អាជ្ញាធររាជធានីភ្នំពេញ បានព្រមានចាត់វិធានការដោយគ្មានការលើកលែងទៅលើកូដកម្មបុគ្គលិកណាហ្គាវើលដ៍ ប្រសិនបើពួកគេបន្តការប្រមូលផ្ដុំនៅក្នុងសង្កាត់ទន្លេបាសាក់ ខណ្ឌចំការមន ដែលជាទីតាំងចាស់ក្បែរអគារកាស៊ីណូណាហ្គាវើលដ៍។
យោងតាមលិខិតរបស់រដ្ឋបាលរាជធានីភ្នំពេញ នៅថ្ងៃទី១៥ ខែកុម្ភៈនេះ បានបង្គាប់ឱ្យបុគ្គលិកណាហ្គាវើលដ៍ទៅធ្វើកូដកម្ម ឬប្រមូលផ្ដុំនៅទីលានប្រជាធិបតេយ្យថ្មី ដែលស្ថិតនៅសង្កាត់ឫស្សីកែវ ខណ្ឌឫស្សីកែវវិញ។
លិខិតបានសរសេរថា៖ «ដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងខ្លួនថ្មី ប្រភេទអូមីក្រុង ចូលក្នុងសហគមន៍កាន់តែច្រើនឡើងៗ ក៏ដូចជាធានាបាននូវសន្តិសុខ សណ្ដាប់ធ្នាប់ របៀបរៀបរយសាធារណៈ រដ្ឋបាលរាជធានីភ្នំពេញមិនអនុញ្ញាតដាច់ខាតឱ្យមានការប្រមូលផ្ដុំធ្វើសកម្មភាពបាតុកម្មខុសច្បាប់របស់ក្រុមអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ នៅក្នុងសង្កាត់ទន្លេបាសាក់ ខណ្ឌចំការមនទៀតឡើយ។ ក្នុងករណីរឹងរូស បន្តសកម្មភាពខុសច្បាប់ទៀតនោះ រដ្ឋបាលរាជធានីភ្នំពេញនឹងចាត់វិធានការរដ្ឋបាលនិងវិធានការច្បាប់ដោយគ្មានការលើកលែង»។
បុគ្គលិកក្រុមហ៊ុនកាស៊ីណូណាហ្គាវើលដ៍រាប់រយនាក់បានផ្អាកការជួបជុំគ្នាធ្វើកូដកម្មអស់រយៈពេលជាងមួយសប្ដាហ៍មកហើយ ក្រោយពីរកឃើញកូដករមួយចំនួនបានឆ្លងជំងឺកូវីដ-១៩ និងបន្ទាប់ពីអាជ្ញាធរបានចាប់ខ្លួនតំណាងរបស់ពួកគេចំនួន៣នាក់បន្ថែមទៀតទៅឃុំខ្លួននៅព្រៃស ខណៈកូដករ៤នាក់ទៀតត្រូវបានតុលាការបញ្ជាឱ្យចូលខ្លួនឆ្លើយបំភ្លឺពាក់ព័ន្ធការចោទថា ពួកគេរារាំងការអនុវត្តវិធានការទប់ស្កាត់ជំងឺកូវីដ-១៩៕