រដ្ឋមន្ត្រីការបរទេសអ៊ុយក្រែន លោក Dmytro Kuleba បានឱ្យដឹងតាមរយៈបណ្ដាញសង្គមធ្វីតធ័រ (Twitter) នៅថ្ងៃព្រហស្បតិ៍នេះថា ប្រទេសរុស្ស៊ីបានបើកការឈ្លានពានយ៉ាងពេញទំហឹងលើប្រទេសរបស់ខ្លួនហើយ ដោយពួកគេកំពុងតែកំណត់គោលដៅទៅកាន់ទីក្រុងនានាជាមួយនឹងការវាយប្រហារដោយអាវុធ។
ជាមួយគ្នានេះ ទីភ្នាក់ងារសារព័ត៌មានក្នុងស្រុកមួយក៏បានរាយការណ៍ពីការវាយប្រហារដោយគ្រាប់រ៉ុក្កែតលើមូលដ្ឋានយោធានានានៅទូទាំងប្រទេសអ៊ុយក្រែនផងដែរ ខណៈដែលទាហានរុស្ស៊ីបានចូលទៅកាន់ភាគខាងត្បូងនៃទីក្រុង Odessa និង Mariupol។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្ត្រីការបរទេសអ៊ុយក្រែនដែលបានថ្លែងថា៖ «លោក ពូទីន [ប្រធានាធិបតីរុស្ស៊ី] បានចាប់ផ្ដើមបើកការឈ្លានពានមួយលើអ៊ុយក្រែនក្នុងទ្រង់ទ្រាយធំហើយ ខណៈដែលទីក្រុងនានារបស់ប្រទេសនេះ បច្ចុប្បន្នកំពុងតែស្ថិតនៅក្រោមការវាយប្រហារ»។
លោក Dmytro Kuleba បន្ថែមថា៖ «នេះគឺជាសង្រ្គាមនៃការឈ្លានពានមួយ។ អ៊ុយក្រែននឹងការពារខ្លួន ហើយនឹងទទួលបានជ័យជម្នះលើករណីនេះ។ ពិភពលោកអាចនឹងត្រូវតែបញ្ឈប់លោក ពូទីន។ វាគឺជាពេលវេលាក្នុងការធ្វើសកម្មភាពនាពេលឥលូវនេះ»។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែនតាមរយៈចលនាទ័ពរបស់ខ្លួននៅក្បែរព្រំដែនរបស់ប្រទេសមួយនេះ។
ទាក់ទិននឹងករណីនេះ បណ្តាប្រទេសលោកខាងលិចមួយចំនួនក៏បានសម្រេចដាក់ទណ្ឌកម្មជាបន្តបន្ទាប់លើរុស្ស៊ីផងដែរ ពោលគឺបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានប្រកាសទទួលស្គាល់តំបន់ផ្តាច់ខ្លួនចំនួនពីរនៅភាគខាងកើតអ៊ុយក្រែនជារដ្ឋឯករាជ្យ៕
To Ukrainians around the globe:
— Dmytro Kuleba (@DmytroKuleba) February 24, 2022
Putin attacked, but no one is running away. Army, diplomats, everyone is working. Ukraine fights. Ukraine will defend itself. Ukraine will win.
Share the truth about Putin’s invasion in your countries and call on governments to act immediately.