ម្ចាស់ក្លឹបបាល់ទាត់យក្ស Chelsea លោក Roman Abramovich បានឱ្យដឹងថា រូបលោកកំពុងតែដាក់លក់ក្លឹបបាល់ទាត់មួយនេះ បន្ទាប់ពីកាន់កាប់អស់រយៈពេលជិតពីរទសវត្សរ៍ ស្របពេលដែលខ្លួនកំពុងតែរងសម្ពាធពីវិបត្តិរវាងរុស្សី និងអ៊ុយក្រែន។ នេះបើតាមការចុះផ្សាយដោយសារព័ត៌មាន Bloomberg។
មហាសេដ្ឋីដែលបានទិញក្លឹបបាល់ទាត់មួយនេះដំបូងក្នុងឆ្នាំ២០០៣ បានបន្ថែមឱ្យដឹងថា រូបលោកក៏បានណែនាំក្រុមប្រឹក្សាភិបាលឱ្យបង្កើតមូលនិធិសប្បុរសធម៌មួយ ដើម្បីទទួលបានប្រាក់ចំណូលសុទ្ធពីការលក់ក្លឹបរបស់ខ្លួនមួយនេះផងដែរ។
លោក Roman Abramovich បានថ្លែងឱ្យដឹងនៅក្នុងសេចក្ដីថ្លែងការណ៍មួយនៅលើគេហទំព័រក្លឹបបាល់ទាត់ Chelsea ថា៖ «មូលនិធិនេះនឹងត្រូវប្រើប្រាស់ជាប្រយោជន៍ដល់ជនរងគ្រោះទាំងអស់នៃសង្រ្គាមនៅអ៊ុយក្រែន។ វាគឺជាការសម្រេចចិត្តដ៏ពិបាកមួយ ហើយក៏ជារឿងដែលឈឺចាប់បំផុតក្នុងការចែកផ្លូវជាមួយក្លឹបមួយនេះផងដែរ»។
គួរបញ្ជាក់ថា ការប្រកាសដាក់លក់ក្លឹបបាល់ទាត់យក្សមួយនេះត្រូវបានធ្វើឡើងក្នុងរយៈពេលប៉ុន្មានម៉ោង បន្ទាប់ពីនាយករដ្ឋមន្ត្រីចក្រភពអង់គ្លេស លោក បូរីស ចនសុន បានចោទជាសំណួរថាតើហេតុអ្វីបានជាលោក Roman Abramovich មិនទាន់ត្រូវបានដាក់ទណ្ឌកម្ម ខណៈដែលអង់គ្លេសបានដាក់ទណ្ឌកម្មលើបុគ្គលនិងស្ថាប័នរុស្ស៊ីជាង១០០មកហើយ ក្នុងការឆ្លើយតបទៅនឹងការវាយប្រហារលើអ៊ុយក្រែន។
យោងតាមសារព័ត៌មាន Sky News ក៏បានរាយការណ៍ឱ្យដឹងដែរថា ក្លឹបបាល់ទាត់យក្ស Chelsea របស់លោក Roman Abramovich នេះ ត្រូវបានដាក់លក់ក្នុងតម្លៃប្រមាណ៣ពាន់លានផោន ដែលស្មើនឹង៤ពាន់លានដុល្លារអាមេរិក ខណៈដែលអ្នកជំនួញជនជាតិស្វីសមួយរូប លោក Hansjoerg Wyss បានបង្ហើបឱ្យដឹងថា ខ្លួនទទួលបានការផ្ដល់ជូនដើម្បីទិញក្លឹបមួយនេះកាលពីថ្ងៃអង្គារ រួមជាមួយនឹងអ្នកទិញចំនួន៣នាក់ផ្សេងទៀត។
ទាក់ទិនទៅនឹងការដាក់លក់ក្លឹបបាល់ទាត់របស់ខ្លួននេះដែរ លោក Roman Abramovich បានបន្ថែមថា៖ «ខ្ញុំសង្ឃឹមថា ខ្ញុំនឹងអាចទៅកាន់កីឡដ្ឋាន Stamford Bridge ជាលើកចុងក្រោយ ដើម្បីជម្រាបលាអ្នកទាំងអស់គ្នាដោយផ្ទាល់ផងដែរ»៕
