រដ្ឋមន្រ្តីការបរទេសចិន លោក វ៉ាង យី (Wang Yi) បានឱ្យដឹងនៅថ្ងៃចន្ទនេះថា មិត្តភាពប្រទេសរបស់ខ្លួនជាមួយរុស្ស៊ី គឺរឹងមាំខ្លាំងណាស់ ខណៈដែលលទ្ធភាពសម្រាប់កិច្ចសហប្រតិបត្តិការរវាងប្រទេសទាំងពីរ គឺមានភាពទូលំទូលាយ។
ការថ្លែងរបស់រដ្ឋមន្រ្តីការបរទេសចិនរូបនេះ ត្រូវបានធ្វើឡើងស្របពេលដែលរុស្ស៊ីបច្ចុប្បន្នកំពុងតែឈ្លានពាននិងវាយប្រហារលើប្រទេសអ៊ុយក្រែន ខណៈដែលសកម្មភាពនេះត្រូវបានថ្កោលទោសយ៉ាងធ្ងន់ធ្ងរដោយបណ្ដាប្រទេសជាច្រើននៅលើពិភពលោក។
ថ្លែងប្រាប់សន្និសីទសារព័ត៌មានមួយ បន្ទាប់ពីកិច្ចប្រជុំសភាប្រចាំឆ្នាំរបស់ប្រទេសចិន លោក វ៉ាង យី បានលើកឡើងថា កិច្ចសហប្រតិបត្តិការរវាងប្រទេសទាំងពីរ [ចិន និងរុស្ស៊ី] នាំមកនូវផលប្រយោជន៍និងសុខុមាលភាពដល់ប្រជាជនទាំងពីរ។
ប្រទេសចិនក៏ធ្លាប់បានឱ្យដឹងដែរថា ពលរដ្ឋរបស់ខ្លួនដែលរស់នៅក្នុងប្រទេសអ៊ុយក្រែនសរុបមានចំនួនប្រមាណជា ៦ពាន់នាក់។
ជាមួយគ្នានេះ អ្នកនាំពាក្យក្រសួងការបរទេសចិន លោក Wang Wenbin កាលពីពេលកន្លងទៅ ក៏បានជំរុញឱ្យភាគីពាក់ព័ន្ធនឹងវិបត្តិអ៊ុយក្រែនទាំងអស់ គួរតែរក្សាភាពអត់ធ្មត់ និងចៀសវាងការធ្វើឱ្យស្ថានការណ៍កាន់តែធ្ងន់ធ្ងរបន្ថែមទៀតផងដែរ។
ការជំរុញដោយអ្នកនាំពាក្យការបរទេសរូបនេះ ត្រូវបានធ្វើឡើងបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានបញ្ជាដាក់អាវុធនុយក្លេអ៊ែរប្រទេសរបស់លោកឱ្យស្ថិតក្នុងការត្រៀមខ្ពស់៕
