វិមានក្រឹមឡាំង (Kremlin) បានឱ្យដឹងថា មន្ត្រីរុស្ស៊ីនានាបានត្រៀមខ្លួនរួចជាស្រេចសម្រាប់កិច្ចចរចាបន្ថែមទៀតជាមួយអ៊ុយក្រែននៅថ្ងៃពុធនេះ ប៉ុន្តែពួកគេមិនច្បាស់ថាតើមន្ត្រីអ៊ុយក្រែនអាចនឹងចូលរួមបានឬយ៉ាងណានោះទេ។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យវិមានក្រឹមឡាំង លោក Dmitry Peskov ដែលបានថ្លែងថា វាអាចនឹងមានព័ត៌មានខុសៗគ្នាទាក់ទងនឹងកិច្ចពិភាក្សានេះ។
ទោះជាយ៉ាង ប្រធានាធិបតីអ៊ុយក្រែន លោក Volodymyr Zelenskiy បានឱ្យដឹងកាលពីថ្ងៃអង្គារម្សិលមិញថា ដើម្បីកិច្ចចរចានានាអាចប្រព្រឹត្តទៅបាន គឺរុស្ស៊ីត្រូវតែបញ្ឈប់ការបំផ្ទុះគ្រាប់បែកលើទីក្រុងនានារបស់អ៊ុយក្រែន។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកកាន់ប្រទេសមួយនេះ ដែលបានធ្វើឱ្យបណ្ដាប្រទេសមួយចំនួន រួមមាន សហភាពអឺរ៉ុប សហរដ្ឋអាមេរិក និងបណ្ដាប្រទេសដទៃទៀត រួមគ្នាក្នុងការចាត់វិធានការនានាលើរុស្ស៊ីផងដែរ។
ជាការឆ្លើយតប លោក Dmitry Peskov បានបញ្ជាក់ថា រុស្ស៊ីត្រូវការបង្កើតនូវការឆ្លើយតបដ៏ធ្ងន់ធ្ងរនិងច្បាស់លាស់មួយ ដើម្បីប្រឆាំងនឹងវិធានការនានាដែលបានដាក់ដោយបណ្តាប្រទេសលោកខាងលិចក្នុងការបំផ្លាញសេដ្ឋកិច្ចរុស្ស៊ី៕
