សាលាដំបូងរាជធានីភ្នំពេញ បានបន្តបើកសវនាការលើភស្តុតាងដោះបន្ទុកជាថ្មីទៀត នៅព្រឹកថ្ងៃពុធសប្ដាហ៍នេះ ជុំវិញបទចោទ «សន្និដ្ឋិភាពជាមួយរដ្ឋបរទេស ឬចង់ផ្ដួលរំលំរដ្ឋាភិបាល» ទៅលើលោក កឹម សុខា ប្រធានគណបក្សសង្រ្គោះជាតិដែលតុលាការរំលាយ ខណៈអង្គការសង្គមស៊ីវិលដែលឃ្លាំមើលសវនាការនេះ លើកឡើងថា ការជំនុំជម្រះនេះប្រព្រឹត្តទៅក្នុងបរិយាកាសតានតឹង និងយកត្រូវរៀងៗខ្លួន ទាំងភាគីតំណាងអយ្យការ និងសហមេធាវីការពារក្ដីឱ្យជនត្រូវចោទ។
ថ្លែងប្រាប់ក្រុមអ្នកសារព័ត៌មាននៅខាងមុខសាលាដំបូងរាជធានីភ្នំពេញ លោក ផែង ហេង សហមេធាវីការពារក្ដីរបស់លោក កឹម សុខា លើកឡើងថា ការសួរដេញដោលនៅក្នុងអង្គជំនុំជម្រះ នាព្រឹកថ្ងៃពុធសប្ដាហ៍នេះ គឺតុលាការបានបញ្ចប់រួចហើយ ត្រឹមវីដេអូឃ្លីបទី១៧។ ប៉ុន្តែលោកថា តុលាការបានបន្តនីតិវិធីថ្មីទៀតទៅលើភស្តុតាងដោះបន្ទុកជាសំណុំឯកសារលេខរៀងទី២០វិញម្ដង។
បើតាមលោក ផែង ហេង ភស្តុតាងដោះបន្ទុកដែលជាសំណុំឯកសារនេះ គឺគណបក្សសង្រ្គោះជាតិ បានលើកយកអំពីសេចក្ដីថ្លែងការណ៍មួយត្រង់មាត្រា១៦ថ្មី ស្ដីពីច្បាប់បោះឆ្នោត ដែលរកឃើញថា គ.ជ.ប អនុវត្តការងារមិនត្រឹមត្រូវទៅតាមនីតិវិធីនេះ។ លោកបន្តថា ឯកសារដែលពន្យល់តុលាការនេះទៀតសោត ក៏ដូចគ្នាដែរទៅនឹងការរកឃើញរបស់អង្គការតម្លាភាពកម្ពុជា អំពីភាពមិនត្រឹមត្រូវរបស់ស្ថាប័នជាតិរៀបចំការបោះឆ្នោតនេះ។
លោកបន្តថា៖ «មិនមែនតែគណបក្សសង្រ្គោះជាតិនោះទេដែលមើលឃើញនិងចាប់កំហុសដំណើរការនីតិវិធីហ្នឹងខុស ហើយលទ្ធផលបោះឆ្នោតហ្នឹងមិនប្រក្រតី គឺអង្គការតម្លាភាពកម្ពុជាក៏គេរកឃើញដែរ។ អ៊ីចឹងហើយយើងចង់បង្ហាញតុលាការថា យើងតវ៉ានៅត្រឹមក្របខណ្ឌច្បាប់។ យើងមិនមែនទៅសន្និដ្ឋិភាពជាមួយបរទេស ឬធ្វើបដិវត្តន៍ពណ៍ ដូចស្អីដែលតំណាងអយ្យការលើកឡើង ឬក៏ដីកាដំណោះស្រាយបញ្ជូនរឿងមកជម្រះនោះទេ»។
លោក ផែង ហេង ឱ្យដឹងទៀតថា នៅក្នុងអង្គជំនុំជម្រះ តំណាងអយ្យការ ទាំងលោក ប្លង់ សុផល និងលោក ឆាយ ហុង បានព្យាយាមសួរដេញដោលទៅលើផ្នែកច្ចេកទេសនៃកិច្ចការរបស់គ.ជ.ប។ ប៉ុន្តែត្រូវបានបដិសេធម្ដងហើយម្ដងទៀតពីសហមេធាវីការពារក្ដីរបស់លោក កឹម សុខា។
តែយ៉ាងណា លោកថា លោកមិនស៊ីជម្រៅទៅលើផ្នែកបច្ចេកទេសនោះទេ អ្វីដែលសហមេធាវីដាក់ភស្តុតាងនេះគ្រាន់តែចង់បង្ហាញពីភាពត្រឹមត្រូវរបស់កូនក្ដីរបស់ខ្លួន និងគណបក្សសង្រ្គោះជាតិតែប៉ុណ្ណោះ។
វីអូឌី មិនអាចសុំការបញ្ជាក់បានទេពីតំណាងអយ្យការ លោក ប្លង់ សុផល និងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ នៅថ្ងៃពុធនេះ។
យ៉ាងនេះក្ដី សហមេធាវីការពារក្ដីឱ្យលោក កឹម សុខា គឺលោក ផែង ហេង បញ្ជាក់ថា ភាគីតំណាងអយ្យការបានព្យាយាមសួរផ្ចាញ់ផ្ចាល ខុសនីតិវិធីដែលអង្គសវនាការកំពុងដំណើរការនៅក្នុងអង្គជំនុំជម្រះនេះ។
ប្រធានគណបក្សសង្រ្គោះជាតិដែលតុលាការរំលាយ លោក កឹម សុខា ត្រូវបានអាជ្ញាធរចាប់ខ្លួនទាំងពាក់កណ្ដាលអធ្រាត្រ កាលពីថ្ងៃទី៣ ខែកញ្ញា ឆ្នាំ២០១៧ ពោលមុន៣ខែដែលតុលាការកំពូលបានរំលាយគណបក្សសង្គ្រោះជាតិ។ មេបក្សជំទាស់រូបនេះត្រូវរងការចោទប្រកាន់ពីបទ «សន្និដ្ឋិភាពជាមួយរដ្ឋបរទេស ឬចង់ផ្ដួលរំលំរដ្ឋាភិបាល »។
សំណុំរឿងព្រហ្មទណ្ឌមួយនេះបានរងការរិះគន់ពីសហគមន៍ជាតិនិងអន្តរជាតិថា នេះជាវិធីសាស្រ្តរបស់បក្សកាន់អំណាច ដើម្បីឈានទៅកម្ទេចបក្សប្រឆាំងនៅមុនការបោះឆ្នោតជាតិ ឆ្នាំ២០១៨ តែប៉ុណ្ណោះ។
បើទោះបែបណា ទាំងមន្រ្តីរដ្ឋាភិបាល និងក្រសួងយុត្តិធម៌ ធ្លាប់ថ្លែងការពារថា ការរំលាយបក្សប្រឆាំងនេះ គឺដើម្បីរក្សាសន្តិភាពសម្រាប់ពលរដ្ឋកម្ពុជារាប់លាននាក់។ ម្យ៉ាងវិញទៀត មានភស្តុតាងដាក់បន្ទុកជាច្រើន រកឃើញថា គណបក្សសង្រ្គោះជាតិ ពិតជាបានត្រូវរ៉ូវគ្នាជាមួយបរទេសចង់ផ្ដួលរំលំរដ្ឋាភិបាល។
ជុំវិញសវនាការដែលប្រព្រឹត្តទៅនៅព្រឹកថ្ងៃពុធសប្ដាហ៍នេះ លោក ស៊ឹង សែនករុណា មន្រ្តីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក ដែលឃ្លាំមើលការជំនុំជម្រះដោយផ្ទាល់ ថ្លែងថា ក្នុងនីតិវិធីនៃការសួរដេញដោល ទាំងព្រះរាជអាជ្ញា និងសហមេធាវីការពារក្ដីឱ្យជនត្រូវចោទ ហាក់ប្រើប្រាស់តួនាទីនៅក្នុងការជំនុំជម្រះទៅជារឿងទំនាស់បុគ្គលទៅវិញ។ លោកបន្តថា ភាពតានតឹងនេះក៏បានកើតឡើងភ្លាមដែរ រវាងភាគីទាំងពីរនៅក្នុងអង្គជំនុំជម្រះ ហើយពេលខ្លះ ការទាស់ពាក្យសម្ដីដាក់គ្នា ដោយមិនបានឆ្លងការអនុញ្ញាតពីប្រធានក្រុមប្រឹក្សាជំនុំជម្រះថែមទៀតផង។
លោកបន្តថា៖ «ជាគោលការណ៍សវនាការត្រូវស្ដាប់ចៅក្រមប្រឹក្សា ចៅក្រមប្រឹក្សាអនុញ្ញាត ចាំភាគីក្នុងការនិយាយឬលើកឡើងអំពីអ្វីដែលខ្លួនចង់និយាយ ឬក៏លើកដៃសិនចាំនិយាយ។ ប៉ុន្តែដោយសារមានភាពចម្រូងចម្រាសខ្លាំងហ្នឹង រហូតដល់មានការជជែកគ្នាដោយមិនទាំងបានស្ដាប់ចៅក្រមប្រឹក្សាអនុញ្ញាតផង នេះគឺជាកាយវិការមួយដែលយើងគិតថាមិនសមរម្យទេនៅក្នុងសវនាការ»។
នៅក្នុងសំណុំរឿងរបស់លោក កឹម សុខា នេះ តុលាការនឹងបន្តសវនាការជាថ្មីទៀតនៅថ្ងៃទី២ ខែមីនា។ តុលាការនឹងបន្តស្ដាប់ការលើកឡើងលើភស្តុតាងជាឯកសារដោះបន្ទុកទៀត ពីភាគីសហមេធាវីការពារក្ដីឱ្យលោក កឹម សុខា។ ចំណែកនៅខាងក្រៅបរិវេណតុលាការឯណេះវិញ គេសង្កេតឃើញថា មានអ្នកគាំទ្រលោក កឹម សុខា តិចតួចប៉ុណ្ណោះ ខណៈកម្លាំងសមត្ថកិច្ចក៏ត្រូវបានគេដាក់ពង្រាយក្នុងកម្រិតធម្មតាដែលពុំធ្លាប់មានពីមុនមក៕