ការិយាល័យប្រធានាធិបតីអ៊ុយក្រែន លោក Volodymyr Zelenskiy បានឱ្យដឹងនៅថ្ងៃអាទិត្យម្សិលមិញថា មន្ត្រីរបស់ខ្លួន និងភាគីរុស្ស៊ី នឹងជួបពិភាក្សាគ្នានៅទីតាំងមួយកន្លែងនៅព្រំដែនប្រទេសបេឡារុស ដែលជាជំនួបលើកដំបូងបន្ទាប់ពីរុស្ស៊ីបើកការឈ្លានពានលើអ៊ុយក្រែន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រធានាធិបតីអ៊ុយក្រែនរូបនេះបន្តថា កិច្ចពិភាក្សាដែលជាជំនួបលើកដំបូង គិតចាប់តាំងពីរុស្ស៊ីបានបើកការឈ្លានពានក្នុងទ្រង់ទ្រាយធំលើអ៊ុយក្រែន កាលពីសប្ដាហ៍មុននេះ នឹងត្រូវធ្វើឡើងដោយគ្មានការកំណត់លក្ខខណ្ឌជាមុននោះទេ និងបន្ទាប់ពីកិច្ចសន្ទនាតាមទូរសព្ទរវាងខ្លួននិងប្រធានាធិបតីបេឡារុស។
លោក Volodymyr Zelenskiy បានបន្ថែមឱ្យដឹងនៅក្នុងសេចក្ដីថ្លែងការណ៍មួយថា៖ «យើងបានយល់ព្រមក្នុងការឱ្យគណៈប្រតិភូអ៊ុយក្រែន ជួបជាមួយគណៈប្រតិភូរុស្ស៊ី ដោយគ្មានការកំណត់លក្ខខណ្ឌជាមុន ដែលជំនួបនេះនឹងធ្វើឡើងនៅព្រំដែនអ៊ុយក្រែន-បេឡារុស ជិតទន្លេ Pripyat»។
គួរបញ្ជាក់ថា រុស្ស៊ីបានបើកការឈ្លានពានរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍សប្ដាហ៍មុន ពោលគឺបន្ទាប់ពីមានការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះមនុស្សរាប់រយនាក់ក៏ត្រូវបានរាយការណ៍ថាបានរងរបួស និងស្លាប់បាត់បង់ជីវិតផងដែរ៕
