រដ្ឋបាលរាជធានីភ្នំពេញ បានប្រកាសអនុវត្តការផាកពិន័យអន្តរការណ៍ពី១លានរៀលទៅ៥លានរៀលលើកូដករក្រុមហ៊ុនណាហ្គាវើលដ៍ ដោយលើកហេតុផលថា ពួកគេរឹងរូសបន្តធ្វើកូដកម្មល្មើសនឹងវិធានសុខាភិបាល រួមទាំងបណ្ដាលឱ្យប៉ះពាល់ដល់សណ្ដាប់ធ្នាប់សាធារណៈ។
ក្នុងសេចក្ដីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី២២ ខែកុម្ភៈ ឆ្នាំ២០២២ បានលើកឡើងថា កាលពីថ្ងៃទី២១ ខែកុម្ភៈ ក្រុមកូដករដែលជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ បានប្រមូលផ្ដុំគ្នាយ៉ាងអនាធិបតេយ្យនៅតាមទីសាធារណៈ ផ្ទុយពីវិធានសុខាភិបាល ព្រមទាំងមិនបានអនុវត្តតាមសេចក្ដីជូនដំណឹងរបស់រដ្ឋបាលរាជធានីភ្នំពេញ កាលពីថ្ងៃ១៥ ខែកុម្ភៈ។
សេចក្ដីជូនដំណឹងនោះបន្តថា ករណីនេះ សមត្ថកិច្ចគ្មានជម្រើសអ្វីក្រៅពីការអនុវត្តវិធានការរដ្ឋបាល ដោយបានអញ្ជើញក្រុមកូដករចំនួន៦៤នាក់ទៅមជ្ឈមណ្ឌលចត្តាឡីស័ករាជធានីភ្នំពេញ ដើម្បីធ្វើតេស្តរកវីរុសកូវីដ-១៩ ហើយជាលទ្ធផលបានរកឃើញវិជ្ជមាន២នាក់។ ក្រោយការរកឃើញ អាជ្ញាធរបានបញ្ជូនពួកគេទៅមណ្ឌលព្យាបាល ដោយបានធ្វើការអប់រំនិងធ្វើកិច្ចសន្យាឱ្យបញ្ឈប់ការធ្វើសកម្មភាពខុសច្បាប់ ខណៈកូដករ៦២នាក់ផ្សេងទៀតត្រូវបានអនុញ្ញាតឱ្យត្រលប់ទៅផ្ទះ ដើម្បីតាមដានសុខភាពបន្ត។
រដ្ឋបាលរាជធានីភ្នំពេញ បន្តទៀតថា បើទោះជាអាជ្ញាធរបានអំពាវនាវឱ្យក្រុមកូដករបញ្ឈប់ការធ្វើសកម្មភាពខុសច្បាប់យ៉ាងណាក៏ដោយ ក៏មានកូដករមួយចំនួននៅបន្តប្រមូលផ្ដុំនៅតាមបណ្ដោយវិថីសុធារស មុខសាកលវិទ្យាល័យបៀលប្រាយ ដោយល្មើសនឹងវិធានសុខាភិបាល ទើបអាជ្ញាធរបញ្ជូនពួកគេទាំង៣៩នាក់ ទៅមណ្ឌលចត្តាឡីស័ករាជធានីភ្នំពេញ ព្រមទាំងសម្រេចអនុវត្តវិធានការផាកពិន័យអន្តរការណ៍ ចាប់ពី១លានរៀលទៅ៥លានរៀល ស្របតាមអនុក្រឹត្យស្ដីពីវិធានចត្តាឡីស័កដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដើម្បីឱ្យមានការរាងចាល។
បន្ថែមពីនេះ រដ្ឋបាលរាជធានីភ្នំពេញ ក៏បានអំពាវនាវទៅក្រុមកូដករណាហ្គាវើលដ៍ដទៃទៀតឱ្យបញ្ឈប់សកម្មភាពប្រមូលផ្ដុំខុសច្បាប់ ផ្ទុយនឹងវិធានសុខាភិបាល ទោះក្នុងរូបភាពណាក៏ដោយ ហើយត្រូវសហការជាមួយសមត្ថកិច្ចពាក់ព័ន្ធក្នុងការអនុវត្តច្បាប់ស្ដីពីការធ្វើបាតុកម្មដោយសន្តិវិធី និងវិធានសុខាភិបាលដែលបានដាក់ចេញ ដើម្បីធានាសុខភាពសាធារណៈ សន្តិសុខ សណ្ដាប់ធ្នាប់ របៀបរៀបរយ បញ្ចៀសការកកស្ទះចរាចរណ៍ និងរំខានដល់អាជីវកម្មនិងការងាររបស់ពលរដ្ឋដទៃទៀត។
កូដករក្រុមហ៊ុនណាហ្គាវើលដ៍ កញ្ញា ព្រំ ស្រីណាង បានលើកឡើងថា គាត់ត្រូវបានអាជ្ញាធរចាប់បញ្ជូនខ្លួនពួកគាត់ចំនួន៣៩នាក់ទៅដាក់ចោលនៅមណ្ឌលចត្តាឡីស័ក ក្នុងខណ្ឌព្រែកព្នៅ តាំងពីរសៀលថ្ងៃអង្គារម្សិលមិញ រហូតមកដល់ថ្ងៃពុធនេះ នៅមិនទាន់មានការដោះលែងនៅឡើយ។
កញ្ញាចាត់ទុកសកម្មភាពរបស់អាជ្ញាធរដែលធ្វើទៅលើពួកគាត់ថាជារឿងអយុត្តិធម៌។
កញ្ញាបន្តថា៖ «ទោះបីជាផាក ក៏ពួកខ្ញុំអត់បង់ដែរ ព្រោះអីពួកខ្ញុំអត់បានធ្វើអ្វីខុសច្បាប់ទេ ពួកខ្ញុំអត់ព្រម អត់សុខចិត្ត គេ[អាជ្ញាធរ]ចេញច្បាប់មកថាឱ្យផាកពិន័យពួកខ្ញុំ ព្រោះអីពួកខ្ញុំជាកូដករ គឺបានធ្វើស្របច្បាប់ទាំងអស់ មុននឹងពួកខ្ញុំដើរដល់ដំណាក់កាលនេះ»។
កូដករក្រុមហ៊ុនណាហ្គាវើលដ៍ម្នាក់ទៀត លោក ស៊ីណាត ម៉ាច បានឱ្យដឹងថា នៅរសៀលថ្ងៃពុធនេះ សមត្ថកិច្ចបានបន្តចាប់ខ្លួនក្រុមកូដករបន្ថែម២៩នាក់បន្ថែមទៀត នៅក្បែរស្ថានទូតរ៉ុស្ស៊ី បញ្ជូនទៅមណ្ឌលចត្តាឡីស័កក្នុងខណ្ឌព្រែកព្នៅ ខណៈពួកគេត្រៀមជួបជុំគ្នាក្បែរក្រុមហ៊ុនណាហ្គាវើលដ៍ ដើម្បីទាមទារឱ្យមានដំណោះស្រាយវិវាទការងារ និងដោះលែងថ្នាក់ដឹកនាំនិងសមាជិកសហជីពចំនួន១១នាក់ដែលកំពុងជាប់ឃុំនៅពន្ធនាគារ។
លោកបន្តថា ទោះបីជាអាជ្ញាធរចាប់ពួកគាត់ និងក្រុមកូដករផ្សេងទៀត រួចធ្វើការផាកពិន័យដូចការជូនដំណឹងរបស់រដ្ឋបាលរាជធានីភ្នំពេញក៏ដោយ ក៏ពួកគាត់មិនខ្លាចដែរ ពោលគឺនៅតែបន្តធ្វើកូដកម្មរហូតមានដំណោះស្រាយ។
លោកមានប្រសាសន៍ថា៖ «ពួកខ្ញុំនៅតែតស៊ូទៅមុខទៀត ទោះមានការគំរាមពីអាជ្ញាធរ ឬមានការចាប់ខ្លួនអីក៏ដោយ គឺពួកខ្ញុំនៅតែដើរទៅមុខទៀត ព្រោះពួកខ្ញុំត្រឹមតែជាកូដករធម្មតា អត់មានធ្វើអ្វីខុសច្បាប់ទេ។ ពួកខ្ញុំគ្រាន់តែតវ៉ាដើម្បីឆ្នាំងបាយរបស់ពួកខ្ញុំទេ អត់មានធ្វើអ្វីប៉ះពាល់ដល់អ្នកណាទាំងអស់»។
លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) យល់ថា ក្រុមកូដករបានធ្វើកូដកម្មដោយគោរពតាមវិធានសុខាភិបាលត្រឹមត្រូវ ពោលគឺមិនបានធ្វើខុសច្បាប់ដូចការចោទប្រកាន់របស់អាជ្ញាធរនោះទេ។
លោកចាត់ទុកការចាប់ខ្លួនក្រុមកូដករជាបន្តបន្ទាប់ ហើយបញ្ជូនទៅមណ្ឌលចត្តាឡីស័ក និងធ្វើការពិន័យជាប្រាក់រាប់លានរៀលទៅលើពួកគេនោះ ថាជាការធ្វើទុក្ខបុកម្នេញ និងជាសារគំរាមកំហែងឱ្យពួកគេបញ្ឈប់សកម្មភាពតវ៉ា។
លោកមានប្រសាសន៍ថា៖ «វាបង្ហាញរូបភាពមួយអាក្រក់ណាស់សម្រាប់រដ្ឋអំណាច អាជ្ញាធរដែលមានការអនុវត្តច្បាប់មានលក្ខណៈស្ដង់ដារពីរ ការប្រើប្រាស់នូវវិធានកូវីដ ហើយនិងការចោទប្រកាន់ ហើយនិងការពិន័យជាហូរហែនេះ»។
លោកបន្ថែមថា៖ «ខ្ញុំគិតថា វាជាគោលដៅមួយក្នុងការបំបិទសិទ្ធិសេរីភាពជាមូលដ្ឋានរបស់កូដករ របស់បុគ្គលិកកម្មករនិយោជិត ដែលគាត់ព្យាយាមនៅក្នុងការប្រើប្រាស់សិទ្ធិជាមូលដ្ឋាន ការធ្វើកូដកម្មដោយសន្តិវិធីជំរុញឱ្យមាននូវដំណោះស្រាយ។ អ៊ីចឹងយើងមើលឃើញថា ទម្រង់បែបនេះ រាជរដ្ឋាភិបាល អាជ្ញាធរកំពុងតែប្រើប្រាស់ទៅក្នុងការទប់ស្កាត់នូវការជួបជុំ នូវការប្រមូលផ្ដុំ ការតវ៉ា ការទាមទារដោយសន្តិវិធីរបស់ប្រជាពលរដ្ឋ»។
មន្ត្រីសង្គមស៊ីវិលរូបនោះបញ្ជាក់ថា បើរដ្ឋាភិបាលមិនជួយអន្តរាគមន៍រកដំណោះស្រាយបញ្ចប់វិវាទជូនកម្មករក្រុមហ៊ុនណាហ្គាវើលដ៍ទេ នោះបញ្ហាប្រឈមនៅតែបន្តកើតមាន និងកាន់តែធ្វើឱ្យប៉ះពាល់ដល់មុខមាត់រដ្ឋាភិបាលលើឆាកអន្តរជាតិ។
កាលពីថ្ងៃទី១៥ ខែកុម្ភៈ រដ្ឋបាលរាជធានីភ្នំពេញ បានចេញសេចក្ដីជូនដំណឹងម្ដងរួចមកហើយ ដោយហាមដាច់ខាត មិនឱ្យមានការប្រមូលផ្ដុំធ្វើបាតុកម្មខុសច្បាប់របស់កូដករណាហ្គាវើលដ៍ នៅក្នុងសង្កាត់ទន្លេបាសាក់ ខណ្ឌចំការមនទៀតឡើយ។ រដ្ឋបាលរាជធានីភ្នំពេញ អះអាងថា ការមិនអនុញ្ញាតនេះ គឺដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងខ្លួនថ្មីប្រភេទ «អូមីក្រុង» ចូលក្នុងសហគមន៍ ក៏ដូចជាធានាបាននូវសន្តិសុខ សណ្ដាប់ធ្នាប់ របៀបរៀបរយសាធារណៈ៕
