ប្រជាពលរដ្ឋមួយចំនួនបានលើកឡើងថា អ្នកណាដែលធ្លាប់ឆ្លងជំងឺកូវីដ-១៩ម្ដងហើយ នឹងមិនអាចឆ្លងម្ដងទៀតបាននោះទេ ប៉ុន្តែការលើកឡើងនេះត្រូវបានមន្ត្រីរដ្ឋាភិបាលបដិសេធ។
លោកស្រី ឡុញ វណ្ណា អាយុ៣៩ឆ្នាំ រស់នៅកំពង់តាឡុង ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល បានលើកឡើងថា កន្លងមក គាត់ធ្លាប់ឮគេនិយាយតគ្នាថា អ្នកដែលធ្លាប់ឆ្លងជំងឺកូវីដ-១៩ម្ដងហើយ នឹងមិនអាចឆ្លងបានទៀតទេ។
លោកស្រីបន្តថា៖ «ព្រោះអីបានព្យាបាលជារួចមកហើយ អ៊ីចឹងវាមិនកើតឡើងម្ដងទៀតបាននោះទេ ជាពិសេសបានចាក់វ៉ាក់សាំងគ្រប់ដូសទៅទៀត គឺរឹតតែមិនអាចឆ្លងបានទេ»។
ចំណែកលោកស្រី អឿង សារី អាយុ៣៩ឆ្នាំ ជាប្រជាពលរដ្ឋម្នាក់ទៀត រស់នៅភូមិប្រាសាទ ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល មានប្រសាសន៍ថា អ្នកស្រីមិនហ៊ានអះអាងថា អ្នកដែលឆ្លងជំងឺនេះរួច មិនឆ្លងទៀតនោះទេ។ តែបើតាមការយល់ឃើញរបស់លោកស្រី គឺនៅតែអាចឆ្លងបាន គ្រាន់តែវាស្រាលឬក៏ធ្ងន់តែប៉ុណ្ណោះ។
លោកស្រីបន្ថែមថា៖ «ឱ្យតែយើងចេះការពារខ្លួនតាមការណែនាំរបស់ក្រសួងសុខាភិបាល គឺវាមិនអាចកើតម្ដងទៀតនោះទេ។ គ្រាន់តែពេលចាក់វ៉ាក់សាំងហើយ យើងអាចមានអង់ទីករ ឬអាវក្រោះការពារ ដើម្បីកុំឱ្យជំងឺមួយនេះឆ្លងមកទៀតប៉ុណ្ណោះ»។
ចំណែកលោក ភោគ ផាន់នី អាយុ៥២ឆ្នាំ រស់នៅភូមិអំពៅព្រៃ១ ឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល ដែលធ្លាប់ឆ្លងជំងឺកូវីដ-១៩ បានលើកឡើងដែរថា ពីមុនមក លោកក៏គិតថា អ្នកដែលបានព្យាបាលឬក៏ចាក់វ៉ាក់សាំងហើយ គឺមិនអាចឆ្លងម្ដងទៀតនោះទេ។ ប៉ុន្តែលោកថា ក្រោយមក លោកក៏បានឆ្លងម្ដងទៀត ទើបលោកដឹងថា មិនដូចការគិតរបស់លោកឡើយ។
លោកបន្ថែមថា៖ «បើយើងមិនអនុវត្តតាមការណែនាំរបស់ក្រសួងសុខាភិបាលទេ គឺយើងនៅតែបន្ដឆ្លងដដែល»។
លោកបានអំពាវនាវដល់ប្រជាពលរដ្ឋកុំឱ្យមានការព្រួយបារម្ភខ្លាំងពេក ឬក៏មានការរើសអើងចំពោះអ្នកដែលបានឆ្លងជំងឺកូវីដ-១៩។
អភិបាលស្រុកកណ្ដាលស្ទឹង លោក អ៊ូច សាវឿន ដែលធ្លាប់ចុះពន្យល់ដល់ប្រជាពលរដ្ឋនៅមូលដ្ឋាន បានថ្លែងថា ការលើកឡើងរបស់ប្រជាពលរដ្ឋបែបនេះ មិនត្រឹមត្រូវនោះទេ។ លោកថា បើទោះបីជាយើងទទួលបានការព្យាបាលរួចហើយក៏ដោយ ក៏មិនប្រាកដថាមិនឆ្លងទៀតនោះដែរ បើពួកគាត់នៅតែមិនព្រមស្ដាប់តាមការណែនាំរបស់ក្រសួងសុខាភិបាល។
លោកបន្ដថា កន្លងមក លោកក៏ធ្លាប់់ឮពីប្រជាពលរដ្ឋនិយាយបែបនេះដែរ ហើយលោកក៏បានបកស្រាយចំពោះព័ត៌មានមិនពិតនេះខ្លះហើយដែរ។ តែយ៉ាងណា លោកអំពាវនាវដល់ប្រជាពលរដ្ឋបន្ដអនុវត្ដតាមអនុសាសន៍ប្រមុខរដ្ឋាភិបាលឱ្យបានគ្រប់ៗគ្នា ជាពិសេសពេលទៅណាមកណា ត្រូវតែម៉ាស់ជានិច្ច ឧស្សាហ៍លាងអាល់ដៃនឹងអាល់កុលឬជែល និងត្រូវរក្សាគម្លាតសុវត្ថិភាព។
លោកថ្លែងថា៖ «កុំគិតថាជំងឺកូរ៉ូណាជាជំងឺធម្មតា គឺមិនអ៊ីចឹងទេ! ការបាត់បង់ជីវិតលឿនណាស់ ដោយសារជំងឺនេះ»។
យ៉ាងណាក៏ដោយ មន្ត្រីជំនាញមន្ទីរសុខាភិបាលខេត្តកណ្ដាល លោកវេជ្ជបណ្ឌិត គាម ពិសិដ្ឋ បានថ្លែងថា ថ្មីៗនេះ មានករណីជាច្រើនដែលបង្ហាញថា អ្នកដែលបានឆ្លងជំងឺកូវីដ-១៩ម្ដងហើយ នៅតែអាចឆ្លងបានទៀតដដែល បើពួកគេមិនអនុវត្តតាមវិធានសុខាភិបាល។
លោកបញ្ជាក់ថា៖ «កាលពីមុន មានអ្នកឆ្លងវីរុសកូវីដ-១៩ ប្រភេទ ដែលតា [Delta] បានទទួលការព្យាបាលជាសះស្បើយហើយ តែក្រោយមកក៏នៅតែឆ្លងដដែល។ រហូតមកដល់ពេលនេះ ជំងឺកូវីដ-១៩ ប្រភេទ អូមីក្រុង ក៏ដូចគ្នា គឺនៅតែបន្ដឆ្លង បើប្រជាពលរដ្ឋមិនអនុវត្ដតាមការណែនាំរបស់ក្រសួងសុខាភិបាលទេនោះ»។
លោកបន្ថែមថា៖ «សុំកុំឱ្យប្រជាពលរដ្ឋមានការយល់ច្រឡំថា ព្យាបាលហើយមិនអាចកើតវិញ គឺនៅតែកើតដដែល»។
គួររម្លឹកដែរថា ជំងឺកូវីដ-១៩នេះបានឆ្លងចូលមកក្នុងប្រទេសកម្ពុជាលើកដំបូងតាមរយៈបុរសជនជាតិចិនម្នាក់នៅក្រុងព្រះសីហនុ កាលពីថ្ងៃទី២៧ ខែមករា ឆ្នាំ២០២០។ បច្ចុប្បន្ន ជំងឺនេះបានឆ្លងចូលក្នុងសហគមន៍កម្ពុជា ដែលគិតត្រឹមថ្ងៃទី២៤ ខែកុម្ភៈ ឆ្នាំ២០២២នេះ មានអ្នកឆ្លងសរុប១២៨ ៥៩៩នាក់ ស្លាប់៣ ០២៦នាក់ និងជាសះស្បើយចំនួន១២១ ៨៧៧នាក់៕
អត្ថបទ៖ ឃាង សុខមាន ពលរដ្ឋអ្នកសារព័ត៌មាន CCIM ខេត្តកណ្ដាល
