អាជ្ញាធររាជធានីភ្នំពេញ បានចេញសេចក្ដីណែនាំមួយនៅថ្ងៃនេះ ដោយក្រើនរម្លឹកជាថ្មី មិនអនុញ្ញាតឱ្យមនុស្សអង្គុយលើសពី៧នាក់ក្នុងមួយតុ សម្រាប់ការរៀបចំកម្មវិធីមង្គលការឬពិធីជួបជុំផ្សេងៗ។
អាជ្ញាធររាជធានីភ្នំពេញ បានចេញសេចក្ដីណែនាំមួយស្ដីពីការក្រើនរម្លឹកក្នុងការអនុវត្តវិធានការសុខាភិបាល ដើម្បីទប់ស្កាត់ការចម្លងជំងឺកូវីដ-១៩ ជាពិសេសមេរោគបំប្លែងថ្មី ប្រភេទ «អូមីក្រុង» នៅក្នុងភូមិសាស្ត្ររាជធានីភ្នំពេញ។
ក្នុងនោះ អាជ្ញាធររាជធានីភ្នំពេញបានណែនាំឱ្យអាជ្ញាធរខណ្ឌនីមួយៗត្រូវបន្តធ្វើយុទ្ធនាការអប់រំផ្សព្វផ្សាយតាមគ្រប់រូបភាពនៅតាមទីប្រជុំជននានា និងទីផ្សារ ដើម្បីដាស់តឿនអាជីវករនិងអតិថិជនចេញឬចូលផ្សារឱ្យពាក់ម៉ាស បាញ់អាល់កុល វាស់កម្ដៅ និងរក្សាគម្លាតសុវត្ថិភាព និងពិនិត្យបណ្ណចាក់វ៉ាក់សាំង ជាដើម។ បន្ថែមពីនេះ ចំពោះទីតាំងដែលមានការប្រមូលផ្ដុំមនុស្សច្រើន ដូចជា កន្លែងរៀបចំពិធីមង្គលការ ភោជនីយដ្ឋាន ពិធីបុណ្យទាន ឬកន្លែងជួបជុំកម្សាន្តនានា ត្រូវណែនាំឱ្យរៀបចំកៅអីអង្គុយមានគម្លាតសុវត្ថិភាព ដោយមិនឱ្យលើសពី៧នាក់ក្នុងមួយតុ។
ការក្រើនរម្លឹកនេះបានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ចេញសារជាសំឡេងជូនជនរួមជាតិ ពាក់ព័ន្ធស្ថានភាពនៃការរីករាលដាលខ្លាំងនៃមេរោគកូវីដ-១៩ ប្រភេទ «អូមីក្រុង»។ លើសពីនេះ លោកក៏បានអំពាវនាវឱ្យប្រជាពលរដ្ឋកាត់បន្ថយការជួបជុំផឹកស៊ីកម្សាន្តសប្បាយ ដើម្បីធានានូវការរក្សាគម្លាតសុវត្ថិភាព រួមទាំងមង្គលការ និងពិធីបុណ្យសាសនា ជាដើម គួរតែមានការជួបជុំគ្នា «កាន់តែតិច កាន់តែល្អ»។
នៅថ្ងៃនេះ កម្ពុជាបានបន្តរកឃើញអ្នកឆ្លងជំងឺកូវីដ-១៩ ប្រភេទថ្មី «អូមីក្រុង» ចំនួន២៦២នាក់ថែមទៀត ក្នុងនោះ៣៦នាក់ជាករណីនាំចូលពីក្រៅប្រទេស និង២២៦នាក់ជាករណីឆ្លងក្នុងសហគមន៍។
គិតត្រឹមថ្ងៃទី១០ ខែកុម្ភៈនេះ កម្ពុជាមានអ្នកឆ្លងជំងឺកូវីដ-១៩ សរុប១២២ ៤៦៨នាក់ ក្នុងនោះព្យាបាលជាសះស្បើយចំនួន១១៨ ៤២០នាក់ និងស្លាប់ចំនួន៣ ០១៥នាក់៕
