ប្រធានាធិបតីរុស្ស៊ី លោក វ្លាឌីមៀរ ពូទីន បានឱ្យដឹងនៅថ្ងៃពុធម្សិលមិញថា រុស្ស៊ីតែងតែបើកចំហចំពោះដំណោះស្រាយការទូត ប៉ុន្តែក្នុងលក្ខខណ្ឌគិតផលប្រយោជន៍សន្តិសុខជាតិរបស់ខ្លួនជាធំ ហើយនឹងបន្តពង្រឹងវិស័យយោធារបស់ខ្លួន ដើម្បីប្រឈមមុខនឹងអ្វីដែលលោកហៅថាជាស្ថានភាពអន្តរជាតិដ៏លំបាកមួយ។
ទោះជាយ៉ាងណា ប្រធានាធិបតីរូបនេះមិនបានលើកឡើងអំពីករណីដែលប្រទេសលោកខាងលិចសម្រេចដាក់ទណ្ឌកម្មលើប្រទេសរបស់ខ្លួន បន្ទាប់ពីលោកទទួលស្គាល់តំបន់ផ្ដាច់ខ្លួនចំនួនពីរនៅភាគខាងកើតអ៊ុយក្រែនជារដ្ឋឯករាជ្យនោះទេ។
ទីភ្នាក់ងារសារព័ត៌មាន Reuters បានស្រង់សម្ដីលោក វ្លាឌីមៀរ ពូទីន ដែលបានថ្លែងជាសារទៅកាន់លោកខាងលិចថា៖ «ប្រទេសរបស់យើងតែងតែបើកចំហជានិច្ចសម្រាប់ការសន្ទនាដោយផ្ទាល់និងស្មោះត្រង់ ហើយត្រៀមខ្លួនរួចជាស្រេចក្នុងការស្វែងរកដំណោះស្រាយការទូតចំពោះបញ្ហាដ៏ស្មុគស្មាញបំផុតនេះ»។
ប្រធានាធិបតីដដែលនេះបន្ថែមថា៖ «ប៉ុន្តែខ្ញុំចង់ធ្វើការបញ្ជាក់សាជាថ្មីម្ដងទៀតថា ផលប្រយោជន៍របស់រុស្ស៊ី និងសន្តិសុខរបស់ប្រជាជនរបស់យើង គឺជាអាទិភាពដ៏សំខាន់។ ដូច្នេះហើយ យើងនឹងបន្តពង្រឹង និងធ្វើទំនើបកម្មវិស័យកងទ័ពរបស់យើង»។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមឡើងកម្ដៅខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែនតាមរយៈចលនាទ័ពរបស់ខ្លួននៅក្បែរព្រំដែនរបស់ប្រទេសមួយនេះ។
ទោះជាយ៉ាងណា រុស្ស៊ី កាលពីពេលកន្លងទៅ ធ្លាប់បានបដិសេធគម្រោងរៀបចំការវាយប្រហារណាមួយលើអ៊ុយក្រែន ខណៈដែលពួកគេបានលើកឡើងថា កងទ័ពទាំងឡាយរបស់ពួកគេ គឺមិនបានបង្កការគំរាមកំហែងដល់នរណាម្នាក់ឡើយ៕
