កម្ពុជានឹងរៀបចំកិច្ចប្រជុំចង្អៀតរដ្ឋមន្ត្រីការបរទេសអាស៊ាន (AMMR) នៅសប្ដាហ៍ក្រោយ បន្ទាប់ពីខកខានកាលពីខែមុន។
សេចក្ដីជូនដំណឹងរបស់នាយកដ្ឋានព័ត៌មាននៃក្រសួងការបរទេសកម្ពុជា កាលពីថ្ងៃម្សិលមិញ បានឱ្យដឹងថា កិច្ចប្រជុំចង្អៀតនេះនឹងធ្វើឡើងវិញចាប់ពីថ្ងៃទី១៥ ដល់ថ្ងៃទី១៧ ខែកុម្ភៈ ឆ្នាំ២០២២ តាមទម្រង់ចូលរួមផ្ទាល់ និងតាមរយៈប្រព័ន្ធវីដេអូ។ កិច្ចប្រជុំនេះនឹងមានរដ្ឋមន្ត្រីការបរទេសកម្ពុជា លោក ប្រាក់ សុខុន ជាអ្នកដឹកនាំ។
ប្រភពដដែលបន្តថា កិច្ចប្រជុំចង្អៀតនេះនឹងពិនិត្យមើលឡើងវិញនូវការសម្រេចនានារបស់ថ្នាក់ដឹកនាំ នៅក្នុងកិច្ចប្រជុំកំពូលអាស៊ានលើកទី៣៨ និងលើកទី៣៩ ការផ្លាស់ប្ដូរទស្សនៈគ្នាលើមធ្យោបាយ ដើម្បីពង្រឹងបន្ថែមទៀតនូវទំនាក់ទំនងខាងក្រៅជាមួយដៃគូសន្ទនានានា និងការលើកកម្ពស់មជ្ឈភាព សាមគ្គីភាព និងឯកភាពអាស៊ាន ព្រមទាំងពិភាក្សាគ្នាអំពីរបៀបនិងវិធីសាស្ត្រ ដើម្បីកៀរគរកិច្ចខិតខំប្រឹងប្រែងរួមគ្នាក្នុងការកសាងសហគមន៍អាស៊ានមួយដែលកាន់តែធន់រឹងមាំឡើង ប្រកបដោយថាមពល ពោរពេញដោយសន្តិភាព និងវិបុលភាព។
ការកំណត់ពេលកិច្ចប្រជុំជាថ្មីនេះបានធ្វើឡើងបន្ទាប់ពីកិច្ចប្រជុំចង្អៀតរដ្ឋមន្ត្រីការបរទេសអាស៊ាន (AMMR) ដែលគ្រោងធ្វើនៅខេត្តសៀមរាប កាលពីពាក់កណ្ដាលខែមុន ត្រូវបានលើកពេល ដោយសាររដ្ឋមន្ត្រីការបរទេសអាស៊ានមួយចំនួនមានភារកិច្ចនៅក្នុងស្រុកបន្ទាន់ដែលមិនអាចមកប្រជុំបាន។ ក៏ប៉ុន្តែការលើកពេលកិច្ចប្រជុំនេះត្រូវបានគេមើលឃើញថា គឺបន្ទាប់ពីមានដំណើរទស្សនកិច្ចដ៏ចម្រូងចម្រាសរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសមីយ៉ាន់ម៉ា កាលពីដើមខែមករា ឆ្នាំ២០២២៕