អ្នកនាំពាក្យក្រសួងការបរទេសចិន លោក Wang Wenbin បានលើកឡើងនៅថ្ងៃចន្ទនេះថា ភាគីពាក់ព័ន្ធនឹងវិបត្តិអ៊ុយក្រែនទាំងអស់ គួរតែរក្សាភាពអត់ធ្មត់ និងចៀសវាងការធ្វើឱ្យស្ថានការណ៍កាន់តែធ្ងន់ធ្ងរបន្ថែមទៀត។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការជំរុញដោយអ្នកនាំពាក្យការបរទេសរូបនេះបានធ្វើឡើងបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានបញ្ជាដាក់អាវុធនុយក្លេអ៊ែរប្រទេសរបស់លោកឱ្យស្ថិតក្នុងការត្រៀមខ្ពស់។
ថ្លែងនៅក្នុងសន្និសីទសារព័ត៌មានប្រចាំថ្ងៃមួយ លោក Wang Wenbin ក៏បានបញ្ជាក់សារជាថ្មីផងដែរនូវជំហររបស់ប្រទេសចិន ដែលថាការព្រួយបារម្ភផ្នែកសន្តិសុខស្របច្បាប់របស់ប្រទេសទាំងអស់គួរតែត្រូវបានយកចិត្តទុកដាក់យ៉ាងខ្លាំង។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្តើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកកាន់ប្រទេសមួយនេះ។
ទោះជាយ៉ាងណា ភាគីទាំងពីរក៏បានយល់ព្រមក្នុងការជួបចរចាគ្នាជាលើកដំបូងដែលនឹងត្រូវធ្វើឡើងនៅថ្ងៃនេះផងដែរ៕