មន្ត្រីជាន់ខ្ពស់ក្រសួងសុខាភិបាល អះអាងថា រដ្ឋាភិបាលមិនខ្វះបរិមាណឱសថសម្រាប់ផ្គត់ផ្គង់ការព្យាបាលជំងឺកូវីដ-១៩ ខណៈមានពាក្យចចាមអារ៉ាមថា កម្ពុជាអាចនឹងដាច់ស្តុកឱសថព្យាបាលជំងឺកូវីដ-១៩ ដោយសារតែអត្រាអ្នកឆ្លងកើនឡើង និងពលរដ្ឋខ្លះសម្រុកទិញទុក បើទោះមិនឆ្លងជំងឺនេះ។
អគ្គនាយកបច្ចេកទេសនៃក្រសួងសុខាភិបាល លោកវេជ្ជបណ្ឌិត ហុក គឹមចេង មានប្រសាសន៍ប្រាប់វីអូឌីនៅថ្ងៃពុធនេះថា ក្រុមការងារចំពោះកិច្ចសម្រាប់ការផ្គត់ផ្គង់ឱសថយុទ្ធសាស្ត្រ បានទទួលការអនុញ្ញាតពីរដ្ឋាភិបាលនៅក្នុងការបញ្ជាទិញឱសថសំខាន់ៗសម្រាប់ការព្យាបាលបន្ថែមទៀត។
លោកបន្តថា៖ «ឱសថហ្នឹង គឺគេកំពុងតែធ្វើការបញ្ជាទិញ ហើយនឹងដឹកជញ្ជូនមកដល់[កម្ពុជា] ក្នុងពេលខាងឆាប់ៗ។ [អ៊ីចឹង រដ្ឋាភិបាលមិនបារម្ភពីការខ្វះខាតបរិមាណឱសថព្យាបាលកូវីដ-១៩សម្រាប់ផ្គត់ផ្គង់ទេ?] បាទ! គឺខ្ញុំគិតថាមិនខ្វះទេ ដោយសារថាបងប្អូនប្រជាពលរដ្ឋយើងក៏មានការត្រៀមខ្លះ ហើយក៏មានការត្រូវការហ្នឹងខ្លះ។ អ៊ីចឹងហើយកាលណាការត្រៀមលក្ខណៈហ្នឹងវាមានច្រើន អ៊ីចឹងវា[គ្រាន់តែអាច]ធ្វើឱ្យខ្វះខាតទៅលើអ្នកត្រូវការភ្លាមៗ»។
លោក ហុក គឹមចេង បន្តថា រដ្ឋាភិបាលមានយន្តការនៃការចែកចាយឱសថព្យាបាលកូវីដ-១៩ តាមរយៈក្រសួងប្រៃសណីយ៍ ធ្វើឡើងក្នុងគោលបំណងដើម្បីឱ្យឱសថនៅលើទីផ្សារមានតម្លៃច្បាស់លាស់ និងចៀសវាងកុំឱ្យអ្នកលក់ឱសថដំឡើងថ្លៃតាមចិត្ត។
ពលរដ្ឋរស់នៅខេត្តតាកែវ កញ្ញា លី ឡៃហួយ បានលើកឡើងថា តម្លៃឱសថព្យាបាលកូវីដ-១៩លក់នៅខាងក្រៅ ថ្លៃជាងតម្លៃលក់នៅក្រសួងប្រៃសណីយ៍។ តែយ៉ាងណា កញ្ញាថា ឱសថនេះមិនពិបាករកទិញនៅតាមឱសថស្ថានទេ។
កញ្ញា លី ឡៃហួយ ថា៖ « [តម្លៃក្រសួងប្រៃសណីយ៍ និងលក់នៅតាមហ្វាម៉ាស៊ី] អត់ដូចទេ! សម្រាប់ទិញតាមប្រៃសណីយ៍ វារាងយូរតិចហើយ យើងឈរតម្រង់ជួរអ៊ីចឹងណា តែតម្លែវាគឺ ៥៥ [ដុល្លារអាមេរិក] ស្តង់ដារហើយ។ តែសំខាន់អ្នកដែលគេចង់បានលឿន គេចំណាយទៅ។ តាមហ្វាម៉ាស៊ីមួយៗហ្នឹង បងជ្រែទៅ វា៧០ជាង ៦០ជាង [ដុល្លារ] អីហ្នឹង វាតាមប្រភេទថ្នាំគេ ឬតាមគេអ្នកលក់ ហាងឆេងរបស់ឈ្មួញគេមួយៗ អាហ្នឹងយើងអត់អាចថាម៉េចបានទេ។ អត់ពិបាករក[ទិញ]ទេនៅនេះ [ខេត្តតាកែវ] នៅហ្វាម៉ាស៊ីមាន [លក់]។ គ្រាន់តែខុសគ្នាត្រង់តម្លៃអ៊ីចឹង តែឥលូវម្នាក់ៗគាត់សុខចិត្តចំណាយហើយ សំខាន់កុំឱ្យវាលើសលួសច្រើនពេក»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី យល់ថា ឱសថសម្រាប់ព្យាបាលកូវីដ-១៩នឹងមិនខ្វះខាតទេ ដោយសារមានក្រុមហ៊ុនធំៗនៅលើពិភពលោកបានផលិតជាបន្តបន្ទាប់ ខណៈរដ្ឋាភិបាលកម្ពុជានឹងបញ្ជាការទិញចូលដែរ។ យ៉ាងណា លោកថា អ្វីដែលលោកបារម្ភ គឺជនក្រីក្រដែលគ្មានលទ្ធភាពទិញឱសថ និងសម្ភារប្រើប្រាស់ពាក់ព័ន្ធកូវីដ-១៩ ដូចជា ឧបករណ៍តេស្តរហ័ស ជាដើម ដោយសារវាមានតម្លៃថ្លៃ។
ករណីនេះ លោកជំរុញដល់ក្រសួងស្ថាប័នពាក់ព័ន្ធ ដូចជា នាយកដ្ឋានប្រឆាំងផលិតផលក្លែងក្លាយនៃក្រសួងមហាផ្ទៃ នាយកដ្ឋានឱសថនៃក្រសួងសុខាភិបាល និងក្រសួងសេដ្ឋកិច្ច សហការគ្នាធ្វើយ៉ាងណាទប់ស្កាត់ការដំឡើងថ្លៃឱសថ និងសម្ភារពេទ្យតាមអំពើចិត្តពីសំណាក់ក្រុមហ៊ុន និងអ្នកលក់ឱសថ។
លោកថា៖ «ក្រសួងពាក់ព័ន្ធទាំងអស់ហ្នឹងគួរណាតែមានឆន្ទៈទាំងអស់គ្នា ត្រូវជួយប្រជាពលរដ្ឋយើង។ កុំគិតថាពេលនេះយើងយកចំណេញដើម្បីគ្រួសារ យើងមានបានរស់តែយើង យើងត្រូវចុះមើលទាំងអស់គ្នា។ សូមឱ្យមន្ត្រីៗពាក់ព័ន្ធហ្នឹងឱ្យគាត់ចុះជួយ ចុះមើល ហើយតាមដានកន្លែងហ្វាម៉ាស៊ី កន្លែងឱសថស្ថាន តើមានឈ្មួញឆ្លៀតឱកាសប៉ុន្មានដែលគាត់បង្កប់នៅក្នុងហ្នឹង? អាហ្នឹងតែយើងរក ឃើញហើយ!»។
ថ្លែងក្នុងពិធីបើកការដ្ឋានសាងសង់ស្ថានីយប្រព្រឹត្តកម្មទឹកកខ្វក់បឹងជើងឯក ក្នុងខណ្ឌមានជ័យ រាជធានីភ្នំពេញ នាព្រឹកថ្ងៃទី២២ ខែកុម្ភៈនេះ លោកនាយករដ្ឋមន្ត្រី ហ៊ុន សែន បានស្នើអ្នកលក់ថ្នាំព្យាបាលជំងឺកូវីដ-១៩ កុំដំឡើងថ្លៃថ្នាំតាមចិត្ត។ ក្នុងនោះ លោកបានបញ្ជាឱ្យក្រសួងសុខាភិបាលពិនិត្យមើលនូវឱសថព្យាបាលជំងឺកូវីដ-១៩នៅលើទីផ្សារ ដើម្បីចៀសវាងបញ្ហាថ្នាំក្លែងក្លាយដែលបង្កឱ្យមានគ្រោះថ្នាក់ដល់សុខភាពប្រជាពលរដ្ឋ។
លោកថា៖ «សូមអំពាវនាវចំពោះអ្នកលក់ថ្នាំទាំងឡាយ យើងត្រូវបង្កើនសមត្ថភាពនៃការផ្គត់ផ្គង់ថ្នាំមកបន្ថែមទៀត។ ប៉ុន្តែសូមឱ្យយកចិត្តទុកដាក់ទៅលើចំណុច២យ៉ាងអំពីបញ្ហាថ្នាំព្យាបាលនោះ ទី១ តម្លៃថ្នាំ កុំបង្កើនទៅតាមចិត្តចង់ […] ទី២ ផ្នែកសុខាភិបាល ត្រូវតែពិនិត្យមើលថាថ្នាំហ្នឹង វាសុទ្ធឬមិនសុទ្ធ ព្រោះអាក្លែងក្លាយនេះវាកើតឡើងច្រើនណាស់ សូម្បីតែអាល់កុលក៏វាក្លែងក្លាយ អាជែលហ្នឹងក៏វាក្លែងក្លាយ ស្អីដាក់មកគឺវាក្លែងក្លាយទាំងអស់»។
កាលពីថ្ងៃទី២១ ខែកុម្ភៈ ក្រសួងសុខាភិបាលបានចេញសេចក្ដីជូនដំណឹងមួយដោយលើកឡើងថា ស្របពេលកំពុងមានការឆ្លងរីករាលដាលនៃជំងឺកូដ-១៩ក្នុងសហគមន៍ ក្រសួងបានពិនិត្យឃើញមានការចែកចាយនិងផ្សព្វផ្សាយលក់ឱសថប្រឆាំងវីរុសកូវីដ-១៩ Molnupiravir មួយចំនួន ដូចជា MERIPIR 200mg, MERIPIR 400mg, MOLUZEN 800, MOLAZ, MOLUZIR ជាដើម ដែលពុំមានលេខទិដ្ឋាការ ឬបញ្ជិកាពីក្រសួងឡើយ គិតត្រឹមថ្ងៃទី២១ ខែកុម្ភៈនេះ។
ក្រសួងបានអំពាវនាវឱ្យពលរដ្ឋពិនិត្យមើលលតាបត្របញ្ជិកាដែលមានបិទលើសំបកវេចខ្ចប់មុននឹងទិញឱសថគ្រប់ប្រភេទ ខណៈលតាបត្រដែលត្រឹមត្រូវ គឺមាន២ផ្នែក ក្នុងនោះផ្នែកខាងលើមានឈ្មោះគ្រឹះស្ថានអាហរ័ណនីហរ៍ណឱសថ ចំណែកផ្នែកខាងក្រោមមានលេខបញ្ជិកា។
ក្រសួងសុខាភិបាលបានប្រាប់ដល់ពលរដ្ឋទាំងអស់ឈប់ទិញនិងប្រើប្រាស់ឱសថ Molnupiravir ដែលគ្មានលេខទិដ្ឋាការ ឬបញ្ជិកាទៀត ពីព្រោះឱសថទាំងនេះមិនអាចធានាបាននូវប្រសិទ្ធភាព គុណភាព និងសុវត្ថិភាពបានឡើយ ហើយអាចជាឱសថក្លែងក្លាយបណ្ដាលឱ្យប៉ះពាល់សុខភាព ឬមានគ្រោះថ្នាក់ដល់អាយុជីវិតរបស់អ្នកប្រើប្រាស់ទៀតផង។
ករណីនេះ ក្រសួងក៏បានព្រមានចាត់វិធានការតឹងរ៉ឹងទៅតាមផ្លូវច្បាប់ចំពោះជនណាដែលនៅតែបន្តនាំចូល ចែកចាយ និងផ្សព្វផ្សាយលក់ឱសថគ្មានលេខបញ្ជិកា និងជនពាក់ព័ន្ធដទៃទៀត ទៅតាមច្បាប់ស្ដីពីវិសោធនកម្មច្បាប់ស្ដីពីការគ្រប់គ្រងឱសថជាធរមាន៕