អ្នកភូមិអះអាងថា ពួកគាត់ប្រហែល១០០នាក់ តំណាងឱ្យពលរដ្ឋ៨៨គ្រួសារ រស់នៅជាប់បឹងតាមោក ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ បានប្រមូលផ្ដុំគ្នាតវ៉ាមុខសាលាសង្កាត់ ដើម្បីទាមទារឱ្យអាជ្ញាធរដោះស្រាយសំណងផលប៉ះពាល់ដីធ្លី។
លោក ជ័រ សារិន ដែលអះអាងថាជាតំណាងប្រជាពលរដ្ឋ ប្រាប់វីអូឌីថា ដី៧៩ហិកតារបស់អ្នកភូមិ៨៨គ្រួសារដែលនៅជាប់បឹងកប់ស្រូវ ឬបឹងតាមោក ស្ថិតក្នុងភូមិកប់ស្រូវ សង្កាត់គោករកា ត្រូវបានក្រុមហ៊ុនឯកជនមួយដែលមិនស្គាល់ឈ្មោះ បានធ្វើសកម្មភាពដឹកដីចាក់លុបយកធ្វើកម្មសិទ្ធិតាំងពីចុងឆ្នាំ២០២១ ដោយមិនបានដោះស្រាយផលប៉ះពាល់ឡើយ។
តំណាងពលរដ្ឋរូបនេះអះអាងថា ដីនោះអ្នកភូមិបានចូលទៅអាស្រ័យផលតាំងពីឆ្នាំ១៩៧៩ រហូតមកដល់បច្ចុប្បន្ន ដោយធ្វើស្រែប្រាំង ដាំឈូក និងបន្លែបង្ការផ្សេងៗទៀតសម្រាប់ចិញ្ចឹមជីវិត ប៉ុន្តែពេលនេះដីនោះត្រូវបានចាក់លុបអស់ប្រហែល៧០ភាគរយទៅហើយ។
លោក ជ័រ សារិន ឱ្យដឹងថា កន្លងមក អ្នកភូមិធ្លាប់រកកិច្ចអន្តរាគមន៍ពីអាជ្ញាធរមូលដ្ឋានឱ្យជួយដោះស្រាយដែរ ប៉ុន្តែអាជ្ញាធរពុំមានចំណាត់ការណាមួយឡើយ ទើបពួកគាត់នាំគ្នាមកតវ៉ានៅសាលាសង្កាត់គោករកាម្ដងទៀត ដើម្បីជំរុញឱ្យមានដំណោះស្រាយ។
លោកបន្ថែមថា៖ «ប្រជាជនទៅទាមទារឱ្យគាត់ [ចៅសង្កាត់] បើសិនគាត់អត់មានសមត្ថភាពដោះស្រាយរឿងហ្នឹងទេ សុំឱ្យគាត់បញ្ជូនសំណុំរឿងហ្នឹងទៅថ្នាក់លើទៀត ដោះស្រាយបន្ត ពីព្រោះវាបានធ្វើឱ្យប៉ះពាល់យ៉ាងធ្ងន់ធ្ងរដល់ជីវភាពរបស់ពួកយើង។ ចុះបើគេចាក់ដីលុបគោកអស់ហើយ យើងមិនអត់កន្លែងសម្រាប់រកស៊ី? អ៊ីចឹងសុំឱ្យសម្ដេចដែលជាម្លប់របស់កូនចៅហ្នឹង ជួយអន្តរាគមន៍ បើក្រុមហ៊ុនណាចាក់លុបដីពួកយើងអស់ហើយ សុំដោះស្រាយសំណងជូនពួកយើងផង»។
ពលរដ្ឋម្នាក់ទៀត លោក លា សំណាង នៅភូមិកប់ស្រូវតូច អះអាងថា គ្រួសារលោកមានដីទំហំ២ហិកតា ដែលបានចូលអាស្រ័យផលតាំងពីឆ្នាំ១៩៩០ ដោយធ្វើស្រែប្រាំង ដាំឈូក និងដាំបន្លែនៅរដូវទឹកស្រក។ លោកថា ដីនេះត្រូវក្រុមហ៊ុនមួយដែលមិនស្គាល់ឈ្មោះ ធ្វើសកម្មភាពចាក់លុបអស់កាលពីចុងឆ្នាំ២០២១ ហើយបច្ចុប្បន្ន គ្រួសាររបស់លោកពុំមានដីសម្រាប់បង្កបង្កើនផលទៀតឡើយ។
ពលរដ្ឋរូបនេះបន្តថា រូបលោកនិងពលរដ្ឋផ្សេងទៀតទាមទារឱ្យអាជ្ញាធរដោះស្រាយសំណងជាគោលនយោបាយ ខណៈដីនោះពួកគាត់បានចូលអាស្រ័យផលជាង៣០ឆ្នាំទៅហើយ។
លោកបន្ថែមថា៖ «ការដោះស្រាយដូចអត់តម្លាភាពសោះ អាអ្នកអត់មានដីបែរជាបានលុយ ចំណែកអ្នកមានដីបែរជាអត់បានលុយវិញ។ អ៊ីចឹងពួកយើងទាមទារឱ្យមានការដោះស្រាយជាគោលនយោបាយសម្រាប់ពួកយើង។ បើមិនដោះស្រាយឱ្យទេ ពួកយើងនឹងទៅតវ៉ាដល់លើទៀត»។
វីអូឌី មិនអាចសុំការឆ្លើយតបពីចៅសង្កាត់គោករកា លោក សន ស៊ីន បានទេ នៅថ្ងៃនេះ។
ប៉ុន្តែលោកប្រាប់ វីអូឌី កាលពីថ្ងៃទី២៥ ខែកុម្ភៈ ថាបញ្ហាជម្លោះដីធ្លីនេះហួសពីដែនសមត្ថកិច្ចរបស់លោកក្នុងការដោះស្រាយ។
ចៅសង្កាត់រូបនេះអះអាងថា តំបន់ដីដែលកំពុងរងការចាក់លុបនោះ គឺជាដីរបស់រដ្ឋ ដែលរដ្ឋាភិបាលបានចេញអនុក្រឹត្យផ្ដល់ជូនទៅក្រសួងមួយចំនួន ដើម្បីសាងសង់និងអភិវឌ្ឍន៍ហេដ្ឋារចនាសម្ព័ន្ធផ្សេងៗ។
ប្រធានកម្មវិធីនៃអង្គការសមាគមធាងត្នោត លោក ឯម ខេមរា មានប្រសាសន៍ថា រដ្ឋាភិបាលបានកាត់ដីផ្ទៃបឹងតាមោក ឬបឹងកប់ស្រូវ អស់ជាច្រើនហិកតាទៅឱ្យក្រុមហ៊ុនឯកជន និងអ្នកមានលុយមានអំណាចជាបន្តបន្ទាប់ ដែលការកាត់នេះធ្វើឱ្យមានក្ដីបារម្ភចំពោះផលប៉ះពាល់បរិស្ថាន និងសង្គម ដូចជា ការបាត់បង់កន្លែងស្តុកឬរំដោះទឹកពីការជន់លិចរាជធានីភ្នំពេញ និងប៉ះពាល់ដល់ដីអាស្រ័យរបស់ប្រជាសហគមន៍ក្រីក្រ ជាដើម។
ករណីនេះ លោកបានទទូចទៅអាជ្ញាធរពាក់ព័ន្ធគួរដោះស្រាយបញ្ហានេះតាមនីតិវិធីជូនពលរដ្ឋ ដើម្បីធានាពីសិទ្ធិទទួលបានជីវភាពសមរម្យ ក្រោយពួកគេបាត់បង់ដីអាស្រ័យផល។ លោកថា ប្រសិនបើពុំមានការដោះស្រាយសមស្របណាមួយជូនពលរដ្ឋទេ នឹងអាចកើតមានសកម្មភាពតវ៉ាផ្សេងៗ និងប៉ះពាល់ដល់ជីវភាពរស់នៅរបស់ប្រជាពលរដ្ឋទាំងនោះផងដែរ។
លោកបន្ថែមថា៖ «អ្វីដែលសមាគមធាងត្នោតយើងឃ្លាំមើលការអភិវឌ្ឍនៅនឹងបឹងនោះ គឺរដ្ឋាភិបាលបានកាត់ដីជូនក្រុមហ៊ុនឯកជន និងបុគ្គលឯកជនហ្នឹង គឺរដ្ឋកាត់បាន ហេតុអីបានឯកជនទាំងហ្នឹងមានសិទ្ធិទទួលបានដីសាធារណៈរបស់រដ្ឋ? ចុះហេតុអីបានប្រជាពលរដ្ឋអត់មានសិទ្ធិប្រកបមុខរបរ ឬក៏ទទួលផល ដើម្បីចិញ្ចឹមរបស់ពួកគាត់ពីផ្ទៃបឹងតាមោកនេះបាន? អ៊ីចឹងរដ្ឋាភិបាលត្រូវថ្លឹងថ្លែងចំណុចហ្នឹង ពីព្រោះប្រជាពលរដ្ឋក៏គាត់មានសិទ្ធិក្នុងការទទួលបានសិទ្ធិរស់រានមានជីវិត សិទ្ធិប្រកបការងារ ដែលអ្វីទាំងនេះ រដ្ឋាភិបាលមានកាតព្វកិច្ចក្នុងការដោះស្រាយជូនពលរដ្ឋ»។
បឹងតាមោក ឬបឹងកប់ស្រូវ មានផ្ទៃដីសរុប៣ ២៣៩ហិកតា ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះ ត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បតិ្តសាធារណៈរបស់រដ្ឋ។
បើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោកសរុបជាង២ ០០០ហិកតាហើយត្រូវបានរដ្ឋាភិបាលកាត់ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជនមួយចំនួនដែលគេដឹងថា ជាអ្នកមានប្រាក់និងមានអំណាច សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន៕
