មេដឹកនាំបក្សកាន់អំណាច បង្ហាញជំហរជាថ្មីទៀតលើយន្តការបន្តបិទខ្ទប់ការវិលត្រលប់មកប្រឡូកក្នុងឆាកនយោបាយវិញរបស់លោក សម រង្ស៊ី បើគ្មានការ«ប៉ះប៉ូវ»ណាមួយត្រូវបានធ្វើឡើងដើម្បីស្ដារកិត្តិយសគ្រួសារលោកទេនោះ។
ការថ្លែងរបស់លោកនាយករដ្ឋមន្ត្រី ហ៊ុន សែន បែបនេះ ធ្វើឡើងក្នុងពិធីបើកការដ្ឋានសាងសង់ស្ថានីយទឹកកខ្វក់មួយកន្លែង ក្នុងរាជធានីភ្នំពេញ នាព្រឹកថ្ងៃអង្គារនេះ។
លោកនាយករដ្ឋមន្ត្រី ហ៊ុន សែន ថ្លែងថា កន្លងទៅ មានមិត្តបរទេសមួយចំនួនធ្លាប់លើកឡើងពីការសម្របសម្រួលឱ្យមានការសន្ទនានយោបាយ ដើម្បីបង្រួបបង្រួមជាតិ។ ប៉ុន្តែលោកថា ការប្រមាថភរិយានិងកូនរបស់លោកនាពេលកន្លងមក ជាការឈឺចាប់មួយដែលមិនអាចសន្ទនានយោបាយឡើងវិញបានទេ បើគ្មានការប៉ះប៉ូវណាមួយទេនោះ។
លោកថា៖ «ខ្ញុំបានប្រាប់មេដឹកនាំប្រទេសមួយចំនួនថា ខ្ញុំអត់ទទួលយកបានទេអាហ្នឹង រឿងចង់ទៅជាស្អីទៅៗ តែរឿងកន្លែងហ្នឹងមួយ បើអ្នកឯងមិនប៉ះប៉ូវឱ្យខ្ញុំ ទោះបីជាតិក្រោយចាំជាតិ ក៏ត្រូវតែប្រយុទ្ធគ្នានៅពេលនោះ […] ខ្មែរក៏ដោយ បរទេសក៏ដោយ កុំនិយាយជាមួយខ្ញុំ ចលនាឱ្យខ្ញុំបង្រួបបង្រួមជាមួយអាក្រុមប្រមាថប្រពន្ធនិងកូនខ្ញុំឱ្យសោះ»។
បើទោះបីជាការថ្លែងរបស់នាយករដ្ឋមន្ត្រីនៅពេលនេះ មិនបានបញ្ចេញឈ្មោះអ្នកប្រមាថភរិយានិងកូនរបស់លោកក៏ដោយ ប៉ុន្តែលោកទំនងជាសំដៅដល់ស្ថាបនិកគណបក្សសង្គ្រោះជាតិ លោក សម រង្ស៊ី ដែលកំពុងនិរទេស ដោយលោកព្រលយពាក្យថា នៅកម្ពុជាមិនទាំងហ៊ានធ្វើអីផង ទម្រាំទៅដល់ក្រៅប្រទេសទៀតចង់នាំកម្លាំងមកចាប់អ្នកកំពុងគ្រប់គ្រងអំណាច។
VOD មិនអាចសុំការបញ្ជាក់ពីលោក សម រង្ស៊ី បានទេ នៅថ្ងៃអង្គារនេះ។
លោកនាយករដ្ឋមន្ត្រី ហ៊ុន សែន អំឡុងខែឧសភា ឆ្នាំ២០១៦ ពោលគឺមុនគណបក្សសង្គ្រោះជាតិត្រូវបានតុលាការរំលាយ ធ្លាប់ប្រតិកម្មខ្លាំងៗទៅករណីនេះម្ដងហើយ ដោយព្រមានថា នឹងមិនឱ្យគណបក្សប្រឆាំង បានសុខនោះទេ ហើយប្រកាសពេលនោះថានឹងកំដរបក្សប្រឆាំងដល់ទីបញ្ចប់។
លោកថា៖ «នេះជារឿងអាណោចអាធ័ម ប៉ុន្តែខ្ញុំអត់នឹកថាអាចធ្វើអំពើថោកទាបបែបនេះបាន អត់នឹកដល់! ដូច្នេះខ្ញុំក៏ត្រូវប្រកាន់ឥរិយាបថមួយ ព្រោះខ្ញុំបាននិយាយហើយ បើអ្នកឯងមិនឱ្យខ្ញុំសុខ ខ្ញុំក៏មិនឱ្យអ្នកឯងសុខដែរ»។
អ្នកវិភាគសង្គម លោក គឹម សុខ មើលឃើញថា សាររម្លឹករឿងចាស់របស់មេដឹកនាំបក្សកាន់អំណាចនេះ ជា ល្បែងនយោបាយ យកបុព្វហេតុជាតិធ្វើជាឧបករណ៍ការពារអំណាចបុគ្គល។ លោកថា មួយវិញទៀត សារនេះក៏ជាយុទ្ធសាស្ត្របង្វែរការចាប់អារម្មណ៍រឿងលោក កឹម សុខា ដែលអន្តរជាតិកំពុងជំរុញឱ្យផ្ដល់សេរីភាពពេញលេញឡើងវិញ ខណៈការបោះឆ្នោតជិតមកដល់។
លោកថា៖ «ជ្រុងមួយទៀត ទំនងជាលោក ហ៊ុន សែន ប្រឹងឆ្លើយនឹងតំណាងប្រទេសសេរី ប្រជាធិបតេយ្យនានាដែលជំរុញយ៉ាងខ្លាំង ចង់ឃើញឱ្យមានការប្រកួតប្រជែងសមរម្យមួយសម្រាប់ការបោះឆ្នោតឆ្នាំ២០២២ និងឆ្នាំ២០២៣ ដែលមានការចូលរួមពីពួកអ្នកនយោបាយប្រឆាំងដែលមានសក្ដានុពលនៅកម្ពុជា»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មើលឃើញថា តាមរយៈសារនយោបាយនេះ ពាក្យថា «ប៉ះប៉ូវ» អាចជាការបោះដៃទៅក្រុមលោក សម រង្ស៊ី ឱ្យឆ្លើយតបជាវិជ្ជមាននូវលក្ខខណ្ឌណាមួយ ដែលលោកគិតថា ជាសិល្បៈនយោបាយ ដើម្បីកេងចំណេញពីគ្នាទៅវិញទៅមក។
ប៉ុន្តែលោកថា សិល្បៈនយោបាយបែបនេះបានផ្ដល់គំរូមិនល្អដល់ក្មេងជំនាន់ក្រោយ ព្រោះបានភ្ជាប់បញ្ហាក្រុមគ្រួសារធំជាងប្រយោជន៍ជាតិ ដែលលោកថា បញ្ហានេះបានធ្វើឱ្យប្រទេសជាតិមិនអាចរើខ្លួនរួចពីអំពើពុករលួយ ការរំលោភដីធ្លី និងបញ្ហាសិទ្ធិមនុស្ស ដូចប៉ុន្មានឆ្នាំមកនេះ។
លោកផ្ដល់ជាយោបល់ថា អ្នកនយោបាយខ្មែរគួរណាស់ងាកមកបង្កើតវប្បធម៌សន្ទនារកផលប្រយោជន៍ជូនជាតិ ប្រសើរជាងបង្កើតយុទ្ធសាស្ត្រជាន់ពន្លិចគ្នា ដែលនាំឱ្យកិត្តិយសជាតិធ្លាក់ចុះ បង្កឱ្យមានអយុត្តិធម៌សង្គម និងបង្កជាបញ្ហាគ្មានទីបញ្ចប់នោះ៕