ការឈ្លានពានពីសំណាក់ប្រទេសរុស្ស៊ីលើអ៊ុយក្រែន បានធ្វើឱ្យតម្លៃប្រេងកាន់តែហក់ឡើងខ្ពស់សម្រាប់ការប្រើប្រាស់នៅទូទាំងពិភពលោក។ នេះបើតាមការចុះផ្សាយដោយសារព័ត៌មាន Al Jazeera។
គិតត្រឹមថ្ងៃព្រហស្បតិ៍ម្សិលមិញនេះ តម្លៃប្រេងបានកើនឡើងលើស១០០ដុល្លារក្នុងមួយបារ៉ែល (barrel) ជាលើកដំបូង គិតចាប់តាំងពីឆ្នាំ២០១៤ ពោលគឺបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានបញ្ជាឱ្យមានការវាយប្រហារផ្នែកយោធាក្នុងទ្រង់ទ្រាយធំមួយលើអ៊ុយក្រែន ដែលជំរុញឱ្យមានការថ្កោលទោសជាបន្តបន្ទាប់ពីអន្តរជាតិ។
យោងតាមការចុះផ្សាយដោយសារព័ត៌មានដដែល តម្លៃប្រេងឆៅប្រភេទ Brent បានកើនឡើង៧,៣ភាគរយ ដល់១០៣,៩ដុល្លារ ក្នុងមួយបារ៉ែល ដែលជាកម្រិតខ្ពស់បំផុតមួយ គិតចាប់តាំងពីខែកក្កដា ឆ្នាំ២០១៤។
ជាមួយគ្នានេះ អ្នកវិភាគជាច្រើនរំពឹងថា តម្លៃប្រេងក៏នឹងកើនឡើងខ្ពស់បន្ថែមទៀតផងដែរ ស្របពេលដែលមានការព្រួយបារម្ភនៃការរំខានដល់ការផ្គត់ផ្គង់ថាមពលជាសកល។
គួរបញ្ជាក់ថា រុស្ស៊ីគឺជាប្រទេសមួយក្នុងចំណោមប្រទេសផលិតប្រេងឆៅ និងឧស្ម័នធម្មជាតិដ៏ធំបំផុតរបស់ពិភពលោក ដែលផ្ដល់ចំនួន១០ភាគរយនៃការផ្គត់ផ្គង់ក្នុងពិភពលោក និងប្រមាណជា៤០ភាគរយសម្រាប់សហភាពអឺរ៉ុប ខណៈដែលទណ្ឌកម្មរបស់សហរដ្ឋអាមេរិក និងអឺរ៉ុប ក៏នឹងជះឥទ្ធិពលដល់ការផ្គត់ផ្គង់នេះផងដែរ៕