ក្រសួងសុខាភិបាលបានប្រកាសរកឃើញអ្នកឆ្លងកូវីដ-១៩ ប្រភេទ«អូមីក្រុង» ចំនួនជិត៤០០ករណីបន្ថែមទៀត ដោយចំនួននេះមានការថយចុះប្រមាណ ១០០ករណី បើធៀបនឹងការប្រកាសរកឃើញរបស់ក្រសួងកាលពីម្សិលមិញ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២៧ ខែកុម្ភៈ ឆ្នាំ២០២២ បានឱ្យដឹងថា កាលពីម្សិលមិញ ក្រសួងបានរកឃើញមានអ្នកជំងឺកូវីដ-១៩ ប្រភេទបំប្លែងខ្លួន «អូមីក្រុង»ចំនួន ៣៧២នាក់។ អ្នកជំងឺដែលរកឃើញឆ្លងថ្មីទាំងនោះ មាន ៣៤៤ករណី ជាការរកឃើញឆ្លងចូលក្នុងសហគមន៍ និង២៨ករណីទៀត ជាការនាំចូលពីក្រៅប្រទេស។ ជាមួយគ្នានេះ ក្រសួងបញ្ជាក់ថាមិនមានករណីស្លាប់ថ្មីនោះឡើយ ខណៈអ្នកជំងឺព្យាបាលជាសះស្បើយថ្មីមានចំនួន ៤៧៦នាក់ផងដែរ។
កាលពីថ្ងៃសៅរ៍ម្សិលមិញ ក្រសួងសុខាភិបាលបានប្រកាសរកឃើញករណីឆ្លងថ្មីចំនួន៤៧០នាក់ដែលជាប្រភេទអូមីក្រុងទាំងអស់ និងស្លាប់ថ្មីចំនួន៥នាក់ ហើយករណីនាំចូលពីក្រៅប្រទេសមានចំនួន៣៥នាក់ និងឆ្លងក្នុងសហគមន៍ចំនួន ៤៣៥នាក់។
ក្រសួងបញ្ជាក់ថា មកទល់ព្រឹកថ្ងៃអាទិត្យនេះ កម្ពុជារកឃើញករណីជំងឺកូវីដ-១៩ប្រភេទបំប្លែងខ្លួន «អូមីក្រុង» បានឆ្លងចូលទៅក្នុងសហគមន៍មានចំនួនសរុប ៨ ៦១៤ករណី។
កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន «អូមីក្រុង» ជាលើកដំបូង កាលពីថ្ងៃទី ១៤ខែធ្នូ ឆ្នាំ២០២១ លើស្ត្រីខ្មែរម្នាក់ ដែលធ្វើដំណើរពីប្រទេសហ្គាណា នៃតំបន់អាហ្វ្រិកខាងលិច មកកម្ពុជា។
គិតត្រឹមព្រឹកថ្ងៃអាទិត្យដដែលនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២៩ ៩២០នាក់ ក្នុងនោះ អ្នកជំងឺព្យាបាលជាសះស្បើយចំនួន១២៣ ៣៥៣នាក់ អ្នកស្លាប់ចំនួន៣ ០៣២នាក់ និងករណីនាំចូលពីក្រៅប្រទេសចំនួន ២០ ៧២២នាក់៕
