អ្នកនាំពាក្យក្រសួងការបរទេសចិន លោក Wang Wenbin បានថ្លែងប្រាប់សន្និសីទសារព័ត៌មានមួយនៅថ្ងៃពុធនេះថា ពលរដ្ឋរបស់ខ្លួនជាង២ ៥០០នាក់ត្រូវបានផ្លាស់ប្ដូរទីតាំងចេញពីប្រទេសអ៊ុយក្រែន ខណៈប្រទេសមួយនេះបច្ចុប្បន្នកំពុងតែរងការឈ្លានពានក្នុងទ្រង់ទ្រាយធំដោយរុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រទេសចិនក៏ធ្លាប់បានឱ្យដឹងកាលពីពេលកន្លងទៅថា ពលរដ្ឋរបស់ខ្លួនដែលកំពុងរស់នៅក្នុងប្រទេសអ៊ុយក្រែនសរុបមានចំនួនប្រមាណជា៦ ០០០នាក់។
ស្ថានទូតចិនប្រចាំនៅប្រទេសអ៊ុយក្រែន ក៏ធ្លាប់បានជូនដំណឹងដល់ពលរដ្ឋនិងធុរកិច្ចទាំងឡាយរបស់ខ្លួនឱ្យចៀសវាងទៅកាន់តំបន់អស្ថិរភាពទាំងឡាយក្នុងប្រទេសអ៊ុយក្រែនផងដែរ ស្របពេលដែលប្រទេសមួយនេះបច្ចុប្បន្នកំពុងតែស្ថិតនៅក្នុងវិបត្តិជាមួយប្រទេសរុស្ស៊ី។
ជាមួយគ្នានេះ លោក Wang Wenbin កាលពីថ្ងៃចន្ទកន្លងទៅ ក៏បានជំរុញឱ្យភាគីពាក់ព័ន្ធនឹងវិបត្តិអ៊ុយក្រែនទាំងអស់ គួរតែរក្សាភាពអត់ធ្មត់ និងចៀសវាងការធ្វើឱ្យស្ថានការណ៍កាន់តែធ្ងន់ធ្ងរបន្ថែមទៀតផងដែរ។
ការជំរុញដោយអ្នកនាំពាក្យការបរទេសរូបនេះបានធ្វើឡើងបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានបញ្ជាដាក់អាវុធនុយក្លេអ៊ែរប្រទេសរបស់លោកឱ្យស្ថិតក្នុងការត្រៀមខ្ពស់៕