ក្រុមអ្នកជំនាញនៃអង្គការសហប្រជាជាតិទទួលបន្ទុកសិទ្ធិមនុស្ស ចាត់ទុកវិធានការថ្មីដែលអាជ្ញាធរប្រើដើម្បីទប់ស្កាត់ការធ្វើកូដកម្មរបស់ក្រុមកូដករណាហ្គាវើលដ៍ថាជា «រឿងមិនសមហេតុផល» ដោយថា អាជ្ញាធរមិនគួរប្រើច្បាប់មួយសម្រាប់អនុវត្តទៅលើពួកគេក្នុងរូបភាពខុសគ្នាទៅនឹងសាធារណជនផ្សេងទៀតនោះឡើយ។
ក្រុមអ្នកជំនាញផ្នែកសិទ្ធិមនុស្ស នៅថ្ងៃទី១៦ ខែកុម្ភៈ ឆ្នាំ២០២២ ម្សិលមិញ បានរិះគន់ចំពោះការចាត់វិធានការពីសំណាក់អាជ្ញាធរដែលតម្រូវឱ្យក្រុមកូដករកាស៊ីណូណាហ្គាវើលដ៍បន្តធ្វើចត្តាឡីស័កក្នុងក្របខណ្ឌការពារជំងឺកូវីដ-១៩។ អ្នកជំនាញទាំងនោះលើកឡើងថា អាជ្ញាធរមិនត្រូវយកវិធានការសុខភាពសាធារណៈ ជាសម្អាងក្នុងការបង្រ្កាបលើសកម្មភាពតវ៉ាស្របច្បាប់និងដោយសន្តិវិធីនោះទេ។
ក្រុមអ្នកជំនាញបានលើកឡើងថា ពួកគេបានឃើញនៅមានភាពមិនស៊ីសង្វាក់គ្នាជារួម និងកង្វះតម្លាភាពក្នុងវិធានការគ្រប់គ្រងជំងឺកូវីដ-១៩របស់រដ្ឋាភិបាលកម្ពុជា។
អ្នកជំនាញបន្តថា ក្នុងករណីនេះ អាជ្ញាធរហាក់ដូចជាបានប្រឹងប្រែងរារាំងសកម្មភាពតវ៉ាដោយសន្តិវិធីនិងស្របច្បាប់របស់ក្រុមអ្នកតវ៉ា ដោយយកវិធានការសុខាភិបាលមកសម្អាង។ យ៉ាងណា ក្រុមអ្នកជំនាញថា អាជ្ញាធរមិនអាចមានច្បាប់មួយសម្រាប់ប្រើលើក្រុមកូដករ និងច្បាប់មួយទៀតសម្រាប់សាធារណជនទូទៅនោះទេ។
ក្រុមអ្នកជំនាញក៏បានលើកឡើងទៀតថា៖ «របៀបដែលអាជ្ញាធរបានដាក់កំហិតលើអ្នកធ្វើកូដកម្មស្របច្បាប់និងដោយសន្តិវិធី ដោយផ្អែកលើការព្រួយបារម្ភអំពីសុខភាពសាធារណៈបែបនេះ គឺមិនសមហេតុផល មិនចាំបាច់ និងមិនសមាមាត្រក្នុងកាលៈទេសៈនេះទេ។ អាជ្ញាធរគួរតែចូលរួមក្នុងការសន្ទនាដោយសន្តិវិធី និងមានភាពអត់ធ្មត់ជាមួយក្រុមកូដករ ជាជាងការប្រើវិធានការធ្ងន់ធ្ងរទាំងនោះ»។
ក្រុមអ្នកជំនាញឯករាជ្យដែលត្រូវបានតែងតាំងដោយក្រុមប្រឹក្សាសិទ្ធិមនុស្ស បានសម្ដែងការព្រួយបារម្ភថា ជាងមួយសប្ដាហ៍បន្ទាប់ពីការបង្ខំឱ្យធ្វើតេស្តរកមេរោគកូវីដ-១៩ ក្រុមកូដកររាប់រយនាក់បានផ្ដល់ព័ត៌មានថា ខ្លួននៅមិនទាន់ទទួលបានលទ្ធផលតេស្ត ឬភាពច្បាស់លាស់អំពីពេលវេលាដែលពួកគេនឹងត្រូវបានអនុញ្ញាតឱ្យបញ្ចប់ចត្តាឡីស័កនោះទេ។
ការរិះគន់នេះ ក្រោយពេលរដ្ឋបាលរាជធានីភ្នំពេញ នៅថ្ងៃទី១៥ ខែកុម្ភៈ បានចេញសេចក្ដីជូនដំណឹងណែនាំក្រុមកូដករឱ្យផ្លាស់ទៅធ្វើកូដកម្មនៅទីតាំងក្រៅទីប្រជុំជនទីក្រុងភ្នំពេញ ដែលឆ្ងាយពីការមើលឃើញនិងស្ដាប់ឮរបស់កាស៊ីណូណាហ្គាវើលដ៍ ដោយមិនអនុញ្ញាតឱ្យកូដករធ្វើសកម្មភាពតវ៉ានៅលើទីតាំងចាស់នោះឡើយ។ លើសពីនេះ អាជ្ញាធរថែមទាំងព្រមានចាត់វិធានការច្បាប់ដោយគ្មានការលើកលែង ប្រសិនបើពួកគេបំពានសេចក្ដីជូនដំណឹងនេះ។
ទោះបីជាយ៉ាងនេះក្ដី ក្រុមអ្នកជំនាញបាននិយាយថា បទបញ្ជាចុងក្រោយនេះមិនស្របនឹងច្បាប់សិទ្ធិមនុស្សអន្តរជាតិនោះទេ។
កូដកម្មដែលបានចាប់ផ្ដើមតាំងពីថ្ងៃទី១៨ ខែធ្នូ ឆ្នាំ២០២១ ត្រូវបានផ្អាកនៅដើមខែកុម្ភៈ ក្រោយពេលអាជ្ញាធរបានប្រកាសថាមានកូដករម្នាក់ត្រូវបានរកឃើញថាមានវិជ្ជមានកូវីដ-១៩ បើទោះបីជាបុគ្គលនោះមិនមានវត្តមាននៅទីតាំងធ្វើកូដកម្មប្រមាណពីរសប្ដាហ៍មុនពេលដែលគាត់មានវិជ្ជមានកូវីដ-១៩ក៏ដោយ៕
សូមលោកអ្នកនាងរង់ចាំអាននិងស្ដាប់ព័ត៌មានពិស្ដាររអំពីរឿងនេះនាពេលបន្តបន្ទាប់៕