ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានលើកឡើងថា សវនាការលោក កឹម សុខា ដែលធ្វើឡើងក្រោមហេតុផលនយោបាយនោះ នៅតែបន្តអូសបន្លាយដោយគ្មានដំណោះស្រាយ។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក Patrick Murphy បានសរសេរនៅលើទ្វីធ័រផ្លូវការរបស់លោក កាលពីរសៀលថ្ងៃទី៤ ខែមីនា ឆ្នាំ២០២២នេះ បន្ទាប់ពីលោកជួបជាមួយមេដឹកនាំគណបក្សសង្គ្រោះជាតិដែលត្រូវបានតុលាការរំលាយលោក កឹមសុខា។
លោក Patrick Murphy បានបញ្ជាក់លើទ្វីធ័រថា៖ «ខ្ញុំរីករាយដែលបានជួប ឯកឧត្តម កឹម សុខា នៅថ្ងៃនេះ។ សវនាការដោយមានហេតុផលនយោបាយរបស់លោក នៅតែបន្តអូសបន្លាយដោយគ្មានដំណោះស្រាយ។ កម្ពុជា នឹងទទួលបានអត្ថប្រយោជន៍ពីការស្តារសិទ្ធិនយោបាយ និងសេរីភាពរបស់គាត់ក្នុងការចូលរួមក្នុងដំណើរការបោះឆ្នោត»។
ចំណែកលោក កឹម សុខា ក៏បានសរសេរនៅលើហ្វេសប៊ុកនាថ្ងៃសៅរ៍នេះដែរថា ក្នុងជំនួបពិភាក្សាផ្លាស់ប្តូរយោបល់គ្នារវាងលោក Patrick Murphy ជាមួយលោក កឹម សុខា នោះបានផ្តោតជាសំខាន់ទៅលើដំណើរការសវនាការរបស់លោក កឹម សុខា ដែលបានអូសបន្លាយយូរ និងអំពីសិទ្ធិសេរីភាព និងលទ្ធភាពរបស់លោក កឹម សុខា ក្នុងការចូលរួមជីវភាពនយោបាយ និងការបោះឆ្នោតនាពេលឆាប់ៗខាងមុខនេះ។ ក្រៅពីនេះ ឥស្សរជនទាំងពីរក៏បានពិភាក្សាគ្នាអំពីទំនាក់ទំនង និងកិច្ចសហប្រតិបត្តិការរវាងសហរដ្ឋអាមេរិក និងកម្ពុជាក្នុងក្របខណ្ឌទ្វេភាគី តំបន់ និងពិភពលោកផងដែរ។
យ៉ាងណាក៏ដោយ ការលើកឡើងរបស់ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក Patrick Murphy ធ្វើឡើងស្របពេលសាលាដំបូងរាជធានីភ្នំពេញកំពុងបន្តសវនាការសំណុំរឿងលោក កឹម សុខា ក្រោមបទចោទ «គប់គិតជាមួយរដ្ឋបរទេសដើម្បីផ្តួលរំលំរដ្ឋាភិបាលកម្ពុជា»។
សវនាការកាត់ទោសលោក កឹម សុខា បានចាប់ផ្តើមសាជាថ្មី កាលពីថ្ងៃទី១៩ ខែមករា ឆ្នាំ២០២២ បន្ទាប់ពីអាក់ខានអស់រយៈពេល២ឆ្នាំដោយសារតែវិបត្តិនៃជំងឺកូវីដ-១៩។ គិតត្រឹមសវនាការនៅថ្ងៃទី២ ខែមីនា កន្លងទៅនេះ គឺជាសវនាការគម្រប់លើកទី៣២ ក្នុងរយៈពេល៤ឆ្នាំមកនេះ ក៏ប៉ុន្តែតំណាងអយ្យការ និងភាគីដើមបណ្ដឹង ពុំមានភស្តុតាងរឹងមាំណាមួយបញ្ជាក់ថា លោក កឹម សុខា បានគប់គិតជាមួយរដ្ឋបរទេសដើម្បីផ្ដួលរំលំរដ្ឋាភិបាលកម្ពុជានោះទេ ក្រៅតែពីភស្តុតាងជារូបថត ជាវីដេអូ ដែលជាសកម្មភាពរបស់លោក កឹម សុខា ក្នុងពេលចុះជួបប្រជាពលរដ្ឋនិងអ្នកគាំទ្រនៅក្នុងនិងក្រៅប្រទេសតែប៉ុណ្ណោះ។
ថ្លែងនៅមុនធ្វើដំណើរទៅចូលរួមសវនាការលើកទី៣២ កាលពីព្រឹកថ្ងៃទី២ ខែមីនា លោក កឹម សុខា បានអំពាវនាវឱ្យតុលាការទម្លាក់ចោលការចោទប្រកាន់មកលើរូបលោក និងបានប្រកាសថា លោកបានត្រៀមខ្លួនរួចហើយ ដើម្បីចរចានយោបាយជាមួយលោកនាយករដ្ឋមន្ត្រី ហ៊ុន សែន៕