លោកឧត្ដមសេនីយ៍ឯកផ្កាយមាស៣ និងជាឧកញ៉ាមួយរូប លោក ឌួង ងៀប បានលាតត្រដាងពីការទទួលរងភាពអយុត្តិធម៌ពីតុលាការ ទាក់ទងនឹងអំពើពុករលួយមួយចំនួនរវាងដៃគូសហការនិងក្រុមគ្រួសារ ខណៈលោកបានបង្ហោះវីដេអូតាមបណ្ដាញសង្គមហ្វេសប៊ុកដើម្បីស្នើសុំទៅថ្នាក់ដឹកនាំជួយអន្តរាគមន៍ តែគ្មានប្រយោជន៍ឡើយ។
វីដេអូចំនួនពីរ និងឯកសារមួយចំនួនដែលគាត់បានបង្ហោះលើទំព័រ Facebook កាលពីល្ងាចថ្ងៃចន្ទដល់ថ្ងៃអង្គារម្សិលមិញ លោកបាននិយាយថា លោកត្រូវបានកាត់ទោសពីបទ «ផិតក្បត់» ហើយកំពុងត្រូវបានកាត់ទោសពីបទ «ឆបោកជនជាតិតៃវ៉ាន់»។
លោក ឌួង ងៀប បាននិយាយក្នុងវីដេអូថា៖ «ខ្ញុំទ្រាំជាមួយចៅក្រមលែងបានហើយ ពេលនេះខ្ញុំអស់លុយហើយ ខ្ញុំគ្មានលុយឯណាឱ្យចៅក្រមតទៅទៀតទេ»។
យោងតាមវីដេអូបង្ហាញថា បញ្ហារបស់លោកគឺរួមមានជម្លោះជាមួយជនជាតិតៃវ៉ាន់ និងការបែកបាក់ប្រពន្ធនិងកូនផងដែរ។
កូនប្រុសរបស់លោក ឌួង ងៀប គឺលោក ឌួង ឆាយ ដែលជាពាណិជ្ជករមួយរូបផងនោះ ត្រូវបានចាប់ខ្លួនកាលពីឆ្នាំមុន ក្រោយមានវីដេអូបង្ហាញការវាយដំប្រពន្ធរបស់គាត់នៅក្នុងផ្ទះរបស់ពួកគេ។
កិច្ចព្រមព្រៀងអាជីវកម្មនេះ គឺសម្រាប់ការសាងសង់រោងចក្របីកន្លែង។ លោក ឌួង ងៀប បាននិយាយថា ដៃគូរកស៊ីបានសុំឱ្យគាត់សរសេរមូលប្បទានបត្រពីរសន្លឹកក្នុងតម្លៃ ៣លានដុល្លារ និង៤លានដុល្លារ ដើម្បីធ្វើឱ្យដៃគូសហការជឿថាពួកគេមានលុយ។
លោកបន្ថែមថា បន្ទាប់ពីមានជម្លោះក្នុងគ្រួសារក៏បានបណ្ដាលឱ្យគាត់បានចាកចេញពីផ្ទះ បន្ទាប់មកប្រពន្ធរបស់គាត់បានយកឯកសារអាជីវកម្មរបស់គាត់ទាំងអស់។
លោកនិយាយថា សហការី និងប្រពន្ធរបស់គាត់បានជំរុញឱ្យគាត់ខ្ចីលុយចំនួន១លានដុល្លារពីធនាគារមួយ ហើយលោកចោទថាប្រពន្ធយកពាក់កណ្ដាលទៅលេងល្បែងភ្នាល់ទឹកភ្លៀង។
លោកនិយាយពីប្រពន្ធថា៖ «នាងចាញ់ល្បែងភ្នាល់ទឹកភ្លៀង»។
មកដល់ពេលនេះ លោកបានប្រឈមនឹងបណ្ដឹងពីបទឆបោក ហើយសំណុំរឿងនេះបានឈានទៅដល់សំណុំរឿងព្រហ្មទណ្ឌថែមទៀតផង។
លោកបន្តថា៖ «បន្ទាប់ពីចោទប្រកាន់ខ្ញុំ ខ្ញុំបានអង្វរតុលាការឱ្យជួយខ្ញុំ ព្រោះខ្ញុំមិនដែលបោកអ្នកណាមួយរៀលទេ។ ប៉ុន្តែខ្ញុំទៅតុលាការម្ដងខ្ញុំត្រូវបង់លុយម្ដង ទោះបីជាខ្ញុំមិនមានកំហុស ក៏ខ្ញុំត្រូវតែបង់លុយ។ ខ្ញុំយល់ពីរបៀបដែលតុលាការនិងចៅក្រមធ្វើការ វាមិនសមនោះទេ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា លោកមិនបានដឹងពីការចោទប្រកាន់របស់លោក ឌួង ងៀប នោះទេ។
លោកបន្តថា៖ «ដូចភាគីទាំងអស់ដែលជឿថាពួកគេបានរងនូវភាពអយុត្តិធម៌ ដោយសារភាពមិនប្រក្រតីរបស់តុលាការ គាត់អាចដាក់ពាក្យបណ្ដឹងទៅក្រសួងយុត្តិធម៌ និងឧត្ដមក្រុមប្រឹក្សានៃអង្គចៅក្រម ប្រសិនបើគាត់មានមូលដ្ឋានច្បាស់លាស់និងរឹងមាំ គេនឹងស៊ើបអង្កេត»។
លោក ឌួង ងៀប បានបន្ថែមនៅក្នុងវីដេអូរបស់គាត់ថា លោកបានទៅជួបមន្ត្រីជាន់ខ្ពស់រដ្ឋាភិបាលដើម្បីសុំជំនួយ ដោយទី១ គឺលោក ស្រ៊ី ថាមរ៉ុង រដ្ឋមន្ត្រីប្រតិភូអមនាយករដ្ឋមន្ត្រី ដែលបានអាណិតនិងជួយយកលិខិតរបស់លោកទៅប្រធានខុទ្ទកាល័យលោក ហ៊ុន សែន។ ទី២ លោក ហូ សិទ្ធី ដែលជានាយខុទ្ទកាល័យលោកនាយករដ្ឋមន្ត្រី ហ៊ុន សែន។ លោក សិទ្ធី បានផ្ញើលិខិតមួយច្បាប់ទៀតទៅក្រសួងយុត្តិធម៌។
លោក ឌួង ងៀប ក៏បានជួបប្រធានព្រឹទ្ធសភា លោក សាយ ឈុំ ដែលបានប្រាប់គាត់ឱ្យប្ដឹងទៅក្រសួងមហាផ្ទៃផ្ទាល់តែម្ដង។ ដោយលោកមិនអាចជួបរដ្ឋមន្ត្រីក្រសួងមហាផ្ទៃ លោក ស ខេង បាន ប៉ុន្តែលោក ខៀវ សុភ័គ អ្នកនាំពាក្យក្រសួងមហាផ្ទៃ បានឱ្យលោក ប៊ុន ហ៊ុន អតីតប្រធានគណៈមេធាវីទាក់ទងទៅតុលាការរាជធានីភ្នំពេញ។
លោកថា ចៅក្រមទីមួយគឺ “អាក្រក់” ហើយចៅក្រមថ្មីត្រូវបាននាំមកដើម្បីដោះស្រាយរឿងក្ដីរបស់គាត់ ត្រូវបានលោកចាត់ទុកថាជាចៅក្រមរួមគ្នាធ្វើស៊ីរូបលោក។
ឧកញ៉ាដដែលនេះបានមានប្រសាសន៍ថា៖ «ខ្ញុំតាមគាត់អស់ហើយ គាត់ចង់បានលុយប៉ុន្មាន ខ្ញុំឱ្យទៅប៉ុណ្ណឹង។ ប៉ុន្តែទីបំផុត ពួកគេចង់ចាប់ខ្ញុំដាក់គុកទៀត»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មិនបានឆ្លើយតបនឹងសំណួរពាក់ព័ន្ធករណីនេះទេ កាលពីម្សិលមិញ។
លោក ឌួង ងៀប បាននិយាយថា គាត់ត្រូវបានកាត់ទោសរួចហើយពីបទផិតក្បត់ ហើយប្រឈមមុខនឹងការជាប់ពន្ធនាគារ និងបានស្នើសុំការលើកលែងទោសពីលោក ហ៊ុន សែន និងភរិយារបស់លោក គឺលោកស្រី ប៊ុន រ៉ានី ហ៊ុន សែន។
លោកបាននិយាយថា៖ «ខ្ញុំបានរងការឈឺចាប់ដែលមិនអាចថ្លែងបាន»៕
ប្រែសម្រួលពីអត្ថបទដើមភាសាអង់គ្លេស៖ Oknha Rails Against Court Pressure
