សាលាដំបូងរាជធានីភ្នំពេញ បានលើកពេលសវនាការសួរដេញដោលកញ្ញា សេង ធារី ដែលគ្រោងធ្វើនៅថ្ងៃនេះ ទោះបីជាមេធាវីការពារក្ដីឱ្យសកម្មជនបក្សប្រឆាំងដែលត្រូវតុលាការរំលាយផ្សេងទៀត បានជំទាស់ចំពោះការពន្យារពេលសវនាការនេះក៏ដោយ។
សាលាដំបូងរាជធានីភ្នំពេញ គ្រោងនឹងបន្តបើកសវនាការសំណុំរឿងសកម្មជន និងអ្នកគាំទ្រគណបក្សសង្គ្រោះជាតិដែលត្រូវតុលាការរំលាយ ក្នុងសំណុំរឿង «ញុះញង់ និងរួមគំនិតក្បត់» ដោយសវនាការនាថ្ងៃនេះ នឹងសួរដេញដោលកញ្ញា សេង ធារី ដោយមានការដាក់បង្ហាញភស្តុតាងភ្ជាប់ជាមួយផងដែរ។ ប៉ុន្តែសវនាការនេះត្រូវបានមេធាវីការពារក្ដីឱ្យកញ្ញា សេង ធារី សុំពន្យារពេលវិញ ដោយថា រូបលោកជាមេធាវីការពារក្ដីមានជាប់ពាក់ព័ន្ធនឹងអ្នកជំងឺកូវីដ-១៩ មិនអាចចូលរួមសវនាការបាន។
មុននឹងប្រកាសបន្ត ឬពន្យារពេលសវនាការ ប្រធានក្រុមប្រឹក្សាជំនុំជម្រះ លោក រស់ ពិសិដ្ឋ បានសុំយោបល់ពីតំណាងអយ្យការ និងមេធាវីការពារសិទ្ធិឱ្យសកម្មជនបក្សប្រឆាំងផ្សេងទៀត ក្នុងនោះក៏មានលោក សំ សុគង់ ផងដែរ។
យ៉ាងណា ការស្នើរបស់លោក ជូង ជូងី មេធាវីការពារក្ដីឱ្យកញ្ញា សេង ធារី ត្រូវបានតំណាងអយ្យការ លោក សេង ហៀង យល់ស្រប និងសុំឱ្យចៅក្រមពិចារណាលើសំណើសុំពន្យារពេលនេះ ដើម្បីគោរពតាមវិធានសុខាភិបាល និងឱ្យស្របតាមច្បាប់កូវីដ-១៩ផងដែរ។ មួយវិញទៀត លោក ជូង ជូងី ពិតជាជាប់ពាក់ព័ន្ធផ្ទាល់ជាមួយនឹងអ្នកជំងឺកូវីដ-១៩ប្រាកដមែន ហើយលោកក៏ប្រឈមនឹងការឆ្លងដែរ។
ប៉ុន្តែលោក សំ សុគង់ មេធាវីការពារក្ដីឱ្យលោក កាក់ កុម្ភា និងលោក ហេង ច័ន្ទសុធី សកម្មជនបក្សប្រឆាំង បានជំទាស់ ដោយថា ការស្នើសុំពន្យារពេលនេះបានធ្វើឱ្យប៉ះពាល់ដល់សិទ្ធិកូនក្ដីរបស់លោកដែលកំពុងជាប់ពន្ធនាគារ ខណៈសវនាការនេះបានពន្យារពេលអស់រយៈពេលប្រមាណ១ខែទៅហើយនោះ។
មិនមែនតែលោក សំ សុគង់ ទេ ជនជាប់ចោទដែលកំពុងជាប់ពន្ធនាគារព្រៃស គឺលោក កាក់ កុម្ភា ក៏បានលើកឡើងថា ការពន្យារពេលនេះបានធ្វើឱ្យប៉ះពាល់ដល់ពួកគាត់ ខណៈរូបគាត់និងអ្នកផ្សេងទៀតបានជាប់ពន្ធនាគាររយៈពេល២០ខែ១៥ថ្ងៃហើយ ប៉ុន្តែសវនាការជំនុំជម្រះរឿងក្ដីនៅមិនទាន់ចប់នៅឡើយ ហើយពួកគាត់ក៏មានវ័យកាន់តែជរា និងមានជំងឺប្រចាំកាយថែមទៀត។
លោកថា៖ «ដូចមេធាវី សំ សុគង់ ថាពាក្យហ្នឹងអត់ជាក់លាក់ គាត់ថាប៉ះពាល់អ្នកកើតកូវីដ-១៩ ប៉ុន្តែអត់មានលិខិតពេទ្យបញ្ជាក់ទេ។ ទី២ ខ្ញុំចង់ឱ្យលោកចៅក្រមពិចារណា ខ្ញុំជាជនរងគ្រោះ ចោទខ្ញុំទាំងបំពាន វាគ្រាន់តែជារឿងអតីតកាលសោះ។ ខ្ញុំមានជំងឺជាប់ខ្លួន ថ្ងៃមុនទៅសុំថ្នាំលេប គេឱ្យមកលេបហើយ អត់បាត់ទេ»។
លោក កាក់ កុម្ភា បានស្នើទៅចៅក្រមឱ្យពិចារណាបន្តសវនាការ ដោយថា ការចោទប្រកាន់និងឃុំខ្លួនរូបលោកធ្វើឡើងទាំងបំពាននិងអយុត្តិធម៌។
លោកថា៖ «បើសិនជាខ្ញុំស្លាប់ក្នុងពន្ធនាគារ ខ្ញុំមិនសោកស្ដាយនិងស្រក់ទឹកភ្នែកទេ ប៉ុន្តែវាអយុត្តិធម៌សម្រាប់ខ្ញុំពេកហើយ»។
ចំណែកសកម្មជនម្នាក់ទៀត លោក ទុំ ប៊ុនថន លើកឡើងដែរថា បើសិនជានៅក្រៅឃុំនោះ ទោះបីជាតុលាការពន្យារពេលសវនាការបន្តទៀត ក៏មិនអីដែរ ប៉ុន្តែបច្ចុប្បន្ននេះ ពួកគាត់កំពុងជាប់ពន្ធនាគាររយៈពេលជិត២ឆ្នាំ ហើយបើសិនជាពន្យារពេលទៀត លោកថា នឹងធ្វើឱ្យប៉ះពាល់ពួកគាត់។ ករណីនេះ លោកស្នើទៅចៅក្រមឱ្យបើកសវនាការបន្តទៀត ដោយការសួរដេញដោលកញ្ញា សេង ធារី ទុកធ្វើថ្ងៃបន្ទាប់។
ប៉ុន្តែការលើកឡើងរបស់លោក សំ សុគង់ មេធាវីការពារក្ដីសកម្មជនបក្សប្រឆាំង រួមទាំងជនជាប់ចោទដែលកំពុងជាប់ពន្ធនាគារ ត្រូវបានតំណាងអយ្យការ លោក សេង ហៀង ជំទាស់ ដោយថា តុលាការត្រូវអនុវត្តតាមវិធានសុខាភិបាលនិងច្បាប់កូវីដ-១៩។ មួយវិញទៀត លោកថា កូនក្ដីដែលលោកមេធាវី ជូង ជូងី ទើបជួបនិងការពារឱ្យនោះពិតជាមានវិជ្ជមានកូវីដ-១៩ ដែលក្រសួងបានរកឃើញកាលពីថ្ងៃទី១០ ខែកុម្ភៈ។
ក្រោយពីមានភាពចម្រូងចម្រាស និងដកថយទៅពិចារណាប្រហែល៥នាទី ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក រស់ ពិសិដ្ឋ បានសម្រេចពន្យារពេល ដោយសវនាការសំណុំរឿងនេះនឹងបន្តនៅអំឡុងសប្ដាហ៍ទី៤នៃខែកុម្ភៈខាងមុខវិញ ដោយនឹងត្រូវសួរដេញដោលលើកញ្ញា សេង ធារី។
លោកថា៖ «មូលហេតុត្រូវពន្យារពេលថ្ងៃនេះ ត្រូវសួរដេញដោលកញ្ញា សេង ធារី ប៉ុន្តែសំណុំរឿងនេះអវត្តមានមេធាវីហើយ កញ្ញា សេង ធារី ក៏អវត្តមានទៀត។ អ៊ីចឹងដើម្បីឱ្យដំណើរការនីតិវិធីល្អ និងមានយុត្តិធម៌ […] តុលាការត្រូវការស្ដាប់ពីមេធាវី និងកូនក្ដីឱ្យសមស្របជាមួយនឹងនីតិវិធី។ ដូច្នេះ តុលាការសម្រេចនឹងបន្តសវនាការនៅថ្ងៃទី២២ ខែកុម្ភៈ ឆ្នាំ២០២២»។
ក្នុងសំណុំរឿង «ញុះញង់ និងរួមគំនិតក្បត់» ដែលតុលាការបើកសវនាការមានជនជាប់ចោទជាង៤០នាក់។ ក្នុងចំណោមអ្នកជាប់ចោទជាង៤០នាក់នោះ ក៏មានថ្នាក់ដឹកនាំបក្សប្រឆាំងដែលត្រូវបានតុលាការរំលាយ ដូចជា លោក សម រង្ស៊ី, លោកស្រី មូរ សុខហួរ, លោក ឡុង រី ជាដើម ប៉ុន្តែថ្នាក់ដឹកនាំនិងមន្ត្រីទាំងនោះមិនបានចូលរួមឡើយ ដោយមេធាវីការពារក្ដីអះអាងថា អាជ្ញាធរបានហាមឃាត់ពួកគាត់មិនឱ្យចូលមកកម្ពុជា៕
