មន្រ្តីចរចាអ៊ុយក្រែនមួយរូបបានឱ្យដឹងនៅថ្ងៃព្រហស្បតិ៍ម្សិលមិញថា កិច្ចចរចាជុំទី២ ស្ដីពីបទឈប់បាញ់របស់ខ្លួនជាមួយរុស្ស៊ី មិនទទួលបានលទ្ធផលច្រើនដូចអ្វីដែលពួកគេបានរំពឹងទុកនោះទេ ប៉ុន្តែភាគីទាំងពីរបានឈានដល់ការយោគយល់គ្នាមួយក្នុងការបង្កើតច្រករបៀងមនុស្សធម៌ដើម្បីជម្លៀសជនស៊ីវិលចេញ។
ទីភ្នាក់ងារសារព័ត៌មាន Reuters បានស្រង់សម្ដីទីប្រឹក្សាប្រធានាធិបតីអ៊ុយក្រែន លោក Mykhailo Podolyak ដែលបានថ្លែងថា ភាគីទាំងពីរបានគិតគូរអំពីបទឈប់បាញ់ជាបណ្ដោះអាសន្នមួយ ដើម្បីអនុញ្ញាតឱ្យមានការជម្លៀសជនស៊ីវិលទាំងឡាយចេញពីតំបន់។
ប្រភពដដែលបន្ថែមថា៖ «បទឈប់បាញ់នេះមិនមែនធ្វើឡើងនៅគ្រប់កន្លែងនោះទេ ពោលគឺសម្រាប់តែទីតាំងដែលមានច្រករបៀងមនុស្សធម៌ប៉ុណ្ណោះ។ បទឈប់បាញ់អាចនឹងត្រូវបានអនុវត្តក្នុងអំឡុងរយៈពេលនៃការជម្លៀស»។
ជាមួយគ្នានេះដែរ ភាគីទាំងពីរក៏បានឈានដល់ការយោគយល់គ្នាមួយក្នុងការចែកចាយឱសថនិងស្បៀងទៅកាន់ទីតាំងដែលមានការប្រយុទ្ធគ្នាខ្លាំងក្លាផងដែរ។
គួរបញ្ជាក់ថា នេះគឺជាលើកទីមួយហើយដែលភាគីទាំងពីរបានយល់ព្រមលើចំណុចមួយចំនួនជាមួយគ្នា គិតចាប់តាំងពីរុស្ស៊ីបានឈ្លានពានអ៊ុយក្រែនកាលពីសប្ដាហ៍មុន។
ទោះជាយ៉ាងណា លោក Mykhailo Podolyak បញ្ជាក់ថា លទ្ធផលដែលទទួលបានគឺមិនច្រើនដូចទៅនឹងអ្វីដែលរុស្សីចង់បានឡើយ។
លោកថា៖ «ជារឿងដ៏គួរឱ្យសោកស្ដាយមួយដែលយើងមិនទទួលបានលទ្ធផលច្រើនដូចអ្វីដែលយើងបានរំពឹងទុក»។
លោក Mykhailo Podolyak បន្តថា៖ «រឿងតែមួយគត់ដែលយើងបានពិភាក្សាលម្អិត គឺទាក់ទងនឹងទិដ្ឋភាពមនុស្សធម៌ ដោយសារតែទីក្រុងជាច្រើននាពេលបច្ចុប្បន្នត្រូវបានហ៊ុមព័ទ្ធ ហើយតម្រូវការឱសថ អាហារ និងការជម្លៀសចេញ ពិតជាមានសារៈសំខាន់ខ្លាំង»។
រុស្ស៊ីបានបើកការឈ្លានពានក្នុងទ្រង់ទ្រាយធំរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍សប្ដាហ៍មុន ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន។
ទោះជាយ៉ាងណា ការឈ្លានពានពីសំណាក់រុស្ស៊ីនេះនៅមិនទាន់សម្រេចបាននូវគោលបំណងរបស់ប្រធានាធិបតីរបស់ខ្លួនក្នុងការផ្ដួលរំលំរដ្ឋាភិបាលអ៊ុយក្រែននោះទេ៕