ស្ថាបនិកគណបក្សសង្គ្រោះជាតិដែលតុលាការរំលាយ លោក សម រង្ស៊ី បដិសេធថា ខ្លួនមិនធ្លាប់និយាយរឿងផ្ទាល់ខ្លួននាយករដ្ឋមន្ត្រី និងក្រុមគ្រួសាររបស់គាត់ម្ដងណានោះទេ។
លោកនាយករដ្ឋមន្ត្រី ហ៊ុន សែន ក្នុងពិធីបើកការដ្ឋានសាងសង់ស្ថានីយទឹកកខ្វក់មួយកន្លែងនៅរាជធានីភ្នំពេញ កាលពីថ្ងៃអង្គារម្សិលមិញ បានផ្ញើសារនយោបាយជាថ្មីទៀតលើយន្តការបន្តបិទខ្ទប់ការវិលត្រលប់មកប្រឡូកក្នុងឆាកនយោបាយវិញរបស់លោក សម រង្ស៊ី បើគ្មានការ«ប៉ះប៉ូវ»ណាមួយត្រូវបានធ្វើឡើង ដើម្បីស្ដារកិត្តិយសគ្រួសារលោកទេនោះ។
លោកថា ការប្រមាថភរិយានិងកូនរបស់លោក ដោយការប្រើពាក្យថាជាភរិយានិងជាកូនមេដឹកនាំវៀតណាមមួយរូប នាពេលកន្លងមកនោះ ជាការឈឺចាប់មួយដែលមិនអាចសន្ទនានយោបាយឡើងវិញបានទេ។
លោកនាយករដ្ឋមន្ត្រី ហ៊ុន សែន ថ្លែងថា៖ «ខ្ញុំបានប្រាប់មេដឹកនាំប្រទេសមួយចំនួនថា ខ្ញុំអត់ទទួលយកបានទេអាហ្នឹង រឿងចង់ទៅជាស្អីទៅៗ តែរឿងកន្លែងហ្នឹងមួយ បើអ្នកឯងមិនប៉ះប៉ូវឱ្យខ្ញុំ ទោះបីជាតិក្រោយចាំជាតិ ក៏ត្រូវតែប្រយុទ្ធគ្នានៅពេលនោះ […] ខ្មែរក៏ដោយ បរទេសក៏ដោយ កុំនិយាយជាមួយខ្ញុំ ចលនាឱ្យខ្ញុំបង្រួបបង្រួមជាមួយអាក្រុមប្រមាថប្រពន្ធនិងកូនខ្ញុំឱ្យសោះ»។
ប៉ុន្មានម៉ោងក្រោយ លោក សម រង្ស៊ី បង្ហោះសារលើហ្វេសប៊ុករបស់លោកឆ្លើយតបថា លោកមិនដែលនិយាយពីរឿងផ្ទាល់ខ្លួនរបស់លោក ហ៊ុន សែន និងក្រុមគ្រួសារគាត់ទេ។
លោកថា៖ «ខ្ញុំមិនដែលបានចាប់អារម្មណ៍ទាល់តែសោះ ហើយមិនដែលនិយាយម្ដងណាឡើយពីរឿងផ្ទាល់ខ្លួនរបស់លោក ហ៊ុន សែន និងក្រុមគ្រួសារគាត់ តែលោក ហ៊ុន សែន នៅតែចោទប្រកាន់ដដែលៗមកលើរូបខ្ញុំ […] សូមលោក ហ៊ុន សែន បញ្ចេញភស្តុតាងមកថា ពេលណា នៅទីកន្លែងណា មាននរណាខ្លះជាសាក្សី ដែលបញ្ជាក់ថាខ្ញុំបានលើកឡើងពីពាក្យចចាមអារ៉ាមទាក់ទងនឹងរឿងផ្ទៃក្នុងក្រុមគ្រួសារគាត់»។
លោក សម រង្ស៊ី ចាត់ទុកការលើកឡើងរបស់មេដឹកនាំបក្សកាន់អំណាច ថាជាលេសដើម្បីគេចចេញពីការរកដំណោះស្រាយវិបត្តិនយោបាយនៅកម្ពុជាតាមសំណើសហគមន៍អន្តរជាតិ។
តែយ៉ាងណា នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ ផ្តល់យោបល់ថា អ្នកនយោបាយខ្មែរគួរណាស់ងាកមកបង្កើតវប្បធម៌សន្ទនារកផលប្រយោជន៍ជូនជាតិ ប្រសើរជាងបង្កើតយុទ្ធសាស្ត្រជាន់ពន្លិចគ្នាដែលនាំឱ្យកិត្តិយសជាតិធ្លាក់ចុះ៕
