ក្រសួងសុខាភិបាលបានប្រកាសឱ្យប្រមូលត្រលប់មកវិញនូវផលិតផលទឹកដោះគោដែលមានឈ្មោះ Alimentum, EleCare និង Human Milk Fortifier ក្រោយសង្ស័យថា មានឆ្លងមេរោគដែលបង្កឱ្យមានគ្រោះថ្នាក់ដល់សុខភាពអ្នកប្រើប្រាស់ ពិសេសចំពោះទារកនិងកុមារតូចៗ។
សេចក្ដីជូនព័ត៌មានរបស់ក្រសួងសុខាភិបាល ចុះថ្ងៃទី៣ ខែមីនា ឆ្នាំ២០២២ ឱ្យដឹងថា ក្រសួងបានទទួលដំណឹងពីអាជ្ញាធរសុវត្ថិភាពចំណីអាហារអន្តរជាតិ (INFOSAN), សេចក្ដីប្រកាសរបស់រដ្ឋបាលឱសថ និងចំណីអាហារសហរដ្ឋអាមេរិក, សេចក្ដីប្រកាសរបស់រោងចក្រផលិតទឹកដោះគោឈ្មោះ អ៊ែបប៊ុត (Abbott) និងលិខិតចុះទី២១ ខែកុម្ភៈ ឆ្នាំ២០២២ របស់ក្រុមហ៊ុន ឌីខេអេសអេច (ខេមបូឌា) អិលធីឌី បានបញ្ជាក់ពីការប្រមូលត្រលប់មកវិញដោយស្ម័គ្រចិត្តនូវផលិតផលទឹកដោះគោម្សៅ ដូចជា Alimentum, EleCare, Human Milk Fortifier ផលិតដោយរោងចក្រឈ្មោះ ស្ទីហ្គីស (Sturgis) រដ្ឋមីស៊ីន សហរដ្ឋអាមេរិក។
ក្រសួងបន្តថា ការប្រកាសឱ្យប្រមូលត្រលប់មកវិញនេះ ក្រោយពីមានការសង្ស័យថា ផលិតផលទាំងនោះមានឆ្លងមេរោគឈ្មោះ ក្រូណូបាក់ទែរសាកាហ្សាគី (Cronobacter Sakazakii) និងសាលម៉ូណែលឡា (Salmonella) ក្នុងខ្សែសង្វាក់ផលិតកម្ម។
ក្រសួងបញ្ជាក់ថា៖ «ពពួកមេរោគ ក្រូណូបាក់ទែរសាកាហ្សាគី [Cronobacter Sakazakii] ស្លាប់បាននៅសីតុណ្ហភាព ៧០អង្សាសេឡើង។ ដូច្នេះ ចំពោះមាតាបិតាដែលនិយមរៀបចំ[ធុង]ទឹកដោះគោម្សៅជាមួយទឹកត្រជាក់ដែលមានកម្ដៅទាបជាង៧០អង្សាសេ គឺមានហានិភ័យខ្ពស់ដល់សុខភាពកូន»។
ទោះយ៉ាងណា ក្រសួងថា ប្រទេសកម្ពុជាពុំមាននាំចូលស្របច្បាប់ផលិតផលដែលសង្ស័យនេះទេ ប៉ុន្តែក្រសួងអំពាវនាវឱ្យមានការប្រុងប្រយ័ត្នខ្ពស់ក្នុងការប្រើប្រាស់ផលិតផលទឹកដោះគោ៕
