ប្រជាពលរដ្ឋជនជាតិដើមភាគតិចពូនង ៦០គ្រួសារ បាននាំគ្នាចោទអាជ្ញាធរមូលដ្ឋានថាមិនអើពើដោះស្រាយបញ្ហាជូនពួកគេ ដោយបណ្ដោយឱ្យជនមិនស្គាល់មុខទៅហ៊ុមព័ទ្ធយកដីព្រៃជាង១០ហិកតា ស្ថិតនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ដែលពួកគេទុកសម្រាប់កប់សពជាកម្មសិទ្ធិ។
កាលពីថ្ងៃទី២១ ខែកុម្ភៈ ឆ្នាំ២០២២ តំណាងជនជាតិដើមភាគតិច ៥នាក់ បាននាំគ្នាយកពាក្យបណ្ដឹងដាក់ទៅកាន់សាលាដំបូងខេត្តមណ្ឌលគិរី ដោយប្ដឹងមេភូមិអូរស្ពាន លោកស្រី ជិន ស៊ីលាប និងចៅសង្កាត់ស្ពានមានជ័យ លោក គុជ ម៉េងធូ ដោយចោទថាបានបណ្ដោយឱ្យមានការធ្វើរបងហ៊ុមព័ទ្ធប៉ះពាល់ដល់ដីព្រៃទំហំ១១ហិកតាសម្រាប់កប់សពរបស់ពួកគេ។
ក្នុងពាក្យបណ្ដឹងនោះ ក្រុមជនជាតិដើមភាគតិចបានស្នើទៅតុលាការឱ្យបើកការស៊ើបអង្កេតនិងផ្ដន្ទាទោសអ្នកដែលធ្វើខុសច្បាប់ ដោយទាមទារសំណង១០ម៉ឺនដុល្លារ ហើយដកហូតដីកប់សពមកឱ្យប្រជាពលរដ្ឋដើម្បីប្រើប្រាស់វិញ។
តំណាងជនជាតិដើមភាគតិចពូនង អ្នកស្រី ក្រេះ សុរ៉ា ប្រាប់ វីអូឌី នៅថ្ងៃសុក្រនេះថា មូលហេតុដែលពួកគាត់ដាក់បណ្ដឹងទៅតុលាការ ដោយសារអស់ជម្រើស។ អ្នកស្រីបន្តថា កាលពីខែកញ្ញា ឆ្នាំ២០២១ មានកម្មករជាច្រើននាក់បាននាំគ្នាទៅដកបង្គោលរបងរបស់ពលរដ្ឋចេញ និងបានដាំបង្គោលរបងថ្មីរំលោភលើដីព្រៃកប់សពទំហំ១១ហិកតានោះ ទាំងដែលពួកគាត់មិនដែលបានលក់ដូរដីនោះទៅឱ្យបុគ្គលណាម្នាក់ឡើយ។
ជនជាតិដើមភាគតិចពូនងរូបនេះបន្តទៀតថា កម្មករដែលចុះដាំបង្គោលមិនបានបញ្ជាក់ប្រាប់ឈ្មោះម្ចាស់ឡើយ ខណៈអាជ្ញាធរភូមិនិងឃុំ មិនបានចុះហាមឃាត់ឡើយ។ ករណីនេះ អ្នកស្រីបារម្ភខ្លាចគេយកដីសម្រាប់កប់សពដែលពួកគាត់បានរក្សាទុកតាំងពីដូនតាមកនោះ។
អ្នកស្រីថា៖ «ពួកខ្ញុំអត់ដឹងអ្នកណាអ្នកលក់ទេ អ៊ីចឹងបានខ្ញុំឱ្យភូមិឃុំដោះស្រាយរកអ្នកចាក់ដីហ្នឹង តែគាត់អត់រកឱ្យ! អ៊ីចឹងបានពួកខ្ញុំថាបើសិនជាភូមិឃុំមិនចុះហត្ថលេខា ក៏គេមិនហ៊ានយកដែរដីហ្នឹង! មានតែភូមិឃុំចុះហត្ថលេខា បានគេហ៊ានយក បើមិនអ៊ីចឹង គេមិនហ៊ានយកទេ។ អ៊ីចឹងបានពួកខ្ញុំប្ដឹងភូមិឃុំឱ្យគាត់ចាប់រក[ដំណោះស្រាយ]ឱ្យពួកខ្ញុំ»។
តំណាងសហគមន៍ជនជាតិដើមភាគតិចពូនង លោក គ្រើង តុលា លើកឡើងថា កន្លងមក ប្រជាពលរដ្ឋបានដាក់បណ្ដឹងទៅអាជ្ញាធរ តែអាជ្ញាធរមិនទទួល ហើយនៅពេលទៅរកកិច្ចអន្តរាគមន៍ម្តងៗ អាជ្ញាធរតែងគេចវេះមិនដោះស្រាយជូនប្រជាពលរដ្ឋឡើយ ដែលករណីនេះ បានជំរុញឱ្យពួកគាត់នាំគ្នាដាក់បណ្ដឹងបរិហារទៅតុលាការតែម្តង។ លោកបន្តថា ការដាក់ពាក្យបណ្ដឹងនេះ ដើម្បីបញ្ជាក់ផងដែរថា អាជ្ញាធរមិនបម្រើប្រជាពលរដ្ឋឡើយ។
លោកថា៖ «អាជ្ញាធរនៅភូមិអូរស្ពាន និងអាជ្ញាធរឃុំស្ពានមានជ័យហ្នឹង អសកម្មក្នុងការបម្រើប្រជាពលរដ្ឋ នៅពេលដែលក្រសួងមហាផ្ទៃផ្ដល់សេចក្ដីទុកចិត្តឱ្យគាត់ ដើម្បីឱ្យគាត់បម្រើប្រជាពលរដ្ឋ បែរជាគាត់មិនបម្រើប្រជាពលរដ្ឋ។ អ៊ីចឹងអាជ្ញាធរបែបហ្នឹង គួរណាស់តែផ្លាស់ប្ដូរ រកអ្នកសកម្មបម្រើប្រជាពលរដ្ឋ កុំឱ្យប្រជាពលរដ្ឋកាប់ចាក់ ទឹកភ្នែក ដោយសាររឿងដីធ្លី រឿងអាជ្ញាធរពុករលួយ ដើម្បីបញ្ចៀសបញ្ហាអាក្រក់ៗ»។
ចៅសង្កាត់ស្ពានមានជ័យ លោក គុជ ម៉េងធូ បានបដិសេធចំពោះការចោទប្រកាន់ដែលថាអាជ្ញាធរមិនអើពើដោះស្រាយ។ លោកបន្តថា ការដែលអាជ្ញាធរមិនទាន់ដោះស្រាយ ដោយសារបច្ចុប្បន្នកំពុងផ្ទុះជំងឺកូវីដ-១៩ ខណៈអាជ្ញាធរកំពុងរៀបចំឯកសារបូកសរុបការងារប្រចាំឆ្នាំ។
លោកថា៖ «ទ្រព្យហ្នឹងជាដីកេរដូនតាគាត់ មិនអ៊ីចឹង? គាត់ដាក់ពាក្យបណ្ដឹង ខ្ញុំបានឃើញហើយពាក្យបណ្ដឹងនោះ ក៏ប៉ុន្តែគាត់ជាម្ចាស់ទ្រព្យម្ចាស់ដី គាត់មិនការពារ ឱ្យអាជ្ញាធរណាទៅដេកការពារឱ្យគាត់។ គាត់ទៅការពារ គាត់ទៅធ្វើ គាត់ទៅថែទាំ ប្រើប្រាស់ទៅ អាជ្ញាធរគេចាំដោះស្រាយសម្របសម្រួលជូនទេ។ អាជ្ញាធរមានពេលទៅអង្គុយយាមដីឱ្យគាត់? អត់ត្រូវទេ»។
មន្ត្រីអង្កេតនៃសមាគមការពារសិទ្ធិមនុស្សអាដហុកប្រចាំខេត្តមណ្ឌលគិរី លោក តឿ សង្ហា ចាត់ទុកការលើកឡើងរបស់អាជ្ញាធរថាជាការគេចវេះការដោះស្រាយជូនប្រជាពលរដ្ឋ។
លោកថា៖ «អាជ្ញាធរមិនដោះស្រាយ មិនបម្រើប្រជាពលរដ្ឋដែលគាត់ចង់បានការដោះស្រាយ ក្នុងនាមអាជ្ញាធរគាត់ជាអាណាព្យាបាលរបស់ប្រជាពលរដ្ឋនៅតាមមូលដ្ឋាន។ អ៊ីចឹងបើយើងមិនអើពើបញ្ហារបស់ប្រជាពលរដ្ឋ អាជ្ញាធរខ្លួនឯងជាអ្នកទទួលខុសត្រូវ»។
តំណាងជនជាតិដើមភាគតិចពូនង អ្នកស្រី ក្រេះ សុរ៉ា អះអាងថា ដីព្រៃទំហំ១១ហិកតា ពួកគាត់រក្សាទុកសម្រាប់កប់សព និងធ្វើពិធីសែនព្រេនតាំងពីឆ្នាំ១៩៨០មកម៉្លេះ ហើយកន្លងមកក៏មិនដែលមានអ្នកណាទៅប៉ះពាល់ដីនោះឡើយ៕