កញ្ញា សេង ធារី ដែលជាអ្នកគាំទ្រគណបក្សសង្គ្រោះជាតិដែលត្រូវតុលាការរំលាយ បានបង្ហាញការគាំទ្រសារនិងដំណើរការវិលត្រលប់របស់លោក សម រង្ស៊ី ថ្ងៃទី៩ ខែវិច្ឆិកា ឆ្នាំ២០១៩ ដោយថា សារនិងការរៀបចំគម្រោងផែនការមួយចំនួនរបស់មេបក្សប្រឆាំងរូបនេះមិនមែនជាអំពើខុសច្បាប់។
សាលាដំបូងរាជធានីភ្នំពេញ បានបន្តបើកសវនាការសួរដេញដោលកញ្ញា សេង ធារី ក្នុងសំណុំរឿង «ញុះញង់ និងរួមគំនិតក្បត់» ដែលក្នុងសំណុំរឿងនេះមានជនជាប់ចោទជាង៤០នាក់ ហើយក្នុងចំណោមជនជាប់ចោទជាង៤០នាក់ គឺមាន៣នាក់កំពុងជាប់ពន្ធនាគារ។
សវនាការសួរដេញដោលនៅថ្ងៃនេះ ចៅក្រមជម្រះបានសួរទៅកញ្ញា សេង ធារី ពាក់ព័ន្ធនឹងរដ្ឋាភិបាលបច្ចុប្បន្ន ថាតើកញ្ញាចូលចិត្តឬអត់? តើធ្លាប់បង្ហោះសាររិះគន់រដ្ឋាភិបាល និងហេតុអ្វីបានជារិះគន់? ចំណុចដែលរិះគន់មានអ្វីខ្លះដែរ? តើកញ្ញាគាំទ្រសារនិងការវិលត្រលប់លោក សម រង្ស៊ី និងហេតុអ្វីបានជាគាំទ្រ? ជាដើម។
ឈរលើកម្រាមដៃបីនៅរង្វង់ក្រចកសេះក្នុងសម្លៀកបំពាក់បែបជាកសិករចិន ដាក់សក់ក្រង ទឹកមុខមាំ កញ្ញា សេង ធារី បានលើកឡើងថា កញ្ញាមិនទទួលស្គាល់រដ្ឋាភិបាលបច្ចុប្បន្នទេ ដោយសារការបោះឆ្នោតឆ្នាំ២០១៨ ធ្វើឡើងដោយមិនមានបក្សប្រឆាំងចូលរួម និងមិនស្របតាមរដ្ឋធម្មនុញ្ញកម្ពុជា។
កញ្ញាថា៖ «ខ្ញុំមិននិយាយរឿងចូលចិត្តឬមិនចូលចិត្តទេ ខ្ញុំយល់ថា វាមិនស្របនឹងរដ្ឋធម្មនុញ្ញ ហើយរបបនេះជារបបផ្ដាច់ការ។ ឧទាហរណ៍៖ មុនពេលបោះឆ្នោត គណបក្សសង្គ្រោះជាតិត្រូវបានរំលាយទាំងខុសច្បាប់ បិទកាសែត មុនការបោះឆ្នោត២០១៨ ទាំងរដ្ឋធម្មនុញ្ញបានចែងការបោះឆ្នោតមួយត្រូវមានបក្សប្រឆាំងចូលរួមជាក់ស្ដែង តែបក្សប្រឆាំងត្រូវបានរំលាយចោលទៅវិញ។ ភស្តុតាងខ្ញុំបានអានរបាយការណ៍ ទាំងសហរដ្ឋអាមេរិក អូស្ត្រាលី ជប៉ុន ជាដើម ក៏គេមិនទទួលស្គាល់ការបោះឆ្នោត២០១៨ដែរ»។
មួយវិញទៀត ចំពោះការបង្ហោះសាររិះគន់រដ្ឋាភិបាលនោះ កញ្ញាថា ខ្លួនបានបង្ហោះរាល់ថ្ងៃនៅលើបណ្ដាញសង្គម ក្នុងនោះមានសារពាក់ព័ន្ធនឹងការរំលោភសិទ្ធិមនុស្ស ផ្នែកសេដ្ឋកិច្ចទាក់ទងនឹងយុវជនកម្មករ ផ្នែកនយោបាយរឿងបិទសេរីភាពបញ្ចេញមតិ និងការដែលរដ្ឋាភិបាលមិនឱ្យធ្វើកូដកម្មទាមទារសិទ្ធិ ជាដើម។
កញ្ញាបញ្ជាក់ថា បើសិនជារដ្ឋាភិបាលដឹកនាំប្រទេសតាមបែបប្រជាធិបតេយ្យ គឺមិនធ្វើបាបប្រជាពលរដ្ឋខ្លួនឯង ដោយបើកឱ្យបរទេសចូលមកយកដីធ្លីពលរដ្ឋ និងបំផ្លាញធនធានធម្មជាតិ រួមទាំងឱ្យបរទេសឈ្លានពានទឹកដីឡើយ។ ជាមួយគ្នានេះ ការលើកម្រាមដៃ៩របស់កញ្ញាបង្ហាញការគាំទ្រចំពោះដំណើរវិលត្រលប់និងគាំទ្រសាររបស់លោក សម រង្ស៊ី ផងដែរ។
កញ្ញា សេង ធារី និយាយថា៖ «អ៊ីចឹងយើងត្រួវតែរិះគន់ដើម្បីស្ថាបនា ហើយខ្ញុំរិះគន់នេះមិនមែនតែរដ្ឋាភិបាលទេ CNRP ក៏ខ្ញុំរិះគន់ដែរ»។
មិនមែនតែចៅក្រមទេ តំណាងអយ្យការ លោក សេង ហៀង ក៏បានសួរទៅកាន់កញ្ញា សេង ធារី ដែរថា៖ «តើកញ្ញាអាចបញ្ជាក់បានទេថាគាំទ្រសារ និងដំណើរវិលត្រលប់របស់លោក សម រង្ស៊ី ឬអត់? តើការគាំទ្រនេះ កញ្ញាបានធ្វើសកម្មភាពអ្វីខ្លះដែរ? តើការបង្ហោះបំផុសពលរដ្ឋងើបឡើង អំពាវនាវកងទ័ពផ្ដាច់ខ្លួនពីរដ្ឋាភិបាល ហើយចូលមកចាប់លោក ហ៊ុន សែន អីហ្នឹង តើសារទាំងអស់នេះត្រឹមត្រូវនិងគាំទ្រទេ? តើកញ្ញាគាំទ្រឱ្យអន្តរជាតិដាក់សម្ពាធមកលើរដ្ឋាភិបាលដែរឬ? តើកញ្ញាមានដឹងទេ ការគាំទ្រនេះវាជាការវាយបំបែកឆ្នាំងបាយរបស់ប្រជាពលរដ្ឋទេ?»
កញ្ញា សេង ធារី បានឆ្លើយតបថា កញ្ញាគាំទ្រសាររបស់លោក សម រង្ស៊ី ដែលបានលើកឡើងពីការលើកទឹកចិត្តឱ្យប្រជាពលរដ្ឋងើបឡើងដើម្បីទាមទារយុត្តិធម៌នោះ ហើយក៏គាំទ្រឱ្យអន្តរជាតិដាក់សម្ពាធមករដ្ឋាភិបាលដែរ ដោយថា ការគាំទ្រនេះមិនមែនជាការបំបែកឆ្នាំងបាយប្រជាពលរដ្ឋទេ តែជាការដាក់សម្ពាធឱ្យរដ្ឋាភិបាលគោរពសិទ្ធិមនុស្ស ឈប់ធ្វើបាបប្រជាពលរដ្ឋ ជាដើម។ កញ្ញា សេង ធារី ក៏បង្ហាញការគាំទ្រដំណើរវិលត្រលប់របស់លោក សម រង្ស៊ី ថ្ងៃ៩វិច្ឆិកាដែរ។
កញ្ញាថា៖ «ខ្ញុំគាំទ្រស្មារតីលោក សម រង្ស៊ី ឱ្យបញ្ឈប់របបផ្ដាច់ការ កុំប្រើប្រាស់អំណាចឱ្យកងកម្លាំងបាញ់ប្រជាពលរដ្ឋ និងធ្វើបាបប្រជាពលរដ្ឋ។ ខ្ញុំមានមិត្តភក្ដិត្រូវបានយោធាបាញ់សម្លាប់ ដូចជាលោក ជា វិជ្ជា។ ខ្ញុំយល់ថា សារនេះជាសារនយោបាយក្នុងការឆ្លើយតបគ្រោះថ្នាក់របស់ប្រទេសជាតិ ព្រោះយោធាធ្លាប់បាញ់សម្លាញ់ប្រជាពលរដ្ឋស្លាប់»។
កាលពីឆ្នាំ២០១៩ លោក សម រង្ស៊ី ប្រធានគណបក្សសង្គ្រោះជាតិដែលតុលាការបានរំលាយ បានប្រកាសពីផែនការវិលត្រលប់មកកម្ពុជានៅថ្ងៃទី៩ ខែវិច្ឆិកា ដើម្បីអ្វីមួយដែលលោកអះអាងថានឹងស្ដារប្រជាធិបតេយ្យនៅកម្ពុជាឡើងវិញ។ ប៉ុន្តែផែនការនេះបានបរាជ័យ ក្រោយរដ្ឋាភិបាលបានទប់ស្កាត់។
កញ្ញា សេង ធារី បញ្ជាក់ថា ក្នុងដំណើរការវិលត្រលប់លោក សម រង្ស៊ី នោះ រូបគាត់បានចូលរួមសកម្មភាពដោយលើកម្រាមដៃ៩ និងចង់ឱ្យប្រជាពលរដ្ឋទៅទទួលលោក សម រង្ស៊ី ដែរ ខណៈតំណាងអយ្យការចាត់ទុកការលើកម្រាមដៃ៩នោះ ថាជាសញ្ញាបដិវត្តន៍ពណ៌។
ប្រាប់អ្នកសារព័ត៌មានបន្ទាប់ចេញពីបន្ទាប់សវនាការថ្ងៃនេះ កញ្ញា សេង ធារី និយាយថា ខ្លួនមិនបានចូលរួមរៀបចំផែនការក្បត់ជាតិ ដូចការចោទប្រកាន់របស់តុលាការឡើយ។
កញ្ញាថា៖ «ការចោទប្រកាន់ខ្ញុំជាការរួមគំនិតក្នុងការក្បត់ជាតិ ខ្ញុំអត់ចូលក្នុងការផែនការក្បត់ជាតិទេ។ ខ្ញុំបានចូលផែនការ បើសិនជាប្រើពាក្យទូលំទូលាយ លើសពី៣ទៅ៤នាក់ ក្នុងការលើកស្ទួយលទ្ធិប្រជាធិបតេយ្យ។ ផែនការមិនមែនមានបញ្ហា ខ្ញុំបានចូលរួមផែនការ ប៉ុន្តែផែនការសម្រាប់អ្វី បើសិនជាផែនការក្បត់ជាតិ អត់ចូលរួមទេ ប្រសិនលើកស្ទួយលទ្ធិប្រជាធិបតេយ្យ ខ្ញុំគាំទ្រទាំងស្រុង»។
យ៉ាងណាក៏ដោយ បន្ទាប់សវនាការសួរដេញដោលពេញមួយព្រឹកនៅថ្ងៃនេះ ចៅក្រមជម្រះ លោក រស់ ពិសិដ្ឋ បានផ្អាក ដោយនឹងបន្តសវនាការសួរដេញដោលកញ្ញា សេង ធារី នៅថ្ងៃទី១ ខែមីនា ឆ្នាំ២០២២ ខាងមុខទៀត។
កញ្ញា សេង ធារី គឺជាមេធាវីម្នាក់ដែលបានបញ្ចប់ការសិក្សាថ្នាក់បណ្ឌិតច្បាប់នៅសហរដ្ឋអាមេរិក។ ក្រោយមក កញ្ញាបានវិលមកកម្ពុជាវិញ បន្ទាប់ពីរស់នៅនិងសិក្សានៅសហរដ្ឋអាមេរិកអំឡុងពេលរត់ភៀសខ្លួនចេញពីរបបខ្មែរក្រហម។
កញ្ញា សេង ធារី ធ្លាប់រៀបរាប់ក្នុងសវនាការនាពេលកន្លងមកថា ពេលរស់នៅកម្ពុជា កញ្ញាបានធ្វើការងារសង្គមជាច្រើន ដើម្បីជួយទៅដល់ការកសាងសន្តិភាព អប់រំពីច្បាប់ សិទ្ធិមនុស្ស និងប្រជាធិបតេយ្យ ព្រមទាំងធ្លាប់ធ្វើជាប្រធាន «មជ្ឈមណ្ឌលអភិវឌ្ឍន៍សង្គម» ថែមទៀតផង៕
