មេដឹកនាំកំពូលនានារបស់សហភាពអឺរ៉ុប បានឱ្យដឹងនៅថ្ងៃសុក្រនេះថា ប្រធានាធិបតីរុស្ស៊ី លោក វ្លាឌីមៀរ ពូទីន នឹងទទួលបរាជ័យ ខណៈដែលពួកគេបានអនុម័តលើការដាក់ទណ្ឌកម្មថ្មីៗជាបន្តបន្ទាប់ចំពោះការឈ្លានពានរបស់រុស្ស៊ីលើអ៊ុយក្រែន។
រុស្ស៊ីបានបើកការឈ្លានពានរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍ បន្ទាប់ពីមានការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះមនុស្សរាប់សិបនាក់ក៏ត្រូវបានរាយការណ៍ថាបានស្លាប់បាត់បង់ជីវិតផងដែរ។
ទាក់ទិននឹងករណីនេះ មេដឹកនាំនានានៃសហភាពមួយនេះក៏បានយល់ព្រមជាគោលការណ៍នៅក្នុងកិច្ចប្រជុំកំពូលបន្ទាន់មួយ ដើម្បីដាក់ទណ្ឌកម្មសេដ្ឋកិច្ចថ្មីៗបន្ថែមទៀត ដោយចូលរួមជាមួយសហរដ្ឋអាមេរិក និងបណ្ដាប្រទេសដទៃទៀត ក្នុងការចាត់វិធានការនានាលើរុស្ស៊ី។
ជាមួយគ្នានេះ សហភាពអឺរ៉ុប ក៏នឹងបង្កកទ្រព្យសម្បត្តិរុស្ស៊ីនៅក្នុងប្លុករបស់ខ្លួន និងបញ្ឈប់ការចូលដំណើរការធនាគាររបស់ប្រទេសមួយនេះទៅកាន់ទីផ្សារហិរញ្ញវត្ថុអឺរ៉ុបផងដែរ ខណៈដែលសកម្មភាពនេះត្រូវបានចាត់ទុកដោយប្រធានគោលនយោបាយការបរទេសរបស់សហភាពអឺរ៉ុប លោក Josep Borrell ថាជាកញ្ចប់ទណ្ឌកម្មដ៏ធ្ងន់ធ្ងរបំផុតមួយដែលមិនធ្លាប់មានពីមុនមក។
ទីភ្នាក់ងារសារព័ត៌មាន Reuters បានស្រង់សម្ដីប្រធានគណៈកម្មការអឺរ៉ុប លោកស្រី Ursula Von der Leyen ដែលបានឱ្យដឹងតាមរយៈបណ្ដាញសង្គម ធ្វីតទ័រ (Twitter) ផងដែរថា៖ «កញ្ចប់ទណ្ឌកម្មនេះ រួមបញ្ចូលទាំងការដាក់ទណ្ឌកម្មផ្នែកហិរញ្ញវត្ថុ ដោយកំណត់គោលដៅដល់៧០ភាគរយនៃទីផ្សារធនាគាររុស្ស៊ី និងក្រុមហ៊ុនរដ្ឋសំខាន់ៗផ្សេងទៀត»។
ប្រធានគណៈកម្មការអឺរ៉ុបដដែលនេះបន្តថា ទណ្ឌកម្មដែលកំណត់នូវការចូលរបស់រុស្ស៊ីទៅកាន់ទីផ្សារហិរញ្ញវត្ថុនេះ ក៏នឹងបង្កើនប្រាក់កម្ចីរបស់រុស្ស៊ី និងអតិផរណាសម្រាប់ពួកគេផងដែរ។
លោកស្រី Ursula Von der Leyen ក៏បានបន្ថែមឱ្យដឹងទៀតថា ការទប់ស្កាត់ការនាំចេញទៅកាន់ប្រទេសរុស្ស៊ីនឹងធ្វើឱ្យប៉ះពាល់ដល់វិស័យប្រេងរបស់ប្រទេសនេះ ដោយបញ្ឈប់ការទទួលបានសម្ភារដែលខ្លួនត្រូវការចាំបាច់ពីសហភាពអឺរ៉ុបសម្រាប់រោងចក្រចម្រាញ់ប្រេងរបស់ខ្លួន ហើយករណីនេះនឹងបង្កឱ្យមានការធ្លាក់ចុះចំណូលពីការចម្រាញ់ប្រេងរបស់ប្រទេសរុស្ស៊ី។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្តើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែនតាមរយៈការចលនាទ័ពរបស់ខ្លួនចូលមកកាន់ប្រទេសមួយនេះ៕
