មន្រ្តីផ្នែកកងកម្លាំងប្រដាប់អាវុធអ៊ុយក្រែន បានឱ្យដឹងនៅថ្ងៃអាទិត្យម្សិលមិញថា ទាហានរុស្ស៊ីជាង១១ ០០០នាក់បានស្លាប់បាត់បង់ជីវិត គិតចាប់តាំងពីប្រទេសមួយនេះបានបើកការឈ្លានពានលើប្រទេសរបស់ខ្លួន កាលពីថ្ងៃទី២៤ ខែកុម្ភៈ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទោះជាយ៉ាងណា ប្រភពដដែលនេះមិនបានរាយការណ៍ពីចំនួនចុងក្រោយនៃទាហានអ៊ុយក្រែនដែលរងរបួសនិងស្លាប់បាត់បង់ជីវិតនៅក្នុងការវាយប្រហារនេះនោះទេ។
ជាមួយគ្នានេះ ការិយាល័យសិទ្ធិមនុស្សរបស់អង្គការសហប្រជាជាតិ នៅថ្ងៃអាទិត្យម្សិលមិញ ក៏បានឱ្យដឹងនៅក្នុងសេចក្ដីថ្លែងការណ៍មួយថា គិតចាប់តាំងរុស្ស៊ីបានបើកការឈ្លានពានលើអ៊ុយក្រែនកាលពីខែមុន ក្នុងនោះ មានជនស៊ីវិលជាង៣៦០នាក់បានស្លាប់ក្នុងប្រទេសអ៊ុយក្រែន។
ការិយាល័យដដែលក៏បានបន្ថែមឱ្យដឹងផងដែរថា អ្នកដែលស្លាប់បាត់បង់ជីវិតនិងរងរបួសភាគច្រើន គឺបណ្ដាលមកពីការប្រើប្រាស់អាវុធជាតិផ្ទុះនានា ដែលរួមមានទាំងការបាញ់ផ្លោងដោយកាំភ្លើងធុនធ្ងន់ ប្រព័ន្ធរ៉ុក្កែត និងការវាយប្រហារតាមផ្លូវអាកាស។
គួរបញ្ជាក់ថា ការបើកការឈ្លានពានក្នុងទ្រង់ទ្រាយធំរបស់រុស្ស៊ីមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ ត្រូវបានធ្វើឡើង បន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន។
ទោះជាយ៉ាងណា ការឈ្លានពានពីសំណាក់រុស្ស៊ីនេះ នៅមិនទាន់សម្រេចបាននូវគោលបំណងរបស់ប្រធានាធិបតីរបស់ខ្លួនក្នុងការផ្ដួលរំលំរដ្ឋាភិបាលអ៊ុយក្រែននោះទេ៕
