ពលរដ្ឋប្រមាណ២០នាក់ តំណាងឱ្យ៣៥គ្រួសារ រស់នៅសហគមន៍តាតុក ក្នុងភូមិព្រែកថ្លឹង សង្កាត់ជើងឯក ខណ្ឌដង្កោ នៅព្រឹកថ្ងៃពុធនេះ បាននាំគ្នាប្រមូលផ្ដុំនៅមុខរដ្ឋបាលរាជធានីភ្នំពេញ ដើម្បីតាមដានញត្តិ និងស្នើសុំជាថ្មីឱ្យអាជ្ញាធរអភិវឌ្ឍនៅនឹងកន្លែង ព្រមទាំងចេញបណ្ណកម្មសិទ្ធដីធ្លីដល់ពួកគាត់។
ប្រជាពលរដ្ឋសហគមន៍តាតុក អ្នកស្រី អ៊ឹម សារឿន មានប្រសាសន៍ថា កន្លងមក រដ្ឋាភិបាលមានគម្រោងអភិវឌ្ឍប្រឡាយ០៣ នៅក្នុងសង្កាត់ជើងឯកនេះ ដែលការអភិវឌ្ឍនេះមានផលប៉ះពាល់ដល់ពួកគាត់ទាំង៣៥គ្រួសាររស់នៅតាមបណ្ដោយប្រឡាយតាំងពីឆ្នាំ២០០០មក។
ពាក់ព័ន្ធនឹងករណីនេះ អ្នកស្រីថា ពលរដ្ឋធ្លាប់បានដាក់ញត្តិសុំទៅរដ្ឋបាលរាជធានីភ្នំពេញ និងអាជ្ញាធរពាក់ព័ន្ធ ចាប់តាំងពីឆ្នាំ២០១៨មក ប៉ុន្តែមកដល់ពេលនេះ នៅមិនទាន់មានការឆ្លើយតបជាវិជ្ជមាននៅឡើយ ទើបនៅថ្ងៃពុធនេះ ពួកគាត់នាំគ្នាទៅរដ្ឋបាលរាជធានីភ្នំពេញ ដើម្បីតាមដានញត្តិដែលបានដាក់កន្លងមក និងសុំអាជ្ញាធរជាថ្មីឱ្យចេញបណ្ណកម្មសិទ្ធិកាន់កាប់ដីធ្លីនិងកាត់ឆ្វៀលដីឱ្យពួកគាត់ ហើយធ្វើការអភិវឌ្ឍនៅនឹងកន្លែង។
ទោះយ៉ាងណា បើតាមតំណាងប្រជាពលរដ្ឋរូបនេះ អាជ្ញាធររាជធានីភ្នំពេញនៅមិនទាន់អនុញ្ញាតឱ្យពួកគាត់ចូលជួបនៅឡើយទេ ដោយឱ្យពួកគាត់រង់ចាំជួបនៅម៉ោង២រសៀលវិញ ខណៈមន្ត្រីដែលកាន់រឿងនេះជាប់រវល់។
វីអូឌី នៅពុំទាន់អាចសុំការអត្ថាធិប្បាយជុំវិញករណីនេះពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី បាននៅឡើយទេ នៅព្រឹកនេះ៕