ព្រះអង្គម្ចាស់ នរោត្ដម ចក្រាវុធ បានយាងទៅកាន់ខេត្តព្រះសីហនុ នៅថ្ងៃសុក្រនេះ ដើម្បីរៀបចំរចនាសម្ព័ន្ធគណបក្ស បន្ទាប់ពីព្រះអង្គត្រូវបានអង្គសមាជបោះឆ្នោតជ្រើសតាំងជាព្រះប្រធានគណបក្ស កាលពីថ្ងៃទី៩ ខែកុម្ភៈ ឆ្នាំ២០២២។
អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន បានឱ្យដឹងថា ក្នុងឋានៈព្រះអង្គម្ចាស់ នរោត្ដម ចក្រាវុធ ជាព្រះប្រធានគណបក្សហ្វ៊ុនស៊ិនប៉ិចបន្តពីព្រះបិតា ព្រះអង្គបានប្ដេជ្ញាការពារគណបក្សហ្វ៊ុនស៊ិនប៉ិចឱ្យនៅគង់វង្សជារៀងរហូត។ បន្ថែមលើនេះ ព្រះអង្គក៏បានបន្តអំពាវនាវឱ្យថ្នាក់ដឹកនាំគណបក្សនៅក្នុងខេត្តព្រះសីហនុ ត្រូវប្រមែប្រមូលអ្នករាជានិយម សីហនុនិយម រណឫទ្ធិនិយម រួបរួមសាមគ្គីគ្នា ដើម្បីកសាងគណបក្សហ្វ៊ុនស៊ិនប៉ិចឱ្យទទួលបានជោគជ័យសាជាថ្មី។
ព្រះអង្គម្ចាស់ នរោត្ដម ចក្រាវុធ បុត្រាច្បងរបស់សម្ដេចក្រុមព្រះ នរោត្ដម រណឫទ្ធិ បច្ចុប្បន្នមានព្រះជន្ម៥២ព្រះវស្សា ត្រូវបានអង្គសមាជគណបក្សបោះឆ្នោតជាឯកច្ឆន្ទជ្រើសតាំងជាព្រះប្រធានគណបក្សបន្តពីបិតារបស់ព្រះអង្គ កាលពីថ្ងៃទី៩ ខែកុម្ភៈ ឆ្នាំ២០២២។
គណបក្សរាជានិយមហ្វ៊ុនស៊ិនប៉ិច ត្រូវបានបង្កើតឡើងដោយស្នាព្រះហស្ថរបស់ព្រះបាទសម្ដេច ព្រះនរោត្ដម សីហនុ ព្រះបរមរតនកោដ្ឋ កាលពីឆ្នាំ១៩៧៨។ នៅក្នុងការបោះឆ្នោតជាតិ នីតិកាលទី១ កាលពីឆ្នាំ១៩៩៣ គណបក្សហ្វ៊ុនស៊ិនប៉ិចបានឈ្នះការបោះឆ្នោត ដោយទទួលបានសំឡេង ៥៨អាសនៈ បើធៀបនឹងគណបក្សប្រជាជនកម្ពុជា ទទួលបាន៥១អាសនៈនៅក្នុងរដ្ឋសភា។ ប៉ុន្តែសំឡេងនៃការគាំទ្ររបស់គណបក្សរាជានិយមមួយនេះចេះតែបន្តធ្លាក់ចុះជាហូរហែ រហូតដល់ឆ្នាំ២០០៣ គណបក្សហ៊្វុនស៊ិនប៉ិចទទួលបានសំឡេងត្រឹមតែ២អាសនៈ ខណៈគណបក្សប្រជាជនកម្ពុជាបានកើនឡើងរហូតដល់៩០អាសនៈនៅក្នុងរដ្ឋសភា។
ក្រោយឆ្នាំ២០០៣ គណបក្សហ៊្វុនស៊ិនប៉ិចលែងមានសំឡេងនៅក្នុងរដ្ឋសភារហូតដល់បច្ចុប្បន្ន និងមានភាពប្រេះឆាផ្ទៃក្នុងបក្សផង បានធ្វើឱ្យគណបក្សរាជានិយមមួយនេះត្រូវស្រកស្រុតចុះប្រជាប្រិយភាពជាបន្តបន្ទាប់ ទាំងនៅកម្រិតថ្នាក់ជាតិ និងមូលដ្ឋាន៕