មេដឹកនាំគណបក្សសង្គ្រោះជាតិដែលតុលាការរំលាយ លោក កឹម សុខា បន្តផ្ញើសារបង្ហាញពីភាពស្អាតស្អំរបស់លោក អំឡុងពេលដែលតុលាការនៅបន្តបិទផ្លូវធ្វើនយោបាយនៅឡើយ ពាក់ព័ន្ធសំណុំរឿងចោទប្រកាន់ដ៏ចម្រូងចម្រាសពីបទ«ក្បត់ជាតិ»។
លោក កឹម សុខា ត្រូវបានតុលាការដកសិទ្ធិធ្វើនយោបាយអស់រយៈពេលជាង៤ឆ្នាំមកហើយ គិតចាប់ពីថ្ងៃដែលកងកម្លាំងរដ្ឋាភិបាលឆ្មក់ចូលចាប់ខ្លួន ដោយចោទថា លោកគប់គិតជាមួយសហរដ្ឋអាមេរិកចង់ផ្ដួលរំលំរដ្ឋាភិបាល ឬ «ក្បត់ជាតិ» ដែលបទចោទនេះ សាលាដំបូងរាជធានីភ្នំពេញនៅបន្តបើកសវនាការមកដល់បច្ចុប្បន្ន ក្រោយពីពន្យារពេលជាង២ឆ្នាំរួចមក។
លោក កឹម សុខា សរសេរលើទំព័រហ្វេសប៊ុករបស់លោក នៅថ្ងៃសុក្រនេះ ក្រោយជួបឯកអគ្គរាជទូតថ្មីនៃប្រទេសកាណាដាប្រចាំ៣ប្រទេស គឺកម្ពុជា ថៃ និងឡាវ លោកស្រី Sarah Taylor ថាកាណាដាគឺជាប្រទេសមហាអំណាចប្រជាធិបតេយ្យដែលមានសេដ្ឋកិច្ចជឿនលឿន និងជាមិត្តរបស់កម្ពុជា។
លោកបន្តថា ប្រទេសនេះក៏ដូចជាសហភាពអឺរ៉ុប អង់គ្លេស និងសហរដ្ឋអាមេរិកផងដែរ ដែលថា រហូតមកដល់បច្ចុប្បន្ន កម្ពុជានៅតែទទួលបានផលប្រយោជន៍ពីប្រទេសប្រជាធិបតេយ្យទាំងនោះរាប់ពាន់លានដុល្លារក្នុងមួយឆ្នាំៗតាមរយៈទីផ្សារសម្លៀកបំពាក់កាត់ដេរ។
លោក កឹម សុខា បន្តទៀតថា អំណោយផលនេះក៏បង្កើតការងារឱ្យកម្មករខ្មែររាប់លាននាក់មានការងារធ្វើ និងមានប្រាក់ចំណូលដូចសព្វថ្ងៃនេះ និងអាចប្រសើរឡើងទៀតទៅថ្ងៃអនាគត បើកម្ពុជាមានទំនាក់ទំនងនិងសហប្រតិបត្តិការល្អជាមួយគ្នា ដោយគោរពគុណតម្លៃគ្នាទៅវិញទៅមក។
លោក កឹម សុខា បញ្ជាក់ថា៖ «ការសិក្សាស្វែងយល់អំពីលទ្ធិប្រជាធិបតេយ្យ […] ជាមួយមិត្តរបស់កម្ពុជា គឺមិនមែនជាអំពើក្បត់ជាតិ ឬការបង្កមហន្តរាយដល់ជាតិនិងប្រជាពលរដ្ឋឡើយ»។
ដូចគ្នានេះដែរ កាលពីថ្ងៃម្សិលមិញ ក្រោយជំនួបជាមួយឯកអគ្គរដ្ឋទូតសហគមន៍អឺរ៉ុបប្រចាំកម្ពុជា លោក កឹម សុខា អះអាងថា តំណាងសភាពអឺរ៉ុប លោកស្រី Carmen Moreno បានធ្វើការកត់សម្គាល់ចំពោះការពន្យារពេល ការលើកពេល និងការដាក់កម្មវិធីដ៏យឺតយ៉ាវនៃដំណើរការសវនាការលើសំណុំរឿងក្ដីរបស់លោក។
លោកស្រីបញ្ជាក់ថា៖ «ការទំនាក់ទំនងបរទេស ខ្ញុំធ្វើជាមួយមិត្តរបស់កម្ពុជា ដើម្បីផលប្រយោជន៍ខ្មែរ ខ្ញុំមិនដែលនិងមិនធ្វើជាមួយបរទេសណាដែលជាសត្រូវរបស់កម្ពុជានោះឡើយ»។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ធ្លាប់អះអាងថា សំណុំរឿងលោក កឹម សុខា ស្ថិតក្នុងដៃតុលាការ ហើយថាសារជំរុញណាមួយមិនមានឥទ្ធិពលទៅលើតុលាការកម្ពុជាទេ។
លោកថា៖ «សារហ្នឹងជាសាររបស់ឯកជនទេ ពីព្រោះរដ្ឋាភិបាលគ្មានអ្វីពាក់ព័ន្ធជាមួយតុលាការ ហើយទាំងសងខាងគ្មាននរណាដឹងថាតើតុលាការវិនិច្ឆយថាមានទោសឬអត់ទោស អាហ្នឹងជារឿងផ្សេងមួយទៀត»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា បង្ហាញជាទស្សនៈថា សារលោក កឹម សុខា អាចចង់ប្រាប់ថា ការទំនាក់ទំនងរបស់គាត់ជាមួយបរទេសបច្ចុប្បន្ន ក៏ដូចពីអតីតកាលដែរ គឺជាទំនាក់ទំនងដើម្បីប្រយោជន៍ជាតិ ដែលផ្ទុយទៅនឹងបទចោទ។ មួយវិញទៀត លោកថា ជាមុំនយោបាយ ការបង្ហាញវត្តមានញឹកញាប់រវាងមន្ត្រីជាន់ខ្ពស់ប្រទសលោកសេរី ជាមួយមេបក្សប្រឆាំងរូបនេះ ក៏ជាទម្ងន់ផ្នែកការទូតសម្រាប់បក្សកាន់អំណាចពិចារណាកែស្ថានការណ៍នយោបាយនៅកម្ពុជាដែរ បើពុំនោះទេកម្ពុជានឹងបន្តខាតបង់។
លោកថា៖ «នេះជាទម្ងន់មួយដែលឱ្យតុលាការឬក៏បក្សកាន់អំណាចហ្នឹងគិតពិចារណារឿងការចោទប្រកាន់ហ្នឹង ព្រោះវាធ្វើឱ្យខូចដែលគេហៅថាគោលនយោបាយការបរទេស សម្រាប់គណបក្សកាន់អំណាច ក្នុងស្ថានភាពខ្លួនឯងជាអ្នកដឹកនាំប្រទេស»។
យ៉ាងណា លោក ឯម សុវណ្ណរ៉ា បារម្ភថា បើរបត់នយោបាយមិនវិលទៅរកការស្ដារប្រជាធិបតេយ្យឡើងវិញទេ នោះក្រុមប្រទេសលោកសេរីនឹងបន្តដាក់សម្ពាធតាមមធ្យោបាយដែលពួកគេអាចធ្វើបាន ដែលការណ៍នេះ នឹងជំរុញឱ្យមានការប្រឈមកាន់តែខ្លាំងនៃយន្តការក្រាញអំណាចនៅកម្ពុជា៕
