ស្ថានទូតចិនប្រចាំនៅប្រទេសអ៊ុយក្រែន នៅថ្ងៃអង្គារនេះ បានជូនដំណឹងដល់ពលរដ្ឋនិងធុរកិច្ចទាំងឡាយរបស់ខ្លួនឱ្យចៀសវាងទៅកាន់តំបន់អស្ថិរភាពទាំងឡាយក្នុងប្រទេសអ៊ុយក្រែន ស្របពេលដែលប្រទេសមួយនេះបច្ចុប្បន្នកំពុងតែស្ថិតនៅក្នុងវិបត្តិជាមួយប្រទេសរុស្ស៊ី។
ទោះជាយ៉ាងណា ស្ថានទូតចិនពុំបានណែនាំពលរដ្ឋខ្លួនឱ្យពិចារណាចាកចេញពីប្រទេសអ៊ុយក្រែន ដូចអ្វីដែលប្រទេសជាច្រើនផ្សេងទៀតបានធ្វើនោះទេ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ស្ថានទូតចិនដែលបានឱ្យដឹងនៅក្នុងសេចក្ដីថ្លែងការណ៍មួយនៅលើគេហទំព័ររបស់ខ្លួនថា៖ «បច្ចុប្បន្ននេះ ស្ថានភាពនៅភាគខាងកើតអ៊ុយក្រែន ស្ថិតនៅក្នុងភាពមិនច្បាស់លាស់»។
សេចក្ដីថ្លែងការណ៍ដដែលបន្ថែមថា៖ «ស្ថានទូតចិនប្រចាំនៅអ៊ុយក្រែន សូមធ្វើការក្រើនរម្លឹកដល់ពលរដ្ឋនិងសហគ្រាសរបស់ចិនទាំងអស់នៅអ៊ុយក្រែន ឱ្យមានការយកចិត្តទុកដាក់ខ្ពស់លើសេចក្ដីជូនដំណឹងអំពីសុវត្ថិភាពនានា និងចៀងវាងទៅកាន់តំបន់អស្ថិរភាពទាំងឡាយ»។
ទាក់ទិនទៅនឹងវិបត្តិនៅអ៊ុយក្រែន ប្រទេសមួយចំនួនដែលរួមទាំងសហរដ្ឋអាមេរិក អង់គ្លេស និងអាល្លឺម៉ង់ កាលពីដើមខែនេះ ក៏បានធ្វើការណែនាំដល់ពលរដ្ឋរបស់ពួកគេឱ្យត្រៀមចាកចេញពីអ៊ុយក្រែនផងដែរ ស្របពេលដែលមានក្ដីបារម្ភនៃការឈ្លានពានពីសំណាក់រុស្ស៊ីលើប្រទេសមួយនេះ។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេបានចាប់ផ្ដើមកើនឡើង ខណៈរុស្ស៊ីបានបន្តព្យាយាមដាក់សម្ពាធមកលើអ៊ុយក្រែន តាមរយៈចលនាទ័ពរបស់ខ្លួននៅក្បែរព្រំដែនរបស់ប្រទេសមួយនេះ។
ទោះជាយ៉ាងណា រុស្ស៊ី កាលពីពេលកន្លងទៅ ធ្លាប់បានបដិសេធគម្រោងរៀបចំការវាយប្រហារណាមួយលើអ៊ុយក្រែន ខណៈដែលពួកគេបានលើកឡើងថា កងទ័ពទាំងឡាយរបស់ពួកគេគឺមិនបានបង្កការគំរាមកំហែងដល់នរណាម្នាក់ឡើយ៕
