុធនេះ។
សូមជម្រាបជូនថា គិតត្រឹមដើមឆ្នាំ២០២២នេះ មានមន្ត្រីជាន់ខ្ពស់គណបក្សសង្គ្រោះជាតិដែលត្រូវបានតុលាការរំលាយកាលពីខែវិច្ឆិកា ឆ្នាំ២០១៧ ចំនួន២៩នាក់ ក្នុងចំណោមអ្នកជាប់បម្រាមមិនឱ្យធ្វើនយោបាយចំនួន១១៨នាក់ បានស្នើសុំសិទ្ធិធ្វើនយោបាយឡើងវិញ៕