ក្រុមស្ត្រីថ្ងៃសុក្រប្រមាណ១០នាក់បាននាំគ្នាស្វែងរកកិច្ចអន្តរាគមន៍ពីស្ថានទូតជប៉ុន និងស្ថានទូតអាមេរិកប្រចាំនៅកម្ពុជា ជួយជំរុញទៅរដ្ឋាភិបាលដោះលែងស្វាមីពួកគេ ដើម្បីឱ្យស្វាមីរបស់ពួកគេអាចមានសិទ្ធិសេរីភាពក្នុងការចូលរួមជីវភាពនយោបាយឡើងវិញ។
ការស្វែងរកកិច្ចអន្តរាគមន៍នេះបានធ្វើឡើងតាមការប្រមូលផ្ដុំដាក់ញត្តិនៅស្ថានទូតទាំងពីរនេះ នៅថ្ងៃទី១៨ ខែកុម្ភៈ ឆ្នាំ២០២២ ក្រោយពីស្វាមីរបស់ពួកគេបានជាប់ពន្ធនាគារអស់រយៈពេលជិត២ឆ្នាំមកហើយ។
ប្រាប់អ្នកសារព័ត៌មាននៅមុខស្ថានទូតជប៉ុនប្រចាំនៅកម្ពុជា អ្នកស្រី ព្រំ ចាន់ថា ជាភរិយាលោក កាក់ កុម្ភា សកម្មជនបក្សសង្គ្រោះជាតិដែលត្រូវតុលាការរំលាយ បាននិយាយថា ការដែលពួកគាត់ទៅដាក់ញត្តិនៅស្ថានទូតជប៉ុននេះ ដោយសារតែថ្មីៗនេះ ស្ថានទូតជប៉ុនបានផ្ដល់ជំនួយនិងគាំទ្រដល់ការបោះឆ្នោតនៅកម្ពុជាក្នុងឆ្នាំ២០២២ និង២០២៣ ខាងមុខ។
អ្នកស្រីបន្តថា កម្ពុជានៅមិនទាន់គោរពសិទ្ធិមនុស្ស និងបើកលំហលទ្ធិប្រជាធិបតេយ្យនៅឡើយ ដោយសារសកម្មជននយោបាយគណបក្សប្រឆាំងជាច្រើននាក់កំពុងជាប់ពន្ធនាគារ ក្រោមការចោទប្រកាន់របស់តុលាការដែលបានធ្វើទាំងបំពាន ខណៈគ្រួសាររបស់គាត់និងអ្នកផ្សេងៗទៀតមិនបានធ្វើខុសអ្វីសោះ។
អ្នកស្រី ព្រំ ចាន់ថា បង្ហាញក្ដីសង្ឃឹមថា ស្ថានទូតជប៉ុន និងសហរដ្ឋអាមេរិក នឹងជំរុញទៅរដ្ឋាភិបាលកម្ពុជាឱ្យគោរពសិទ្ធិមនុស្ស និងដោះលែងសកម្មជននយោបាយនិងសង្គមដែលកំពុងជាប់ពន្ធនាគារទាំងអយុត្តិធម៌វិញ និងឈប់គំរាមកំហែងប្រជាពលរដ្ឋបន្តទៀត។
អ្នកស្រីថា៖ «អ៊ីចឹងខ្ញុំចង់ឱ្យគាត់ជួយ [ស្ថានទូតជប៉ុន និងអាមេរិក] ដើម្បីឱ្យគាត់ពិតប្រាកដ ព្រោះគាត់ក៏ជាម្ចាស់ហត្ថលេខីនៃកិច្ចព្រមព្រៀងទីក្រុងប៉ារីស ២៣ តុលា ១៩៩១។ អ៊ីចឹងគាត់ត្រូវធ្វើម៉េចឱ្យប្រទេសកម្ពុជាមានប្រជាធិបតេយ្យពិតប្រាកដ មិនមែនចាប់ចងដាក់គុក ឱ្យតែដឹងរឿងសង្គម ចេះដឹងរឿងប្រទេសជាតិ សូម្បីក្មេងមិនទាន់គ្រប់អាយុក៏ចាប់ដាក់គុកដែរ អ៊ីចឹងវាខុសច្បាប់ទាំងស្រុង អត់មានប្រជាធិបតេយ្យពិតប្រាកដទេ»។
ជារឿយៗ ក្រុមស្ត្រីថ្ងៃសុក្រ ដែលសុទ្ធសឹងតែជាភរិយាសកម្មជនគណបក្សសង្គ្រោះជាតិត្រូវបានតុលាការរំលាយ តែងតែនាំគ្នាដើរដាក់ញត្តិនៅតាមស្ថានទូតប្រទេសលោកសេរីមួយចំនួនប្រចាំកម្ពុជា ដើម្បីឱ្យស្ថានទូតទាំងនោះជួយអន្តរាគមន៍ទៅរដ្ឋាភិបាលកម្ពុជាឱ្យគោរពសិទ្ធិនិងទម្លាក់ចោលបទចោទប្រកាន់ហើយដោះលែងគ្រួសារពួកគេ។
បើតាមការអះអាងរបស់អ្នកស្រី ព្រំ ចាន់ថា មន្ត្រីស្ថានទូតទាំងពីរនោះបានទទួលយកញត្តិរបស់ពួកគាត់ហើយ និងបានសន្យាបញ្ជូនទៅកាន់រដ្ឋាភិបាលរបស់ពួកគេបានដឹង។
ប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន ចាត់ទុកការដាក់ញត្តិរបស់ក្រុមស្ត្រីទាំងនោះថា គ្រាន់តែជាសិទ្ធិសេរីភាពបញ្ចេញមតិដែលមាននិន្នាការនយោបាយប៉ុណ្ណោះ ប៉ុន្តែសកម្មភាពនេះមិនអាចជួយអ្វីបានឡើយ។
លោកថា៖ «ដូច្នេះ ញត្តិនេះមិនមានឥទ្ធិពលអីលើតុលាការទេ ត្បិតតុលាការជាស្ថាប័នដែលមានអំណាចឯករាជ្យ ដោយគ្មានស្ថាប័នណាមួយទៅដាក់សម្ពាធនិងលូកលាន់បានឡើយ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ត្បិតស្ថានទូតទាំងនោះមិនមានសិទ្ធិក្នុងការសម្រេចក៏ពិតមែន ប៉ុន្តែស្ថាប័នទូតនៃប្រទេសលោកសេរីមានតួនាទីត្រួតពិនិត្យការអនុវត្តយុត្តិធម៌សង្គម និងការរំលោភសិទ្ធិមនុស្ស ខណៈកម្ពុជាក៏បានផ្ដល់សច្ចាប័ន ក៏ដូចជាផ្ដល់អនុសាសន៍នានា ដើម្បីកំណែទម្រង់ប្រព័ន្ធយុត្តិធម៌ដែលមានការចូលរួមពីបណ្ដាប្រទេសផ្សេងផងដែរ។
លោកបន្តថា បើសិនជាស្ថានទូតទាំងអស់នោះទទួលបានញត្តិឬរបាយការណ៍ពាក់ព័ន្ធនឹងការរំលោភសិទ្ធិនិងអំពើអយុត្តិធម៌ដែលនៅតែកើតមាន នោះកម្ពុជាអាចនឹងទទួលរងសម្ពាធបន្ថែមទៀតពីសហគមន៍អន្តរជាតិ។
លោកថា៖ «បើសិនជាបញ្ហាអំពើអយុត្តិធម៌ទាំងអស់ចំណុចទាំងអស់នេះ គឺជាមូលដ្ឋានថ្មីបន្ថែម ដែលពួកគេនឹងលើកឡើងនៅក្នុងកិច្ចប្រជុំនៅទីក្រុងហ្សឺណែវ។ អ៊ីចឹងបញ្ហាទាំងអស់នេះហើយដែលអន្តរជាតិមានការលូកដៃនិងលើកឡើងនៅក្នុងកិច្ចប្រជុំទាំងអស់ហ្នឹង ដែលធ្វើឱ្យប៉ះពាល់មុខមាត់រដ្ឋាភិបាលកម្ពុជាក្នុងឆាកអន្តរជាតិ»។
សកម្មជនគណបក្សសង្គ្រោះជាតិដែលត្រូវតុលាការរំលាយកាលពីឆ្នាំ២០១៧ ត្រូវបានចៅក្រមសាលាដំបូងរាជធានីភ្នំពេញ ចោទប្រកាន់ពីបទ «ញុះញង់ និងរួមគំនិតក្បត់» ពាក់ព័ន្ធនឹងការគាំទ្រដំណើរវិលត្រលប់របស់លោក សម រង្ស៊ី និងមន្ត្រីបក្សប្រឆាំងផ្សេងទៀត៕
