លោកនាយករដ្ឋមន្ត្រី ហ៊ុន សែន ថ្លែងថា សង្គ្រាមរវាងប្រទេសរុស្ស៊ី និងអ៊ុយក្រែន អាចនឹងបង្កផលប៉ះពាល់ដល់សេដ្ឋកិច្ចពិភពលោក ក៏ដូចជាសេដ្ឋកិច្ចនៅកម្ពុជា ដោយសារការកើនឡើងនូវតម្លៃប្រេង ស្របពេលដែលកម្ពុជាជាប្រទេសដែលនាំចូលប្រេងទាំងស្រុង។
ក្នុងពិធីសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ៣ ភ្នំពេញ-កំពត នៅថ្ងៃទី២ ខែមីនានេះ លោកនាយករដ្ឋមន្ត្រី ហ៊ុន សែន ថ្លែងថា សេដ្ឋកិច្ចនៅកម្ពុជាកំពុងតែរងផលប៉ះពាល់ដោយសារតែវិបត្តិជំងឺកូវីដ-១៩ ស្របពេលដែលសង្គ្រាមរវាងប្រទេសរុស្ស៉ី និងប្រទេសអ៊ុយក្រែន កើតឡើងចាប់ពីថ្ងៃទី២៤ ខែកុម្ភៈ រហូតមកដល់បច្ចុប្បន្ននេះ ក៏នឹងអាចធ្វើឱ្យសេដ្ឋកិច្ចកម្ពុជារងផលប៉ះពាល់ថែមមួយកម្រិតទៀតផងដែរ ដោយសារតម្លៃប្រេងឡើងថ្លៃ។
លោកថា៖ «សេដ្ឋកិច្ចរបស់កម្ពុជារងផលប៉ះពាល់ពីកូវីដ-១៩ ក៏ប៉ុន្តែអាចនឹងរងផលប៉ះពាល់បន្ថែមទៀត ដោយសារតែសង្គ្រាមរុស្ស៉ី-អ៊ុយក្រែន ហើយកំពុងតែពង្រីកទៅជាសង្គ្រាមរុស្ស៉ីជាមួយអឺរ៉ុប […] យើងបានមើលឃើញផលប៉ះពាល់ដល់ពិភពលោក និយាយជារួម និងនិយាយដោយឡែក ចំពោះកម្ពុជា គឺប្រេងឡើងថ្លៃ ហើយនឹងអាចរុញអតិផរណានៅតាមបណ្ដាប្រទេសផ្សេងៗឱ្យកើនខ្ពស់ដោយសារតម្លៃប្រេង»។
លោកនាយករដ្ឋមន្ត្រី ហ៊ុន សែន ក៏បានសុំការយោគយល់ពីប្រជាពលរដ្ឋចំពោះការកើនឡើងនៃតម្លៃប្រេងសាំងនេះ ខណៈការកើនឡើងនេះមិនមែនកើតឡើងតែនៅកម្ពុជានោះទេ គឺប្រទេសផ្សេងៗនៅលើពិភពលោកក៏រងផលប៉ះពាល់ដូចគ្នានេះដែរ។
តម្លៃប្រេងនៅកម្ពុជាបានកើនឡើងជាបន្តបន្ទាប់នារយៈពេលប៉ុន្មានខែចុងក្រោយនេះ ដោយបច្ចុប្បន្ននេះ តម្លៃប្រេងលក់រាយតាមស្ថានីយដែលកំណត់ដោយក្រសួងពាណិជ្ជកម្ម គឺសាំងធម្មតាតម្លៃ៤ ៨០០រៀល និងម៉ាស៊ូតតម្លៃ៤ ៥០០រៀល ខណៈសាំងស៊ុបពែតម្លៃ៥ ៣៥០រៀល។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិត គី សេរីវឌ្ឍន៍ មានប្រសាសន៍ថា បើសង្គ្រាមរវាងរុស្ស៉ី និងអ៊ុយក្រែន កើតឡើងរយៈពេលខ្លី នឹងធ្វើឱ្យប៉ះពាល់សេដ្ឋកិច្ចកម្ពុជាតិចតួចតែប៉ុណ្ណោះ។ ក្រៅពីបញ្ហាប្រេងឡើងថ្លៃ លោកមើលឃើញថា កម្ពុជាក៏អាចរងនូវផលប៉ះពាល់ផ្នែកវិស័យកាត់ដេរផងដែរ បើសង្គ្រាមនោះអូសបន្លាយរ៉ាំរ៉ៃយូរ ហើយធ្វើឱ្យប៉ះពាល់ដល់អឺរ៉ុបទាំងមូល។
អ្នកជំនាញសេដ្ឋកិច្ចរូបនោះផ្ដល់ជាអនុសាសន៍ថា ដើម្បីទប់ស្កាត់កុំឱ្យកម្ពុជារងផលប៉ះពាល់សេដ្ឋកិច្ច កម្ពុជាមិនត្រូវពឹងផ្អែកការនាំចេញសម្លៀកបំពាក់ទៅអឺរ៉ុបតែមួយមុខនោះទេ គឺត្រូវត្រៀមរៀបចំយុទ្ធសាស្ត្រផលិតអង្ករ និងធ្វើកិច្ចព្រមព្រៀងពាណិជ្ជកម្មសេរីជាមួយប្រទេសកូរ៉េ ជាដើម ។
លោកថា៖ «ត្រូវត្រៀមការផលិតផ្គត់ផ្គង់នូវអង្ករទៅកាន់អឺរ៉ុបអាចនឹងច្រើនជាងមុន ហើយទី២ យើងត្រូវធ្វើពិពិធកម្មរបស់យើងកុំឱ្យពឹងផ្អែកតែលើវិស័យកាត់ដេរតែមួយមុខ និងទី៣ ត្រូវអនុវត្តឱ្យបានលឿននូវកិច្ចព្រមព្រៀងពាណិជ្ជកម្មសេរីជាមួយកូរ៉េ ដែលធ្វើឱ្យយើងនាំសម្លៀកបំពាក់ទៅកាន់កូរ៉េបាន ដើម្បីជំនួសការនាំចេញទៅអឺរ៉ុប»៕