មន្ត្រីជំនាញ ជំរុញឱ្យធ្វើវិសោធនកម្មច្បាប់អន្តោប្រវេសន៍ឆ្នាំ១៩៩៤ជាបន្ទាន់ ដើម្បីធានាប្រសិទ្ធភាពគ្រប់គ្រងជនអន្តោប្រវេសន៍ ក្រោយពីរកឃើញថា ផ្នែកមួយនៃបញ្ហានេះ គឺអាជ្ញាធរវៀតណាមមិនព្រមទទួលយកពលរដ្ឋវៀតណាមដែលរឹងរូសឱ្យត្រលប់ទៅស្រុកកំណើតវិញទេ ទោះពួកគេចង់ទៅក៏ដោយ។
នេះបើតាមការលើកឡើងរបស់អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ លោក ប៉ោ ភក្តិ នៅក្នុងពិធីបិទសន្និបាតត្រួតពិនិត្យលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២ នាថ្ងៃទី២៣ ខែកុម្ភៈ។
លោក ប៉ោ ភក្តិ បានលើកឡើងថា ជនបរទេសជិត១ម៉ឺននាក់ (៩ ៩២៤នាក់) មិនបានមកសុំបណ្ណស្នាក់នៅថ្មី ឬសុំបន្តរយៈពេលប្រើប្រាស់ស្នាក់នៅអចិន្ត្រៃយ៍ទេ។ មួយវិញទៀត លោកថា ជនបរទេសអន្តោប្រវេសន៍គ្រប់អាយុ១៨ឆ្នាំមួយចំនួន ក៏មិនបានមកសុំបណ្ណស្នាក់នៅអចិន្ត្រៃយ៍តាមច្បាប់កំណត់ដែរ។
លោកបន្តថា ការគ្រប់គ្រងការផ្លាស់ប្ដូរទីលំនៅរបស់ជនបរទេសអន្តោប្រវេសន៍ពីមូលដ្ឋានមួយទៅមូលដ្ឋានមួយមិនទាន់ច្បាស់លាស់ ការបម្លាស់ទីជនជាតិវៀតណាមពីផ្ទះទឹកមកលើគោកនៅខេត្តកំពង់ឆ្នាំងមិនទាន់ធ្វើបានត្រឹមត្រូវតាមការកំណត់របស់ក្រសួង ខណៈការរៀបអាពាហ៍ពិពាហ៍រវាងជនបរទេសអន្តោប្រវេសន៍និងជនជាតិខ្មែរមិនទាន់មានបទដ្ឋានកំណត់នៅឡើយ។
លោក ប៉ោ ភក្តិ គូសបញ្ជាក់ថា បញ្ហាមួយទៀត គឺអាជ្ញាធរវៀតណាមមិនព្រមទទួលយកពលរដ្ឋខ្លួនដែលរឹងរូសឱ្យត្រលប់ទៅប្រទេសកំណើតខ្លួនវិញទេ បើទោះបីពួកគេចង់ទៅក៏ដោយ។
លោកថា៖ «អាជ្ញាធរវៀតណាមមិនទទួលយកពលរដ្ឋវៀតណាមរឹងរូស ឬអន្តោប្រវេសន៍វៀតណាមដែលមានបំណងចង់ត្រលប់ទៅប្រទេសវៀតណាមវិញ»។
បញ្ហានេះ លោក ប៉ោ ភក្តិ ជំរុញឱ្យធ្វើវិសោធនកម្មច្បាប់ស្តីពីអន្តោប្រវេសន៍ឆ្នាំ១៩៩៤ឱ្យបានឆាប់ យ៉ាងយូរត្រឹមដំណាច់ឆ្នាំ២០២២នេះ រួមទាំងប្រកាសអន្តរក្រសួងមួយចំនួនទៀត ដើម្បីចាត់វិធានការលើករណីនេះ។
អ្នកនាំពាក្យនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក កែវ វណ្ណថន អះអាងថា សេចក្ដីព្រាងដើម្បីស្នើធ្វើវិសោធនកម្មនៃច្បាប់នេះបានធ្វើរួចរាល់ហើយ ប៉ុន្តែពេលនេះកំពុងឆ្លងកាត់ថ្នាក់ដឹកនាំក្រសួងមហាផ្ទៃ ។
រដ្ឋមន្ត្រីក្រសួងមហាផ្ទៃ លោក ស ខេង ដែលចូលរួមបិទសន្និបាតនេះ បានលើកឡើងថា កន្លងទៅ បរទេសមួយចំនួនកាន់លិខិតឆ្លងដែន និងអត្តសញ្ញាណបណ្ណសញ្ជាតិខែ្មរតាមផ្លូវកាត់ ដោយគ្មានព្រះរាជ្យក្រឹត្យ។ ប៉ុន្តែលោកថា បញ្ហានេះ ស្ថាប័នពាក់ព័ន្ធបានប្រមូលយកវិញអស់ហើយដែរ និងបានផ្ដល់ឯកសារស្របច្បាប់ត្រលប់ទៅវិញ។
ការណីនេះ លោក ស ខេង បានប្រាប់ទៅមន្ត្រីក្រោមឱវាទទប់ស្កាត់បញ្ហានេះឱ្យមានប្រសិទ្ធភាព ប្រកបដោយការទទួលខុសត្រូវ។
លោកថា៖ «វាចម្លែកត្រង់ថា គាត់មិនចង់បានឯកសារស្របច្បាប់ដើម្បីស្នាក់នៅ វាចម្លែកសម្រាប់ករណីនេះ។ អ៊ីចឹងសូមឱ្យយកចិត្តទុកដាក់ តែខ្ញុំគិតថា វិធីដែលយើងដោះស្រាយកន្លងទៅនេះជាវិធីមួយដែលល្អបំផុត ប្រហែលជាគ្មានវិធីណាល្អជាងហ្នឹងទេ។ អ៊ីចឹងទេ យើងគួរនាំគ្នាទៅមុខ កុំថយក្រោយ»។
ប្រធានក្រុមប្រឹក្សាឃ្លាំមើលកម្ពុជានៅប្រទេសន័រវែស លោក ម៉ែន ណាត មើលឃើញថា ការបណ្ដែតបណ្ដោយឱ្យជនអន្តោប្រវេសន៍នៃប្រទេសជិតខាងមករស់នៅច្រើន ជាសញ្ញាគ្រោះថ្នាក់ដល់ការបង្កើតរដ្ឋក្នុងរដ្ឋដូចប្រទេសមួយចំនួន។
យ៉ាងណា លោកយល់ថា ប្រសិទ្ធភាពនៃការទប់ស្កាត់លំហូរអន្តោប្រវេសន៍ប្រទេសវៀតណាមនៅកម្ពុជា អាស្រ័យលើឆន្ទៈនយោបាយ មិនអាស្រ័យទៅលើការកែច្បាប់ទេ។
លោកថា៖ «ព្រោះលោក ហ៊ុន សែន គាត់ជាប់ជំពាក់រឿងនយោបាយ កម្ពុជា-វៀតណាម ជ្រៅពេក ដោះស្រាយអត់ចេញ មានតែវិធីមួយគត់ដែលព្យាយាមបន្តិចម្ដងៗ យើងឃើញថ្មីៗ មានការកែច្បាប់សញ្ជាតិផ្ដល់លក្ខខណ្ឌដល់ជនអន្តោប្រវេសន៍វៀតណាមមានសិទ្ធិរស់នៅបន្តអីចឹងទៅ។ អាហ្នឹងជាការកែសម្រួលដើម្បីលួងចិត្តរដ្ឋាភិបាលវៀតណាម កុំថាវាដាក់សម្ពាធខ្លាំងពេកមកលើកម្ពុជា»។
តែយ៉ាងណា ក្នុងពិធីនោះ លោក ប៉ោ ភក្តិ ក៏បានស្នើសុំគោលការណ៍រៀបចំកែសម្រួលរចនាសម្ព័ន្ធចាត់តាំងនគរបាលព្រំដែន និងបន្ថែមជំនាញនគរបាលយុត្តិធម៌ ព្រមទាំងបន្ថែមកម្លាំងឈរជើងតាមគោលដៅ លើកកម្ពស់សមត្ថភាពជំនាញ រួមទាំងបំពាក់មធ្យោបាយបច្ចេកទេសដើម្បីទប់ស្កាត់បញ្ហានេះ រួមទាំងការឆ្លងដែនខុសច្បាប់៕
