ក្រុមពលរដ្ឋដែលសម្រុកទៅទិញថ្នាំព្យាបាលជំងឺកូវីដ-១៩ នៅក្រសួងប្រៃសណីយ៍មានជំនឿលើប្រសិទ្ធភាពថ្នាំរបស់ក្រសួងសុខាភិបាល ក៏ប៉ុន្តែពួកគាត់ពិបាករកទិញនៅកន្លែងផ្សេងដែលមិនទាន់មានការចុះបញ្ជិការបស់ក្រសួងត្រឹមត្រូវ។
ពលរដ្ឋនៅរាជធានីភ្នំពេញម្នាក់ កញ្ញា ណាន់ មារ៉ា បានប្រាប់សារព័ត៌មានវីអូឌីនៅថ្ងៃសុក្រថា កាលពីថ្ងៃទី២៣ ខែកុម្ភៈ នាងបានទៅតម្រង់ជួររកទិញឱសថព្យាបាលជំងឺកូវីដ-១៩ របស់ក្រសួងសុខាភិបាលនៅឯក្រសួងប្រៃសណីយ៍ និងទូរគមនាគមន៍ដែរ ប៉ុន្តែគេប្រាប់ថា អស់ហើយ។ កញ្ញាបន្តថា ប្រសិទ្ធភាពថ្នាំព្យាបាលជំងឺកូវីដ-១៩ មានប្រសិទ្ធភាពខ្ពស់និងមានការចុះបញ្ជិកាត្រឹមត្រូវរបស់ក្រសួងអាចធានាគុណភាព ទើបកញ្ញានិងពលរដ្ឋជាច្រើនសម្រុកទៅទិញនៅក្រសួងប្រៃសណីយ៍។
កញ្ញាថា៖ «តាមការគិតរបស់ខ្ញុំ ខ្ញុំអាចជឿជាក់ថា ថ្នាំហ្នឹងប្រហែលជាខ្ទង់ ៧០ ទៅ ៨០ ភាគរយមានគុណភាព មូលហេតុដោយសារតែមើលទៅថ្នាំហ្នឹងវាលក់ដាច់ទី១ ហើយទី២វាពិបាករកទិញហើយវាថ្លៃដែរ ខ្ទង់ ៦៥ដុល្លារ ដូច្នេះអាចគុណភាពល្អហើយ»។
កញ្ញា ណាន់ មារ៉ា ជានិស្សិតស្នាក់នៅរាជធានីភ្នំពេញលើកឡើងថា ទោះបីជាថ្នាំព្យាបាលជំងឺកូវី-ដ១៩ ហ្នឹងមានតម្លៃថ្លៃបន្តិចនិងពិបាករកទិញពិតមែន ប៉ុន្តែក្រសួងក៏បានយកចិត្តទុកដាក់ទប់ស្កាត់និងការពារដល់សុខភាពរបស់ប្រជាពលរដ្ឋក្នុងការបញ្ជៀសការឆ្លងជំងឺកូវីដ-១៩ ផងដែរ។
កញ្ញាថា៖ «សម្រាប់ខ្ញុំគិតថា វាជាវិធានការមួយដែរ សម្រាប់ឱ្យប្រជាពលរដ្ឋ ពួកគាត់យល់ឃើញថា ក្រសួងក៏បានយកចិត្តទុកដាក់ជាមួយនឹងរាជរដ្ឋាភិបាលគិតគូរពីសុខភាពយើងដែរ»។
ស្រដៀងគ្នានេះដែរ យុវជនម្នាក់ទៀតរស់នៅរាជធានីភ្នំពេញ សុំមិនបញ្ចេញឈ្មោះប្រាប់សារព័ត៌មានវីអូឌីថា លោកមានជំនឿទុកចិត្តទៅលើថ្នាំព្យាបាលជំងឺកូវីដ-១៩ របស់ក្រសួងដែលចេញផ្សាយលក់ឱសថប្រឆាំងវីរុសកូវីដ-១៩ Molnupiravir។
លោកថា ទោះបីលោកនឹងប្រជាពលរដ្ឋមិនទាន់ទុកចិត្តទាំងស្រុង ប៉ុន្តែលោកនិងពលរដ្ឋជាច្រើនទៀតបាននាំគ្នាសម្រុកទៅទិញថ្នាំព្យាបាលជំងឺកូវីដ-១៩ ឬឱសថប្រឆាំងវីរុសកូវីដ-១៩ Molnupiravir ដែរ ព្រោះយល់ថា ការណែនាំពីក្រសួងសុខាភិបាលពិតជាត្រឹមត្រូវ ហើយអាចនិងមានប្រសិទ្ធភាពខ្ពស់។
លោកបន្តថា៖ «ប្រសិទ្ធភាពថ្នាំយើងមិនអាចវាស់ស្ទង់បានទេ ជារួមយើងគ្រាន់តែជាអ្នកជំងឺ ហើយនៅក្នុងប្រទេសយើងក៏មិនទាន់មានថ្នាំណាដែលគេផ្សាយក្រៅតែថ្នាំហ្នឹងដែរ(Molnuparivir) មានតែថ្នាំហ្នឹងទេ ដែលក្រសួងគេហ៊ានចេញសេចក្តីថ្លែងការណ៍ថា វាអាចព្យាបាលជា ហើយទោះបីយើងមិនសូវទុកចិត្តប៉ុណ្ណា តែវាប្រសើរជាងអត់ ទើបខ្ញុំសម្រេចចិត្តទិញវាទៅ»។
បុរសរូបនេះស្នើសុំដល់ក្រសួងសុខាភិបាលនិងមន្រ្តីពាក់ព័ន្ធជួយពិនិត្យមើលលើតម្លៃនៃឱសថព្យាបាលជំងឺកូវីដ-១៩នេះផង ព្រោះវាមានតម្លៃថ្លៃដែរ។ លោកថា ពលរដ្ឋនៅតាមជនបទនិងពលរដ្ឋក្រីក្រក៏មានការភ័យខ្លាចជំងឺកូវីដ-១៩ និងពិបាករកទិញដែរ ព្រោះមានតម្លៃថ្លៃ។
លោកបន្តថា៖ «ខ្ញុំគិតថា ជំងឺហ្នឹងមិនមែនរីករាលដាលនៅតែក្នុងទីក្រុងទេ នៅជនបទក៏ដូចគ្នាដែរ ចុះបើតម្លៃវាថ្លៃពេក តើប្រជាពលរដ្ឋយើងអាចមានលទ្ធភាពក្នុងការប្រើប្រាស់ថ្នាំហ្នឹងអត់? អានឹងរឿងទី១ រឿងទី២ទៀតខាងក្រសួងគួរតែមានវិធានការមួយជាក់លាក់ដើម្បីឱ្យអ្នកដែលប្រើប្រាស់ និងអ្នកដែលលក់ថ្នាំហ្នឹង គួរតែកំរិតតម្លៃឱ្យគាត់ត្រឹមត្រូវ ទោះបីក្រសួងចេញសេចក្តីថ្លែងការណ៍ជុំវិញការលក់ហ្នឹងហើយក៏ដោយ ក៏ប៉ុន្តែជាក់ស្តែងអ្នកដែលរកស៊ីគាត់នៅតែលក់ថ្លៃអីចឹង»។
ទាក់ទងនឹងបញ្ហានេះ វីអូឌីមិនអាចសុំការបកស្រាយពីលោក ហុក គឹមចេង អគ្គនាយកបច្ចេកទេសនៃក្រសួងសុខាភិបាលដោយទូរស័ទ្ទចូលជាច្រើងដង ប៉ុន្តែគ្មានអ្នកទទួល។
ដោយឡែកប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ប្រាប់សារព័ត៌មានវីអូឌីថា លោកទទួលស្គាល់នូវថ្នាំព្យាបាលជំងឺកូវីដ-១៩ ឬឱសថប្រឆាំងវីរុសកូវីដ-១៩ Molnupiravir ដែលអ្នកប្រាជ្ញគេរកឃើញ។ ប៉ុន្តែលោកស្នើឱ្យពលរដ្ឋជួយពិនិត្យឱ្យបានត្រឹមត្រូវមុននឹងប្រើប្រាស់។
លោកបន្តថា៖ «ទី១ យើងត្រូវចូលទៅពិនិត្យ License (អាជ្ញាប័ណ្ណ) របស់គាត់ តើក្រសួងសុខាភិបាលបានបោះត្រានៅលើប្រអប់ថ្នាំហ្នឹងអត់? ទី២ ក្នុងការលក់ហ្នឹងគេមានតម្លៃកំណត់ពីក្រសួងសុខាភិបាល ឬពីក្រសួងហិរញ្ញវត្ថុនិងក្រសួងពាក់ព័ន្ធមួយចំនួនទៀតហើយឬនៅមុនថ្នាំហ្នឹងចូលមក»។
ករណីនេះលោក អ៊ូច វុទ្ធី ក៏ស្នើឱ្យក្រសួងសុខាភិបាលនិងក្រសួងពាក់ព័ន្ធជាពិសេសរដ្ឋាភិបាលជួយសម្រួលតម្លៃទីផ្សាសមរម្យដល់ប្រជាពលរដ្ឋក្រីក្រនៅតាមជនបទ ដើម្បីពួកគាត់អាចរកទិញបាននិងចូលរួមទប់ស្កាត់ការឆ្លងរីករាលដាលនៃជំងឺនេះដែរ។
លោកថា៖ «មានតែប្រមុខរដ្ឋាភិបាលទេ ដែលស្នើសុំថ្នាំអស់ហ្នឹងបាន យកមកជួយបងប្អូនប្រជាពលរដ្ឋយើងក្រីក្រ។ ប្រមុខរដ្ឋាភិបាលហើយនឹងក្រសួងសុខាភិបាលត្រូវមានវិធានការខ្លាំង ដើម្បីឱ្យថ្នាំហ្នឹងអាចស្ថិតនៅក្នុងតម្លៃទាប ពីព្រោះ ថាឈ្មួញដែលឆ្លៀតឱកាសមានបាន គឺមានបាននៅពេលរដូវហ្នឹង ឈ្មួញឆ្លៀតឱកាសគេអត់គិតថា បងប្អូនក្រ បងប្អូនមានអីទេ គេគិតតែធ្វើម៉េចឱ្យតែក្រុមហ៊ុនគេ ឬឱ្យពូជពង្សគ្រួសារគេមានបាន រីកចម្រើន គេមិនគិតថា ប៉ះពាល់ដល់ហិរញ្ញវត្ថុគ្រួសារបងប្អូនទៅថ្ងៃក្រោយទេ»។
កាលពីថ្ងៃទី២១ ខែកុម្ភៈ ក្រសួងសុខាភិបាលបានចេញសេចក្ដីជូនដំណឹងមួយដោយលើកឡើងថា ស្របពេលកំពុងមានការឆ្លងរីករាលដាលនៃជំងឺកូដ-១៩ ក្នុងសហគមន៍ ក្រសួងបានពិនិត្យឃើញមានការចែកចាយនិងផ្សព្វផ្សាយលក់ឱសថប្រឆាំងវីរុសកូវីដ-១៩ Molnupiravir មួយចំនួន ដូចជា MERIPIR 200mg, MERIPIR 400mg, MOLUZEN 800, MOLAZ, MOLUZIR ជាដើម ដែលពុំមានលេខទិដ្ឋាការ ឬបញ្ជិកាពីក្រសួងឡើយ គិតត្រឹមថ្ងៃទី២១ ខែកុម្ភៈនេះ។
ក្រសួងបានអំពាវនាវដល់ប្រជាពលរដ្ឋទាំងអស់ឱ្យឈប់ទិញ និងប្រើប្រាស់ឱសថ Molnupiravir ដែលគ្មានលេខទិដ្ឋាការ ឬបញ្ជិកាខាងលើជាបន្តទៀត ពីព្រោះឱសថទាំងនេះ មិនអាចធានាបាននូវប្រសិទ្ធភាព គុណភាព និងសុវត្ថិភាពបានឡើយ ហើយអាចជាឱសថក្លែងក្លាយបណ្តាលឱ្យប៉ះពាល់សុខភាព ឬមានគ្រោះថ្នាក់ដល់អាយុជីវិតរបស់អ្នកប្រើប្រាស់ទៀតផង។
ក្រសួងបានព្រមានថា ចំពោះជនណាដែលចែកចាយ និងផ្សព្វផ្សាយលក់ឱសថគ្មានលេខទិដ្ឋាការ ឬបញ្ជិកាខាងលើ និងជនពាក់ព័ន្ធដទៃទៀត ត្រូវបញ្ឈប់ការនាំចូល ចែកចាយ និងផ្សព្វផ្សាយលក់ជាបន្ទាន់៕
អត្ថបទដោយលោក សុត បាន
