រថយន្តដឹកកម្មករមួយគ្រឿងបានបើកធ្លាក់ផ្លូវ និងក្រឡាប់ចូលប្រឡាយនៅព្រឹកថ្ងៃទី១២ ខែកុម្ភៈ ដែលបណ្តាលឱ្យកម្មករប្រមាណជា៣០នាក់បានរងរបួសធ្ងន់និងស្រាល ក្នុងនោះមានស្ត្រីពោះធំម្នាក់ផង។
ទំព័រហ្វេសប៊ុករបស់ស្នងការដ្ឋាននគរបាលខេត្តកំពង់ស្ពឺបានចុះផ្សាយថា ហេតុការណ៍នេះបានកើតឡើងនៅចំណុចភូមិពង្រ ឃុំស្រង់ ស្រុកគងសី ខេត្តកំពង់ស្ពឺ។
ប្រភពដដែលបានឱ្យដឹងថា មូលហេតុនៃគ្រោះថ្នាក់ចរាចរណ៍នេះ គឺដោយសាររថយន្ដ១គ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3D-1938 បើកបរដោយឈ្មោះ ឯក សាម៉ន ភេទប្រុស អាយុ ៣៤ ឆ្នាំ រស់នៅភូមិអូតាវាម ឃុំស្រង់ ស្រុកគងពិសី បានរេចង្កូតធ្លាក់ចូលប្រឡាយទឹកដោយមិនដឹងមូលហេតុ។ រថយន្តនេះ បើកបរពីទិសខាងលិចទៅទិសខាងកើត លុះបើកមកដល់ចំណុចខាងលើ បានដាច់ម៉ែត្រចង្កូត បណ្ដាលឱ្យរថយន្ដរេចង្កូតរួចក៏ធ្លាក់ប្រឡាយទឹកដោយខ្លួនឯង។ ក្រោយហេតុការណ៍នេះកើតឡើង តៃកុងរថយន្តបានរត់គេចខ្លួនបាត់។
ហេតុការណ៍គ្រោះថ្នាក់នេះ បានបណ្តាលឱ្យកម្មការិនីដែលជិះលើរថយន្ដចំនួន៣១នាក់បានរងរបួស ក្នុងនោះកម្មការិនី ៣ នាក់រងរបួសធ្ងន់ ដែលក្នុងនោះមានស្រ្តីពោះធំម្នាក់ និង២៨នាក់ទៀតរងរបួសស្រាល។
បច្ចុប្បន្នកំលាំងនគរបាល នៃអធិការដ្ឋាននគរបាលស្រុកគងពិសី និងមន្ត្រីជំនាញខេត្ដបានជួយអន្ដរាគមន៍សម្របសម្រួលនិងបញ្ជូនអ្នករបួសទៅមន្ទីរពេទ្យសង្រ្គោះបន្ទាន់និងចំណាត់ការស្រាវជ្រាវរកបុគ្គលជាតៃកុងរថយន្តយកមកទទួលខុសត្រូវតាមផ្លូវច្បាប់៕
