គណបក្សខ្មែររួបរួមជាតិ សម្រេចទទួលយកអតីតមន្រ្តីជាន់ខ្ពស់គណបក្សហ្វ៊ុនស៊ិនប៉ិចមួយចំនួនដែលសុំចូលរួមក្នុងសកម្មភាពនយោបាយជាមួយគណបក្ស ដែលធ្លាប់ជាឈាមជ័រក្នុងរាជានិយមជាមួយគ្នា។
អតីតមន្រ្តីជាន់ខ្ពស់មួយចំនួននៃគណបក្សហ្វ៊ុនស៊ិនប៉ិច បានសម្រេចចាកចេញពីបក្សរាជានិយមមួយនេះ ហើយប្រកាសជាផ្លូវការចូលរួមជាមួយគណបក្សខ្មែររួបរួមជាតិ នៅថ្ងៃទី២ ខែមីនា ម្សិលមិញ។ ក្រោយការប្រកាសនេះ អតីតមន្រ្តីជាន់ខ្ពស់គណបក្សហ្វ៊ុនស៊ិនប៉ិច ក៏បានចេញលិខិតចំហមួយនៅថ្ងៃព្រហស្បតិ៍នេះ ដោយអំពាវនាវឱ្យសមាជិកនៅថ្នាក់មូលដ្ឋានដែលមានប្រមាណ៤០ម៉ឺននាក់នៅទូទាំងប្រទេសចេញមកចូលរួមក្នុងសកម្មភាពនយោបាយជាមួយគណបក្សថ្មី ដែលដឹកនាំដោយលោក ញឹក ប៊ុនឆៃ ផងដែរ។
វីអូឌី ទទួលបានសំឡេងរបស់ប្រធានគណបក្សរួបរួមជាតិ និងជាអតីតមេទ័ពតស៊ូនៅតាមជាយដែនកម្ពុជា-ថៃ លោក ញឹក ប៊ុនឆៃ ដែលអះអាងថា គណបក្សខ្មែររួបរួមជាតិ បានផ្ដស់សម្បទារួចរាល់ហើយជាសមាជិកពេញសិទ្ធិ ចំពោះអតីតមន្រ្តីជាន់ខ្ពស់នៃគណបក្សហ៊្វុនស៊ិនប៉ិច។ លោក ញឹក ប៊ុនឆៃ មានសុទិដ្ឋិនិយមថា តាមរយៈចរន្តនយោបាយថ្មី និងផែនការយុទ្ធសាស្រ្ត ដែលកំពុងតែរៀបចំនេះ គណបក្សរបស់លោកនឹងទទួលបានសំឡេងគាំទ្រសម្រាប់ការបោះឆ្នោតឃុំ-សង្កាត់ខាងមុខនេះ។
លោកបន្តថា៖ «នៅតាមបណ្ដាខេត្ត គឺបានទំនាក់ទំនង ហើយបានចាប់ដៃជាមួយថ្នាក់ដឹកនាំបក្ស និងបានជួបជុំគ្នាហើយ បានស្រុះស្រួលគ្នា ដើម្បីរៀបចំបេក្ខភាពក្រុមប្រឹក្សាឃុំ-សង្កាត់ ធ្វើយ៉ាងណាឱ្យបាន១០០ភាគរយនៅតាមបណ្ដារាជធានីខេត្ត»។
អតីតមន្រ្តីជាន់ខ្ពស់ទាំងនោះ រួមមាន លោក ចាប ញ៉ាលីវុធ ដែលត្រូវជាប្អូនសម្ដេចក្រុមព្រះ នរោត្ដម រណឬទ្ធិ, លោក សាយ ហាក់, លោក ញ៉េប ប៊ុនជិន ដែលអ្នកទាំង៣ ជាអតីតអនុប្រធានគណបក្សហ៊្វុនស៊ិនប៉ិច, លោក យឹម សាវី អគ្គលេខាធិការគណបក្ស, លោក ផាន់ សិទ្ធី ជាអ្នកនាំពាក្យ, លោក វ៉ាន់ សុផាន់ណា និងលោក ឈឹម ឈន ជាសមាជិកគណៈកម្មាធិការនាយក រួមទាំងមន្រ្តីជាន់ខ្ពស់មួយចំនួនទៀត។
ថ្លែងប្រាប់ក្រុមអ្នកសារព័ត៌មាននៅថ្ងៃម្សិលមិញ នៅសង្កាត់ជ្រោយចង្វារ រាជធានីភ្នំពេញ លោក ញ៉េប ប៊ុនជិន បញ្ជាក់ថា បើទោះជាមានវិវាទផ្ទៃក្នុង និងមានចំណុចខ្លះមិនចុះសម្រុងគ្នា ក៏រូបលោកនិងថ្នាក់ដឹកនាំផ្សេងទៀតនៅតែមានភក្ដីភាពចំពោះគណបក្សរាជានិយមហ៊្វុនស៊ិនប៉ិច។ ប៉ុន្តែលោកថា ការរង់ចាំដើម្បីផ្សះផ្សាភាពប្រេះឆានេះមិនទទួលបានលទ្ធផល ហើយភាគីទំនាស់ម្ខាងទៀតមិនចង់ឱ្យមានការរួបរួមផ្ទៃក្នុងឡើងវិញ ទើបពួកគាត់ត្រូវបង្ខំចិត្តដើរចេញ ហើយមកចូលរួមជាមួយគណបក្សរបស់លោក ញឹក ប៊ុនឆៃ។
លោកបន្តថា៖ «អ្នកជាតិនិយម អ្នកស្នេហាជាតិ ដែលយល់ឃើញថា គណបក្សខ្មែររួបរួមជាតិនេះមានប្រវត្តិចេញពីអ្នកតស៊ូ និងប្រវត្តិចេញពីអ្នករាជានិយមហ៊្វុនស៊ិនប៉ិចដែរ ហើយខំប្រមែប្រមូលអ្នកដែលគេបោះបង់ចោលនេះឱ្យមកនៅក្នុងចង្កោមនេះ ហើយសូមអញ្ជើញចូលមករួបរួមគ្នា ដើម្បីកសាងការដែលរួបរួមគ្នានេះឱ្យមានអនាគតទាំងអស់គ្នាទៅវិញ»។
អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន ថ្លែងថា គណបក្សរាជានិយមមួយនេះមិនដែលបានបោះបង់សមាជិកណាម្នាក់ទេ ប៉ុន្តែអតីតមន្រ្តីជាន់ខ្ពស់ដែលដើរចេញហើយទៅរកទ្រនំថ្មីនេះ ជាអ្នកដែលធ្លាប់ប្រឆាំងវត្តមានបុត្រាច្បងរបស់សម្ដេចក្រុមព្រះធ្វើជាព្រះប្រធានគណបក្ស។ លោកបន្តថា សារនយោបាយដែលអតីតអ្នកនយោបាយចាស់វង្សាទាំងនោះលើកឡើង គឺគ្រាន់តែដើម្បីបង្ហាញថាខ្លួនស្អាតស្អំ និងជាជនរងគ្រោះប៉ុណ្ណោះ។
លោកបន្តថា៖ «ថ្មីៗនេះ ពួកគាត់តែងប្រឆាំងចំពោះការតែងតាំងព្រះអង្គម្ចាស់ នរោត្ដម ចក្រាវុធ ហើយថែមទាំងមានពាក្យបណ្ដឹងទៅតុលាការ និងទៅក្រសួងមានសមត្ថកិច្ចផង។ ហើយថ្មីៗនេះ ព្រះអង្គលោកតែងតែអំពាវនាវទាំងនៅក្នុងអង្គសមាជ ដូចយើងដឹងស្រាប់ហើយ គឺព្រះអង្គអំពាវនាវឱ្យពួកអ្នកនយោបាយ ឬក៏ឥស្សរជនណាដែលមិនសប្បាយចិត្ត ឱ្យត្រលប់មកវិញ»។
យ៉ាងនេះក្ដី លោកបណ្ឌិត សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិត មើលឃើញថា ទាំងគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ពិតជាលំបាកក្នុងការកសាងជំនឿចិត្តពីអ្នកគាំទ្រវិញណាស់។ លោកបន្តថា ភាពប្រេះឆានិងខ្វះសាមគ្គីភាពផ្ទៃក្នុង ដែលមាននៅក្នុងបក្សរាជានិយមមួយនេះ ជាលទ្ធផលបង្ហាញពីភាពបរាជ័យរួចមកហើយក្នុងរយៈពេលប៉ុន្មានឆ្នាំចុងក្រោយនេះ។
មួយវិញទៀត លោកថា អ្នកនយោបាយដែលទៅសាងទ្រនំថ្មីនេះទៀតសោត ក៏មិនប្រាកដដែរថាអាចនឹងសាងប្រជាប្រិយភាពបានវិញដែរ ព្រោះពួកគេសុទ្ធតែជាអ្នកនយោបាយដែលមិនមែនថ្មីទៀតឡើយសម្រាប់ពលរដ្ឋនៅមូលដ្ឋាន។
លោកបន្តថា៖ «បើសិនជាគ្មាននយោបាយ ហើយមានជំហរណាមួយដាច់ណាត់ ហើយច្បាស់លាស់ ខ្ញុំនៅតែជឿជាក់ថា ការគាំទ្រនៅក្នុងវិស័យនយោបាយនៅកម្ពុជាពិបាកនឹងទទួលបានការគាំទ្រពីបងប្អូនប្រជាពលរដ្ឋខ្លាំងណាស់»។
ដោយមានជម្លោះផ្ទៃបក្ស នៅក្រោយឆ្នាំ២០០៣ គណបក្សហ៊្វុនស៊ិនប៉ិច ដែលធ្លាប់ទទួលបានសំឡេងឆ្នោតនៅក្នុងរដ្ឋសភា ក៏ត្រូវបាត់បង់សំឡេងទាំងស្រុង។ ការធ្លាក់ចុះនេះបានកើតឡើងជាបន្តបន្ទាប់ក្នុងពេលសមាជិកនៅក្នុងគណបក្ស ដូចជា លោក ញឹក ប៊ុនឆៃ ជាដើម ត្រូវបង្ខំចិត្តដើរចេញ ហើយបង្កើតគណបក្សមួយថ្មី។ ដោយមើលឃើញពីការស្រកស្រុតការគាំទ្រ អ្នកនយោបាយដែលធ្លាប់ជ្រកក្រោមឆ័ត្រតែមួយ បានព្យាយាមបូកបញ្ចូលគ្នាឱ្យទៅជាកម្លាំងរាជានិយមតែមួយឡើងវិញ ប៉ុន្តែបំណងនេះត្រូវបរាជ័យម្តងហើយម្តងទៀត ដោយសារអ្នកនយោបាយមានទស្សនៈផ្សេងគ្នា៕