ក្រសួងសុខាភិបាលបានប្រកាសពីការរកឃើញករណីឆ្លងវីរុសកូវីដ-១៩ បំប្លែងថ្មី «អូមីក្រុង» ជាង៣៥០នាក់បន្ថែមទៀត ខណៈករណីស្លាប់មិនមានទេ កាលពីថ្ងៃម្សិលមិញ។
សេចក្ដីជូនព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី២៨ ខែកុម្ភៈ ឆ្នាំ២០២២នេះ បានឱ្យដឹងថា ដោយផ្អែកតាមលទ្ធផលបញ្ជាក់ដោយ PCR test កាលពីថ្ងៃម្សិលមិញ រកឃើញករណីឆ្លងជំងឺកូវីដ-១៩ បំប្លែងថ្មី ប្រភេទ «អូមីក្រុង» ចំនួន៣៥៦ករណីបន្ថែមទៀត ខណៈករណីជាសះស្បើយសរុបមានចំនួន៤១៩ករណី និងគ្មានករណីស្លាប់នោះទេ។
ក្រសួងបានបញ្ជាក់ថា ក្នុងចំណោមអ្នកឆ្លងថ្មីទាំង៣៥៦នាក់នោះ មានករណីនាំចូលពីក្រៅប្រទេសចំនួន១៤នាក់ និងឆ្លងក្នុងសហគមន៍ចំនួន៣៤២នាក់ ដែលសុទ្ធតែជាវីរុសបំប្លែងថ្មី ប្រភេទ អូមីក្រុង (Omicron) ទាំងអស់។
បើតាមក្រសួងសុខាភិបាល គិតត្រឹមព្រឹកថ្ងៃចន្ទនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣០ ២៧៦នាក់ ក្នុងនោះ អ្នកជំងឺព្យាបាលជាសះស្បើយចំនួន១២៣ ៧៧២នាក់ និងអ្នកស្លាប់ចំនួន៣ ០៣២នាក់។ រីឯករណីឆ្លង «អូមីក្រុង» ក្នុងសហគមន៍វិញ ក្រសួងថា គិតមកដល់ពេលនេះបានកើនឡើងដល់៨ ៩៥៦នាក់ហើយ៕