សាលាដំបូងរាជធានីភ្នំពេញ នៅព្រឹកថ្ងៃពុធសប្ដាហ៍នេះ បានបើកសវនាការបន្តទៀតលើភស្តុតាងដោះបន្ទុករបស់សហមេធាវីការពារក្ដីឱ្យលោក កឹម សុខា ជាប់ពាក់ព័ន្ធបទចោទ «ក្បត់ជាតិ ឬគប់គិតជាមួយរដ្ឋបរទេសចង់ផ្ដួលរំលំរដ្ឋាភិបាល» ដែលមានសហរដ្ឋអាមេរិកនៅក្រោយ និងគាំទ្រឱ្យមានចលនាបដិវត្តន៍ពណ៌។
ប្រាប់ក្រុមអ្នកសារព័ត៌មានក្រោយចេញពីបន្ទប់ជំនុំជម្រះ នៅថ្ងៃទី១៦ ខែកុម្ភៈនេះ លោក ផែង ហេង សហមេធាវីការពារក្ដីរបស់លោក កឹម សុខា បញ្ជាក់ថា សវនាការដែលប្រើពេលពេញមួយព្រឹកនេះ គឺតុលាការដំណើរការក្ដីសួរដេញដោលទៅលើភស្តុតាងដោះបន្ទុក ដែលសហមេធាវីការពារក្ដី ឱ្យជនត្រូវចោទដាក់ជូនតុលាការដើម្បីពិចារណា។
លោកបន្តថា មូលហេតុដែលនាំឱ្យសហមេធាវីការពារក្ដីរបស់លោក កឹម សុខា ដាក់ភស្តុតាងដោះបន្ទុកនេះ ជាការឆ្លើយតបទៅនឹងការចោទប្រកាន់ពីព្រះរាជអាជ្ញា និងសហមេធាវីការពារក្ដីឱ្យដើមបណ្ដឹងរដ្ឋប្បវេណី។
លោកបន្តថា៖ «អ៊ីចឹងយើងដាក់ភស្តុតាង គឺគោលបំណងដោះបន្ទុកហ្នឹងឯង ដោយសារតំណាងអយ្យការគាត់ដាក់ភស្តុតាងមក គឺថាមានបទសន្ទិដ្ឋិភាព បទហិង្សា ឬក៏ប្រទូសរ៉ាយអ៊ីចឹងជាដើម។ ដូច្នេះ យើងបង្ហាញតបទៅវិញថា វាអត់មានប្រទូសរ៉ាយ វាអត់មានហិង្សា ហើយក៏វាអត់មានការត្រូវរ៉ូវជាប្រទេសហ្នឹងដែរ»។
បើតាមលោកមេធាវី ផែង ហេង មកដល់ពេលនេះ តុលាការបានចាក់វីដេអូនៅក្នុងអង្គជំនុំជម្រះដែលជាភស្តុតាងដោះបន្ទុកបាន១៥វីដេអូហើយ គិតចាប់ពីវីដេអូទី៧មក។ លោកបន្តថា នៅសល់២វីដេអូ និងឯកសារដោះបន្ទុកមួយចំនួន នឹងត្រូវសួរដេញដោលនៅក្នុងអង្គជំនុំជម្រះបន្ត សម្រាប់សវនាការថ្ងៃពុធសប្ដាហ៍ក្រោយ។
ដោយឡែក សហមេធាវីការពារក្ដីឱ្យដើមបណ្ដឹងរដ្ឋប្បវេណី លោក គី តិច បានបដិសេធក្នុងការអត្ថាធិប្បាយ ដោយបញ្ជាក់ថា កំពុងជាប់រវល់ ខណៈអ្នកនាំពាក្យតុលាការក្រុងភ្នំពេញ លោក អ៊ី រិន្ទ មិនអាចសុំការបំភ្លឺបាននៅថ្ងៃពុធសប្ដាហ៍នេះ។
យ៉ាងនេះក្ដី លោក ផេង ហេង សហមេធាវីការពារក្ដីឱ្យជនត្រូវចោទ ប្រាប់ក្រុមអ្នកកាសែតនៅមុខតុលាការថា នៅក្នុងអង្គជំនុំជម្រះ សហមេធាវីការពារក្ដីឱ្យដើមបណ្ដឹងរដ្ឋប្បវេណី ក៏បានឡើងជំទាស់ដែរទៅលើត្រង់បតិចរិត ឬសម្រង់សម្ដីដែលត្រូវបានគេកត់ត្រាគ្រប់ម៉ាត់គ្រប់ឃ្លាតាមសំឡេងដើមរបស់ជនត្រូវចោទ ទៅលើភស្តុតាងដោះបន្ទុក។ ប៉ុន្តែការខ្វែងគំនិតគ្នាលើភស្តុតាងដោះបន្ទុកលើនេះមិនធ្ងន់ធ្ងរ ដែលនាំឱ្យសវនាការត្រូវបន្តអូសបន្លាយដូចសវនាការលើកមុនៗទៀតទេ។
អាជ្ញាធរក្រុងភ្នំពេញ បានចូលចាប់ខ្លួនលោក កឹម សុខា ទាំងពាក់កណ្ដាលអធ្រាត្រ កាលពីខែកញ្ញា ឆ្នាំ២០១៧ ក្នុងពេលដែលលោកនៅមានអភ័យឯកសិទ្ធិសភានៅឡើយ។ ការចាប់ខ្លួនដែលធ្វើឡើងដោយតក់ក្រហល់ និងស្ថិតក្រោមការរិះគន់ដ៏ចម្រូងចម្រាសបែបនេះ ត្រូវបានអាជ្ញាធរថ្លែងការពារថា នេះជាបទល្មើសជាក់ស្ដែង និងមានចេតនាចង់ផ្ដួលរំលំរដ្ឋាភិបាល ដែលនាំឱ្យមានអំពើប្រទូសរ៉ាយ ជាពិសេសធ្វើឱ្យខូចប្រយោជន៍ដល់សន្តិសុខជាតិ។
ក្រោយចាប់ខ្លួន លោកត្រូវបានគេបញ្ជូនទៅឃុំនៅពន្ធនាគារត្រពាំងផ្លុងភ្លាមៗ ក្នុងខេត្តត្បូងឃ្មុំ ជាប់ព្រំដែនកម្ពុជា-វៀតណាម។ បន្ទាប់ពីឃុំនៅទីនោះ ពេញ១ឆ្នាំ លោក កឹម សុខា ត្រូវបានបញ្ជូនមកឃុំខ្លួននៅគេហដ្ឋានរបស់លោកវិញ ក្នុងខណ្ឌទួលគោក កាលពីថ្ងៃទី៩ ខែកញ្ញា ឆ្នាំ២០១៨។
នាយករងអង្គការការពារសិទ្ធិមនុស្សលីកាដូ (Licadho) លោក អំ សំអាត យល់ឃើញថា ការព្យាយាមដាក់ភស្តុតាងដោះបន្ទុកនេះ វាជាភារកិច្ចរបស់មេធាវីការពារក្ដីឱ្យជនត្រូវចោទហើយ ប៉ុន្តែការសម្រេចបែបណានោះ វាអាស្រ័យលើការឆន្ទានុសិទ្ធិរបស់ក្រុមប្រឹក្សាជំនុំជម្រះឯណោះទៅវិញទេ។ លោកបន្តថា ការដោះស្រាយតាមបច្ចេកទេសតុលាការ វាមិនខុសទាស់ទេ ប៉ុន្តែបញ្ហានេះគេបានដឹងរួចទៅហើយថាវាជារឿងនយោបាយ ដូច្នេះ បើចង់រំលត់ឱ្យបានលឿន លុះត្រាត្រូវដោះស្រាយតាមផ្លូវនយោបាយដែរ។
លោកបន្តថា៖ «ខ្ញុំមើលឃើញអញ្ចេះទេ ទាំងសហគមន៍ជាតិនិងអន្តរជាតិ គេយល់ថា វាជារឿងនយោបាយដ៏ធំមួយសម្រាប់ស្រុកខ្មែរ។ ដូច្នេះដំណើរការនីតិវិធីនៅតុលាការ វាជារឿងមួយហើយ ប៉ុន្តែអ្វីដែលជាសញ្ញា ហើយអាចបញ្ចប់បានលឿន គឺប្រសិនបើមានការចរចាផ្នែកនយោបាយជាមួយអ្នកនយោបាយ វាអាចនឹងឈានទៅដល់ការបញ្ចប់រឿងក្ដីរបស់ឯកឧត្ដម កឹម សុខា បានលឿនដែរ»។
ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានសម្រេចបន្តសវនាការលើភស្តុតាងដោះបន្ទុកក្នុងរឿងក្ដីព្រហ្មទណ្ឌនេះ នៅព្រឹកថ្ងៃទី២៣ ខែកុម្ភៈ ជាថ្មីទៀត។ ក្នុងពេលអង្គសវនាការកំពុងបន្តជំនុំជម្រះ នៅខាងក្រៅបរិវេណតុលាការឯណេះវិញ គេសង្កេតឃើញកម្លាំងសមត្ថកិច្ចចម្រុះជាច្រើននាក់ត្រូវបានដាក់ពង្រាយដើម្បីរក្សាសន្តិសុខ។ ក្នុងពេលជាមួយគ្នានោះដែរ អ្នកគាំទ្រនិងអ្នកនយោបាយពីបក្សផ្សេងដែលមានឈាមជ័រជាអ្នកនយោបាយរបស់គណបក្សសង្រ្គោះជាតិដែលត្រូវបានតុលាការរំលាយ ក៏បានចូលរួមឃ្លាំមើលពីការជំនុំជម្រះនេះដែរ។ បើទោះជាបែបណា ការបន្តតាមដានពីសវនាការនេះ ពួកគេដែលនៅខាងក្រៅបរិវេណតុលាការរក្សាភាពស្ងៀមស្ងាត់ និងមិនមានអំពើហិង្សាកើតឡើងទេ៕
