មេដឹកនាំគណបក្សសង្គ្រោះជាតិដែលតុលាការរំលាយ លោក កឹម សុខា បានបង្ហាញសារអំពីគុណតម្លៃមេដឹកនាំមិនរត់ចោលពលរដ្ឋ ខណៈលោកបន្តប្រើប្រាស់សេរីភាពតិចតួចក្រោមបម្រាមតុលាការ ចុះចែកស្បៀងអាហារជូនដល់ប្រជាពលរដ្ឋក្រីក្រជាថ្មីទៀតនៅខេត្តមួយចំនួន។
លោក កឹម សុខា ត្រូវបានតុលាការដកសិទ្ធិធ្វើនយោបាយជាង៤ឆ្នាំមកហើយ គិតចាប់ពីថ្ងៃចាប់ខ្លួននាថ្ងៃទី៣ ខែកញ្ញា ឆ្នាំ២០១៧ ក្រោមបទចោទថា គុបគិតជាមួយសហរដ្ឋអាមេរិកចង់ផ្ដួលរំលំរដ្ឋាភិបាល ដែលបច្ចុប្បន្ន សំណុំរឿងចោទប្រកាន់ដ៏ចម្រូងចម្រាសនេះ សាលាដំបូងរាជធានីភ្នំពេញបានបើកការជំនុំជម្រះឡើងវិញ១សប្ដាហ៍ម្ដង ក្រោយពីពន្យារពេលជាង២ឆ្នាំរួចមក ដោយសារបញ្ហាកូវីដ-១៩។
លោក កឹម សុខា សរសេរសារលើហ្វេសប៊ុករបស់លោកកាលពីថ្ងៃអាទិត្យថា ដោយដំណើរការសវនាការនៅតុលាការត្រូវបានពន្យារនិងពន្យឺតនោះ សិទ្ធិរបស់លោកបានត្រឹមជួបអ្នកការទូតនៃប្រទេសជាមិត្ត និងបានបន្តចុះសួរសុខទុក្ខ និងផ្ដល់ជំនួយមនុស្សធម៌នាប៉ុន្មានថ្ងៃមកនេះ ជូនដល់ប្រជាពលរដ្ឋមួយចំនួននៅតាមមូលដ្ឋាន ដូចជា នៅរាជធានីភ្នំពេញ ខេត្តព្រៃវែង ត្បូងឃ្មុំ ក្រចេះ ស្ទឹងត្រែង និងរតនគីរី ។
លោកបញ្ជាក់ថា ក្នុងនាមជាអ្នកដឹកនាំ ទោះបីជាមានលទ្ធភាពតិចតួច សិទ្ធិសេរីភាពនៅមានកម្រិតក្ដី តែលោកនៅតែយល់ថា៖ «ការឈរជើងក្នុងមាតុភូមិ និងផ្សារភ្ជាប់ជិតស្និទ្ធជាមួយប្រជាពលរដ្ឋ ដោយមិនរត់ចោលពួកគាត់នោះ គឺជាជម្រើសដ៏ល្អបំផុត»។
តាមរយៈសកម្មភាពនេះ លោកថា ពលរដ្ឋខ្មែរនិងប្រទេសជាមិត្តល្អរបស់កម្ពុជានៅតែគាំទ្រគោលជំហរនិងផ្ដល់តម្លៃដល់លោក ដែលការណ៍នេះលោកថា ដោយសារការលះបង់ ការព្យាយាមអត់ធ្មត់ដោយអហិង្សា រក្សានូវគោលជំហរប្រាកដ តម្កល់ផលប្រយោជន៍ជាតិ និងប្រជាពលរដ្ឋជាធំ។
បន្ថែមពីនេះ លោក កឹម សុខា បានរិះគន់ទាំងមិនបញ្ចេញឈ្មោះថា៖ «មិនមែនដោយការធ្វើសកម្មភាពគ្មានគោលដៅច្បាស់លាស់ ទូងស្គរពីចម្ងាយ បង្កើតព្រឹត្តិការណ៍រុញច្រានឱ្យប្រជាពលរដ្ឋរងគ្រោះជំនួសនោះឡើយ»។
តែយ៉ាងណា ក្រោយពីលោក កឹម សុខា ត្រូវបានចាប់ឃុំខ្លួន និងមានការរំលាយគណបក្សប្រឆាំងរួចមក មេដឹកនាំសំខាន់ៗភាគច្រើនរបស់គណបក្សនេះបានគេចខ្លួនទៅក្រៅប្រទេស ក្នុងនោះមាន លោកស្រី មូរ សុខហួរ លោក អេង ឆៃអ៊ាង និងលោក សម រង្ស៊ី ជាដើម ។
បច្ចុប្បន្ន ពួកគេទាំងនោះកំពុងធ្វើសកម្មភាពនយោបាយតាមបណ្ដាញសង្គមប្រឆាំងនឹងសាលដីការំលាយនេះ ដែលបញ្ហានេះធ្វើឱ្យអ្នកគាំទ្រខ្លះនៅក្នុងប្រទេសត្រូវបានចាប់ឃុំខ្លួនជាបន្តបន្ទាប់ តែអ្នកខ្លះត្រូវបានដោះលែងវិញក្រោយអនុវត្តទោសចប់៕