នគរបាលជាតិកម្ពុជា បានលើកឡើងថា ខ្លួនបានចាត់វិធានការលើមនុស្ស៤នាក់ ក្នុងនោះមានម្នាក់ជាជនជាតិចិន ដែលពួកគេបានគប់គិតគ្នាប្រតិដ្ឋព័ត៌មាន ដោយធ្វើជាជនរងគ្រោះត្រូវបានគេចាប់ឱ្យធ្វើជាទាសករបូមយកឈាមលក់។
អគ្គស្នងការដ្ឋាននគរបាលជាតិ បានលើកឡើងក្នុងសេចក្ដីប្រកាសព័ត៌មានចុះថ្ងៃទី២៨ ខែកុម្ភៈ ឆ្នាំ២០២២ ថាក្រោយពីឃើញសារព័ត៌មាន និងបណ្ដាញទំនាក់ទំនងសង្គមមួយចំនួនចុះផ្សព្វផ្សាយព័ត៌មានស្ដីការចាប់បង្ខាំងជនជាតិចិនធ្វើជាទាសករលក់ឈាមនៅតំបន់ឆៃណាថោន ក្នុងខេត្តព្រះសីហនុ រួចមក អង្គភាពជំនាញបានចុះស្រាវជ្រាវរកឃើញថាព័ត៌មាននោះជារឿងប្រឌិត។
នគរបាលជាតិបានគូសបញ្ជាក់ថា ព័ត៌មានទាំងនោះប្រតិដ្ឋឡើងដោយឈ្មោះ LI YA YUAN LUN ភេទប្រុស ជនជាតិចិន អាយុ៣១ឆ្នាំ ស្នាក់នៅមន្ទីរពេទ្យប៊ីធនកម្ពុជា-ចិន រាជធានីភ្នំពេញ និងអ្នកពាក់ព័ន្ធចំនួន៣នាក់ទៀត។
ប្រភពដដែលឱ្យដឹងទៀតថា បុរសអាយុ៣១ឆ្នាំរូបនោះបានប្រតិដ្ឋរឿងថាខ្លួនជាជនរងគ្រោះ តែធាតុពិត រូបគេ «បានលួចឆ្លងដែនចូលប្រទេសកម្ពុជាដោយខុសច្បាប់ ប៉ុន្តែដោយមានជំងឺប្រចាំកាយ ក៏បានទាក់ទងមនុស្សមួយក្រុម ដើម្បីជួយរកវិធីដោះស្រាយបញ្ហារបស់ខ្លួន […] ក្នុងការរៀងចំគម្រោងប្រតិដ្ឋព័ត៌មានក្លែងក្លាយ ដើម្បីគេចផុតពីការទទួលខុសត្រូវចំពោះមុខច្បាប់នៅកម្ពុជា»។
ប្រភពដដែលបញ្ជាក់ថា បច្ចុប្បន្ន អ្នកទាំង៤នាក់ មានទាំងស្ត្រីម្នាក់ផង ត្រូវបានសមត្ថកិច្ចឃាត់ខ្លួនកសាងសំណុំរឿងបញ្ជូនទៅតុលាការ ដើម្បីចាត់ការតាមផ្លូវច្បាប់។
ករណីរកឃើញនេះ អគ្គស្នងការដ្ឋាននគរបាលជាតិបានអំពាវនាវឱ្យសារព័ត៌មាននិងអ្នកប្រើប្រាស់បណ្ដាញសង្គមធ្វើការកែសម្រួលឡើងវិញ នូវការផ្សព្វផ្សាយព័ត៌មាននេះ ដើម្បីចៀសវាងការភ័ន្តច្រឡំ និងប៉ះពាល់បរិយាកាសសង្គម និងបង្កឱ្យមានភាពភ័យខ្លាចដល់ទេសចរណ៍ជាតិនិងអន្តរជាតិ ព្រមទាំងអ្នកវិនិយោគនៅកម្ពុជា៕