មន្ត្រីមន្ទីរព័ត៌មានខេត្តតាកែវ លើកឡើងថា ក្រុមកម្មកររោងចក្រកាត់ដេរស្បែកជើង និងកាបូប ឈ្មោះ ហាធ័រ (Harter factory) ប្រមាណ៧០នាក់ដែលដួលសន្លប់កាលពីថ្ងៃអង្គារសប្ដាហ៍នេះ អាចបណ្ដាលមកពីធុំក្លិនជ័រក្នុងរោងចក្រ។
ប្រធានមន្ទីរព័ត៌មានខេត្តតាកែវ លោក អៀម ថៃ បានថ្លែងប្រាប់ VOD ថាក្រុមកម្មករដែលបានដួលសន្លប់មានសរុបចំនួន៦៦នាក់ ហើយត្រូវបានបញ្ជូនទៅសម្រាកនៅមន្ទីរពេទ្យនិងមណ្ឌលសុខភាពនៅក្បែរនោះ។ យ៉ាងណា លោកថា មន្ត្រីជំនាញសន្និដ្ឋានថា ការសន្លប់នោះអាចបណ្ដាលមកពីក្លិនជ័រក្នុងរោងចក្រ។
លោកបន្ថែមថា៖ «មកដល់ពេលនេះ យើងមិនទាន់ដឹងនៅឡើយទេថាមានអ្វីដែលប៉ះពាល់ដល់រោងចក្រនោះទេ មិនទាន់មានចំណាត់ការទេ។ ពេទ្យបានសន្និដ្ឋានថា ការដួលសន្លប់ជាច្រើននាក់បន្តៗគ្នានេះបណ្ដាលមកពីមូលហេតុជ័របិទកាបូប ស្បែកជើង ធុំក្លិន»។
ប្រភពដដែលបន្តថា រហូតមកដល់ពេលនេះ ក្រុមកម្មករទាំងនោះមានសុខភាពល្អប្រសើរ ស្របពេលអាជ្ញាធរខេត្តនិងមន្ត្រីជំនាញបន្តតាមដានសុខភាពពួកគាត់បន្ថែមទៀត៕
