លោកនាយករដ្ឋមន្ត្រី ហ៊ុន សែន ឡើងទទួលពានរង្វាន់សន្តិភាព «ស៊ុកហាក់» លើកទី៥ ដែលផ្ដល់ដោយអង្គការសហព័ន្ធសន្តិភាពសកល (UPF) កូរ៉េខាងត្បូងនៅព្រឹកថ្ងៃសៅរ៍នេះ ខណៈអ្នកវិភាគសង្គមចង់ឃើញកម្ពុជាដោះលែងអ្នកទោសនយោបាយ និងស្តារលទ្ធិប្រជាធិបតេយ្យឡើងវិញ។
នៅក្នុងពិធីមួយដែលរៀបចំនៅប្រទេសកូរ៉េខាងត្បូង ហើយត្រូវបានផ្សាយបន្តផ្ទាល់មកកម្ពុជាតាមរយៈគណនីហ្វេសប៊ុកទូរទស្សន៍ជាតិកម្ពុជានៅថ្ងៃនេះ លោកនាយករដ្ឋមន្ត្រី ហ៊ុន សែន បានថ្លែងថា លោកពិតជាមានអារម្មណ៍រំភើបដែលទទួលបានពានរង្វាន់មួយនេះ។
លោកថា៖ «ខ្ញុំពិតជាមានកិត្តិយស និងសូមថ្លែងអំណរគុណយ៉ាងជ្រាលជ្រៅចំពោះគណៈកម្មាធិការពានរង្វាន់សន្តិភាពស៊ុនហាក់ ដែលបានទទួលស្គាល់នូវស្នាដៃរបស់ខ្ញុំក្នុងការបញ្ចប់សង្គ្រាមស៊ីវិល និងការកសាងបាននូវសុខសន្តិភាពពេញលេញ និងដ៏យូអង្វែងនៅកម្ពុជា»។
លោកបានចាត់ទុកថា ការទទួលបានពានរង្វាន់សន្តិភាពស៊ុនហាក់ឆ្នាំ២០២២ នាពេលនេះ គឺមិនមែនសម្រាប់តែលោកតែម្នាក់ឯងនោះទេ ហើយក៏មានមនុស្សជាច្រើនរូបផ្សេងទៀត ដែលសក្ដិសមនឹងទទួលបាននូវពានរង្វាន់សន្តិភាពនេះ។
ប៉ុន្តែអ្នកវិភាគនយោបាយ និងជាសាស្ត្រាចារ្យផ្នែកកិច្ចការអន្តរជាតិនៃសាកលវិទ្យាល័យ Arizona State University សហរដ្ឋអាមេរិក លោក អៀ សុផល បានលើកឡើងថា លោកនាយករដ្ឋមន្ត្រី ហ៊ុន សែន គួរតែដោះលែងអ្នកទោសនយោបាយ និងស្ដារលទ្ធិប្រជាធិបតេយ្យនៅកម្ពុជាឡើងវិញ ដើម្បីឱ្យស្របគ្នានឹងសារស្រឡាញ់សន្តិភាពរបស់លោក។ លោកថា អ្នកនយោបាយមិនគួរក្លាយជាអ្នកទោសនោះទេ ខណៈពួកគេមិនមែនជាអ្នកទោសនៃសង្គ្រាមនោះដែរ។
លោកបន្តថា៖ «ពួកគេគួរតែមានសេរីភាពក្នុងការប្រកួតនៅលើឆាកនយោបាយ មិនមែនត្រូវគេឃុំឃាំងឡើយ។ ការឃុំឃាំងបានតែរាងកាយសត្រូវរបស់អ្នកប៉ុណ្ណោះ យ៉ាងណាអ្នកមិនអាចបញ្ចប់គំនិតរបស់ពួកគេបានទេ។ គំនិតរបស់ពួកគេនៅតែបន្តស្ថិតនៅក្នុងខ្លួនដដែល»។
លោកសាស្ត្រាចារ្យ អៀ សុផល បានឆ្លើយតបនឹងសាររបស់លោកនាយករដ្ឋមន្ត្រី ហ៊ុន សែន កាលពីម្សិលមិញថា «យើងមិនអាចប្រើសង្គ្រាមដើម្បីបញ្ចប់សង្គ្រាមនោះទេ»។ តែលោកថា អ្វីដែលត្រូវកត់សម្គាល់ ថាតើអ្នកនិយាយនោះមានដែលបង្កអំពើហិង្សាឬទេ? តើពួកគេពាក់ព័ន្ធនឹងការសម្លាប់មនុស្សដែរឬទេ? លោកថា បើមានជាប់ពាក់ព័ន្ធនឹងសកម្មភាពទាំងនោះ វាគឺជាសន្តិភាពអវិជ្ជមាន ខណៈកម្ពុជាបច្ចុប្បន្នកំពុងឈរនៅចំណុចនេះនៅឡើយ។
លោក អៀ សុផល និយាយថា៖ «ទេ! គ្មានកិច្ចសន្ទនាដោយសន្តិវិធីនិងការចរចាឈ្នះឈ្នះនៅកម្ពុជាទេ ពោលគឺមានតែការរំលាយបក្សប្រឆាំង ការចាប់ខ្លួន និងអំពើឃាតកម្មលើអ្នករិះគន់ម្ដងម្កាល»។
ពានរង្វាន់សន្តិភាពស៊ុនហាក់លើកទី៥ ដែលប្រគល់ជូនលោកនាយករដ្ឋមន្រ្តី ហ៊ុន សែន ដោយអង្គការសហព័ន្ធសន្តិភាពសកល (UPF) នៅប្រទេសកូរ៉េខាងត្បូងនេះ គឺសម្រាប់ភាពជាអ្នកដឹកនាំដ៏ខ្ជាប់ខ្ជួនរបស់លោកក្នុងរយៈពេលជាច្រើនឆ្នាំមកនេះ ក្នុងនាមជានាយករដ្ឋមន្រ្តីកម្ពុជា ដែលបានរួមចំណែកដល់ស្ថិរភាព ការអភិវឌ្ឍសេដ្ឋកិច្ច និងសន្តិភាពនៅកម្ពុជា និងតំបន់អាស៊ីអាគ្នេយ៍ទាំងមូល៕
