ព្រះមហាក្សត្រខ្មែរ សម្រេចបញ្ចប់មុខតំណែងអនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មួយរូប ប៉ុន្តែមិនបានបញ្ជាក់មូលហេតុនោះឡើយ។
ព្រះរាជក្រឹត្យរបស់ព្រះមហាក្សត្រ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី កាលពីថ្ងៃទី១ ខែមីនា ឆ្នាំ២០២២ បានសម្រេចបញ្ចប់មុខតំណែងអនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ប៊ិន សម្បត្តិថារ័ត្ន។
ព្រះរាជក្រឹត្យសរសេរថា៖ «សម្ដេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្តលេខាតទៅ»។
ក្នុងករណីនេះ វីអូឌី ក៏បានព្យាយាមទាក់ទងសុំការបំភ្លឺបន្ថែមពីអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត ប៉ុន្តែមិនមានការឆ្លើយតបនោះឡើយ នៅថ្ងៃពុធនេះ។
លោក ប៊ិន សម្បត្តិថារ័ត្ន ជាប្រធានក្រុមការងារថ្នាក់កណ្ដាល ចុះជួយឃុំជាំ និងជាអនុប្រធានក្រុមការងារចុះជួយស្រុកមេមត់ ក្នុងខេត្តត្បូងឃ្មុំ។
កន្លងមក ព្រះមហាក្សត្រខ្មែរ ក៏ធ្លាប់ចេញព្រះរាជក្រឹត្យបញ្ចប់មុខតំណែងពីអនុរដ្ឋលេខាធិការ រដ្ឋលេខាធិការរបស់មន្ត្រីក្នុងជួររដ្ឋាភិបាលនៅតាមក្រសួងមួយចំនួនផងដែរ ក្រោយមានបញ្ហាផ្សេងៗ ពិសេសការរំលោភដីធ្លីរបស់ពលរដ្ឋ និងដីព្រៃរបស់រដ្ឋ។
ជាក់ស្ដែងកាលពីថ្ងៃទី២៤ ខែសីហា ឆ្នាំ២០១៩ ព្រះមហាក្សត្របានចេញព្រះរាជក្រឹត្យមួយ ដោយសម្រេចដកតំណែងអនុរដ្ឋលេខាធិការក្រសួងយុត្តិធម៌របស់លោក សេង សុវណ្ណារ៉ា ក្រោយពេលមានវិវាទដីធ្លីជិត២ពាន់ហិកតានៅតំបន់ដែនអភិរក្សក្នុងខេត្តមណ្ឌលគិរី។
ក្រោយមក អតីតអនុរដ្ឋលេខាធិការក្រសួងយុត្តិធម៌រូបនេះក៏ត្រូវបានរដ្ឋមន្ត្រីក្រសួងមហាផ្ទៃ លោក ស ខេង សម្រេចដកតំណែងចេញពីក្រុមការងារថ្នាក់ជាតិចុះជួយខេត្តមណ្ឌលគិរីផងដែរ។
ក្រោយបញ្ចប់មុខតំណែងអស់ លោក សេង សុវណ្ណារ៉ា ត្រូវបានសមត្ថកិច្ចឃាត់ខ្លួនកាលពីថ្ងៃទី២៦ ខែមិថុនា ឆ្នាំ២០២០ ហើយតុលាការក៏សម្រេចឃុំខ្លួនលោកជាបណ្ដោះអាសន្ន។ ជាងមួយឆ្នាំក្រោយមក លោកត្រូវបានសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ២ឆ្នាំ៦ខែ ពីបទ «គប់គិតគ្នារំលោភបំពានដីសាធារណៈរបស់រដ្ឋដោយខុសច្បាប់» នៅខេត្តមណ្ឌលគិរី៕
